Хальмг нерән һутасн уга

20-06-2023, 09:05 | Общество

Өдгә цагт мана нег һазра улс цергә шишлң керг-үүлдврт орлцҗ, залу-зөрмг йовдлмударн эврә таңһчин нерән дуудулҗ йовхинь дару-дарунь соңсад йосндан бахтнач. Шидр Целинн района күүкд улсин хүүвин ахлач, барин ветеран Стелла Бадмаева иим нег бахмҗта йовдлын тускар келҗ өгснь кен-негнднь омг үүдәҗ, седклинь үүмүлсн болх гиҗ сангдна.

Тиигәд одахн эн күүкд күүнд Аһш балһснд бәәдг Александр Перегудов җиңнүлсн болҗ һарв. Бийнь эн залу цергә шишлң керг-үүлдврт орлцсн саамдан нег ик дәәлдәнд сумнла харһад көлән икәр шавтасн болна. Цусан асхрулад, ормасн көндрдг арһ уга болад нам му ухан орҗасн кемлә генткн хаҗуһас, – Айдҗа, нәәҗ, би чамаг эндәс һарһҗ авнав, – гисн дун соңсгдҗ.
Тер дарунь гилтә әм аврачнь кезәһүр энүн тал гүүҗ ирснь нам медгдсн уга. Гиигн цогцта, эццәвр баахн цергч эврән бас шавтсн бийнь цергә үүрән дәәлдәнә ормас чирҗ һарһсн болна. Әәмшг уга һазрт ирчкәд, таньлдхла эннь Хальмг Таңһчин Целинн района Троицкое селәнд бәәдг Кона Мулаев болҗ һарв. Александр Перегудовиг тер дарунь гилтә Ростов балһсна госпитальд йовулв, кесг месллһ кесн бийнь эрүл-мендин бәәдлнь күцц кевәр ясрад уга болв. Герүрн ирн Александр нег һазра мана цергчиг хәәҗ авхар шиидв.
Кона Васильевич болхла Әәдрхнә мүҗин Капустин Яр балһсна госпитальд эмнүлгдәд, эврә сән дурарн хәрү дәәлдәнә һазрур йовҗ одсна тускар эн медв. Эрлһ бичәд, нам күцц кевәр эмнүлгдсн уга бәәҗ. Нань Конан тускар ямр чигн зәңг-зә уга бәәсмн, тегәд басл деерәс хәләһәд гихв, сән күүнә санаһар гихв генткн эн Троицкое селәнә бәәрн күүкд күүнә телефона тойг медҗ авад, Кона Мулаевин эк-эцкиг олҗ авхар шиидәд, Стелла Бадмаевад җиңнүлснь тер.
Стелла Айтаевна болхла Конан эклә харһҗ күүндәд, көвүнәннь эрүл-мендин бәәдләр соньмсв. Донбасст церглҗ йовдг көвүндән санань зовҗ, шав авсна хөөн нүднә харань муурчах бәәдлнь экин зүркинь шарклулҗ амр өгчәхш. Ода зәрм бәрмт цааснас көлтә шав авсан иткүлсн кемд боомтг учрвза гиҗ экнь үүмәтә бәәнә. Эн күүндврт орлцсн Хальмг Таңһчин Олна палатын ахлачин нөкд Анатолий Эрдниев болхла Конан экд Әрәсән Президентин седвәрәр бүрдәгдсн “Төрскән харсачнр”- гидг цергә шишлң керг-үүлдврт орлцачнриг болн әмнәсн хаһцсн цергчнрин өрк-бүлмүдиг дөңнлһнә шаңһа саңгин региональн әңгд одх селвг өгв.
Иргчдән Кона Мулаевин бәәдл-җирһл сән таларн хүврәд, Төрскән харсачин эрүл-мендин бәәдл ясрх гисн бат иткл бәәнә. Тиигәд хальмг теегин хәәртә үрн дәәлдәнә кемд залу-зөрмг йовдл һарһҗ, шавтсн цергчин әминь аврҗ хальмгудын нер туурулснь бахмҗта болв.

ШАГҖИН Любовь

Видео