Эрүл-менд харлһна көдләчнриг йөрәв

20-06-2023, 09:10 | Общество

Давсн долан хонгин чилгчәр Элстд таңһчин залврин сүүрин ик залд эрүлменд харлһна көдләчин Өдрт нерәдгдсн байрин хург болв. Таңһчин эмнлһсин сән гисн көдләчнрт эн өдр өөдән ачлвр бәрүлҗ өггдв. Таңһчин эрүл-менд харлһна халхин делгрлтд ик тәвцән орулсн ветеранмуд хамдан көдлҗ йовсн үүрмүдтәһән харһҗ, баһ цаган тодлв. Байрин хург үр-иньгин таалд давв. Таңһчин нертә болн уйн наста артистнр билг-эрдмәрн байрлулв.

Хальмг Таңһчин эрүл-менд харлһна министр Булат Сараев хургиг секәд, сән өдрлә йөрәв. Министрин келсәр, эндр таңһчин эмнлһст ут тоодан миңһн һар эмч болн хойр миңһн һар дунд медицинск көдләч көдлҗәнә. «Эрүл-менд харлһн» гидг келн-улсин төсвин медлд нидн таңһчд олна дамшлтын эмчин 9 офис, 13 ФАП тосхгдв. «Земск эмч/фельдшер» гидг төсвәр 37 күн селән һазрт көдлдг болв, теднәснь 25-нь эмчнр, наадкснь фельдшермуд болна. П.Жемчуевин нертә таңһчин эмнлһнә реабилитацин әңгд 100 сай арслңгар өдгә цага кергсл хулдҗ авгдв, тенд күнд гемтә улс цогц-махмудан батрулхин төлә сән таал тогтагдв. Таңһчин һоллгч эмнлһнә төлә шин КТ аппарат хулдҗ авдгдв. Давсн җилд судцна төвин болн гүлгн гемәс хөрлһнә диспансерин материальн-техническ ул бас батрулгдв. Таңһчин эмнлһст сән таал тогтахин төлә зәрм бүрдәцс сулдхгдсн бәәрнд нүүҗ орв, гиҗ министр келв.
Сән өдрин байрла авъяст тохрсар олн җилдән үнн-чик седклтәһәр көдлҗәдг, эрдмин халхар күцәмҗ бәрсн улсиг ачлдг мөн. Тегәд эн җил 400 шаху күн Әрәсән болн таңһчин өөдән ачлвр авснь хамдан көдлҗәх үүрмүдтнь ик бахмҗта йовдл болв. Хальмг Таңһчин Толһачин һардврин һардачин дарук Тарбан Савар «Хальмг Таңһчин ачта эмч» болн «Хальмг Таңһчин эрүлменд харлһна ачта көдләч» гидг өөдән нер зүүсн улсиг йөрәһәд, ачлвринь бәрүлҗ өгв. Хальмг Таңһчин залврин Ахлачин дарук–таңһчин социальн делгрлтин, күч-көлснә болн көдлмшәр тетклһнә министр Өлзәтин Марина «Әрәсән эрүл-менд харлһна йилһән сән көдләч» гидг өөдән ачлврар темдглгдсн улсиг ачлв. Хальмг Таңһчин Улсин Хуралын (Парламентин) депутат Хаалһин Очр бәәрн улсин эрүл-менд харлһна кергт ик тәвцән орулҗадг улст таңһчин парламентин Диплом болн зака үүдәгч органа Ахлачин Ханлтын бичг бәрүлҗ өгв.
Өөдән ачлвр авсн улс дунд таңһчин эрүл-менд харлһна халхд һучн-дөчн җилдән көдлҗ йовх улс бәәсмн, эднә нерд олнд темдгтә, юңгад гихлә эдн эрдмдән итклтә, отг-әәмгтән ачта улс болна. Теднә негнь «Хальмг Таңһчин ачта эмч» гидг нер зүүсн Ик Буурла района эмнлһнә эмч Самхан Людмилаг (зургт) онц зааҗ болхмн. Людмила Очировна 1979-ч җилд Хальмг медицинск училищиг йилһән сәәнәр төгсәснә хөөн Ик Буурл селәнд күч-көлснә хаалһан эклв. Хөөннь эн Сарпуль балһснд ик сурһульд сурад, эмчин эрдмтә болв. Дөчн һар җилин эргцд эмч бичкдүдин эрүл-менд батрулҗ, килмҗтә кевәр эдниг эмнҗ, дөң-тусан күргҗ йовна. Ик Буурла районд Людмила Очировнаг цуһар күндлҗ тевчнә, энүнә хәләврт кесг бичкдүд өсәд-босад бийснь эк-эцкнр болад үрдән үзүлхәр ирнә. Энүнә үлгүрәр Владислав көвүнь эмчин эрдм бас шүүҗ авснь темдгтә. Эндр Владислав Наранович дамшлтта эмч болад, Элстд шүднә таңһчин поликлиник һардҗана. Ач күүкднь Калуста Галина болн Самхан Заяна бас эмчнр болҗ таңһчин эмнлһст көдлҗәнә, һаһань эднд үлгүр-үзмҗ болна, тегәд эдн ямр нег төрәр сүвселвг авна. Эн өдрмүдт Эльвина ач күүкнь сурһулян төгсәһәд, шүүврән өгчәнә, иргчдән эн ээҗин болн эцкин үлгүрәр бас эмч болхар зуралҗана. Цуһар эдн Людмила Очировна өөдән нер зүүснлә ик гидгәр байрлҗ, хамдан сән өдрән темдглхәр адһв.
Байрин хургт орлцачнриг сән өдрлә йөрәхәр Б.Б.Городовиковин нертә ик сурһулин медицинск дацңгин түрүн оютнр ирснь бас темдгтә йовдл болв. Эмчин эрдм дасчах эн күүкд-көвүд цөөкн җил давад, таңһчин эмнлһст күч-көлснә хаалһан эклхмн.

ДООҖАН Наталья

Видео