Шаҗна халхар түрүн ик хург болхмн

20-06-2023, 09:15 | Общество

Нарт-делкән шаҗна ик хург Бурятьд 2023-ч җилин ноха сарин 17-ас авн 19 күртл болхмн. Бурхн Багшин номин туск ик күүндвр иим олн орлцата кемҗәнд түрүн болҗ кегдҗәхнь чинртә йовдл болҗана.

Бурхн Багшин номиг цәәлһҗ тархаҗ йовх кесг һазрар үүлдҗәдг бүрдәцсин организацсин һардачнриг болн шаҗна үүлдәчнриг эн хургт цуглулҗана. Тедн дунд нертә номтнр, йосна халхин болн олна үүлдәчнр, шаҗна ниицәсин болн төвмүдин элчнр мөн. Әрәсән олн регионас тедн цуглрҗ ирхмн. Үүлдәчнриг, бурхн шаҗнд шүтдг әмтиг болн шаҗна хувргудыг ниицүлдг Әрәсән бүрдәц, шаҗна сурһалиг болн шинҗллтиг дөңндг Саң болн Бурять Республикин залвр эн хургин бүрдәһәчнь болҗана.
Улан-Удэ балһснд болх хургт Моңһлас, Непалас, Энткгәс, Китдәс, Мьянмас, Шри-Ланкас, Вьетнамас, Таиландас, Бангладешас, Бутанас, Камбоджас, Лаосас, Кореяс, Японяс болн США-һас шаҗна үүлдәчнр ирҗ орлцх гиҗ күләгдҗәнә.
Хальмг Таңһчин, Тыван, Алтан, Забайкальск крайин, Иркутск мүҗин бурхн-шаҗна үүлдәчнр, номтнр болн эн үүлдвриг шинҗләчнр хургт орлцхар бас белдҗәнә.
Өдгә цагт ик чинр зүүҗәх нәрн төрмүдәр тохнята күүндвр кеһәд, эн төрмүдин туст Бурхн Багшин ном ямаран хәләцтә болҗахинь цәәлһҗ медүлхмн. Делкәд шаҗна наадк ниицәсәс түрүнкнь болҗ үүдсн Бурхн Багшин ном цуг тоотыг бүклднь хәләҗ, учр-утхинь медҗ, олнд цәәлһх кергтә гиҗ сурһҗ йовна. Бурхн Багшин номиг даслһна, баһчудт эн номин сурһаль өглһнә, тер мет ик сурһульмудын хоорндк залһлда тогталһна, номтнрин хамцу үүлдврин төрмүд бас күүндҗ хәләгдхмн.
Нарт-делкән хургин нег сүүрнь Иволгинск дацанд болхмн. Улан-Уде балһснас хол биш бәәдг Әрәсәд хамгин ик шаҗна төвд хувргуд, номтнр болн нань чигн олн үүлдәчнр чинртә төрмүдәр тоолврарн хувалцхмн. Бас нег сонҗлтта йовдл: XII Пандитин Хамбо-лам Даши-Доржо Этигэловин әрүн үүлдврин болн бурхн болсн цагтан тер кевәрн цогцан хадһлсн өвәрц йовдлын туск шинҗллтәрн болн тоолврарн номтнр болн шаҗна үүлдәчнр хувалцхнь йир соньн болхмн. Шаҗна ик цолта болн гүн медрлтә үүлдәчнр тиим өвәрц хүврлт күцәҗ чаддгнь ода күртл хаһлгдад угань нуувч болҗана. Бурхн Багшин номиг цәәлһҗ тархадг, эн номиг әмтнд дасхҗах, гүн номин шинҗллт кеҗәх номтнр болн үүлдәчнр нарт-делкән эн хургт олн төрәр цәәлһвр авхнь маһд уга.

УШКАНА Сувсн

Видео