Һазр тәклһнә йосрхл

20-06-2023, 09:20 | Общество

Мөчн сарин 18-д Һанц модна өөр шаҗна йосрхл күцәгдв. Җил болһн энд кегддг һазр тәклһнә мөргүл болснд олн-әмтн цуглрҗ ирв. Үрс Сарин цагла эн әрүн үүлдвриг күцәлһн сән авъяст тохрв.

Бурхн Багшин Алтн сүмин ах залач Йонтен гелңгин цәәлһсәр, һазр тәклһн гисн һазр-усна эзн болҗадг сәкүсн бурхдт зальврҗ, бәрц бәрҗ, мөргүл кедг шаҗна йосрхл болҗана. «Сангсо» гидг нертәһәр шаҗна эн йосрхлыг цугтад әрүн болдг Һанц модна өөр Үрс Сарла кенә. Эн шаҗна йосрхлын күчн цугтад ик туста болна.
Эн мөргүлин йовудт цуг бурхдт болн бодь садт, һазр-усна олн сәкүснд цуг әмтә тоотын ханлт медүлгдҗ бәрц бәргднә, Һазр деер эвин бәәдлд бәәх, дән-даҗг бичә үзгдтхә, гиҗ мөргүлд ирсн әмтн гелңгүдиг дахҗ зальврна. Буйн-кишгән хураҗ авад, эрүлменд, кен-негнд тусан күргҗ бәәдг седкләр әмтнә чееҗиг эн мөргүл дүүргнә.
Үрс Сарин евәлд багтҗ, җил болһн кегддг һазр тәклһнә мөргүлд орлцад, әмтн седкл төвкнүн хәрв.

УШКАНА Сувсн

Видео