Әрәсән ачта донормудыг ачлв

20-06-2023, 09:25 | Общество

Эврә сән дурар цусан өгдг улсин нарт-делкән Өдрлә донормудт ханлтан өргҗ, эднә ач-тус темдглҗ эднлә харһлт бүрдәлһн сән авъяст орв. Шидр цус гүүлгдг таңһчин төвд дөчн һар дәкҗ цусан өгсн улст «Әрәсән ачта донор» гидг темдг бәрүлҗ өггдв. Эдн Лаганя, Сарпан, Баһ Дөрвдә, Яшкулин болн Целинн райодт болн Элст балһснд бәәдг улс болна.

Ачта донорин нер зүүсн улс дунд олн зүсн эрдмәр көдлҗәх улс бәәнә, цуһар эдн олн җилин туршарт эврә дурар цусан өгч кесг күүнд күнд гемәс эдгхд туслв. Василий Лодянов нәәмн җил хооран төвин көдләчнрт КВН-а марһанд белдхд дөңгән күргхәр ирәд, түрүн болҗ цусан өгсмн. Эн җилмүдин эргцд төвин көдләчнрлә үр-иньгүд болад, донормудын зергләнд орв. Энүнә үлгүрәр үүрмүднь бас цусан өгдг болв. Келхд, залу күн чик авг-бәрцәр бәәҗ, цогц-махмудан батрулҗ, эрүл-мендин бәәдлән дару-дарунь шинҗлнә. Таңһчин спортын министерствин әңгин һардач Онкура Баатр оютн бәәсн цагтан цусан өгдг болв. Энүнә тоолврар, цусан өгхәс әәхмн биш, энтн эрүл-мендд туста болна. Донормудын то икдхлә, кесг күүнә әм аврҗ дарунь дөң күргҗ болхмн гиҗ эн темдглв. Тактина Алла авалиннь ормд ачта донорин темдг авхар ирв. Олн үртә залу күн олн җилдән бас цусан өгчәнә. Эн өдрмүдт авальнь шишлң цергә керг-үүлдврт орлцхар һарч йовхмн.
Цус гүүлгдг таңһчин төвин ах эмчин дарук Бадмин Рада ачта нер зүүсн донормудыг йөрәһәд, бат эрүл-менд дурдв. Энүнә келсәр, мана таңһчд җил болһн һучн шаху күн эн темдгәр ачлгдна. Ода деерән таңһчд 10 миңһн донор бәәнә, теднәснь миңһн һар күн «Әрәсән ачта донор» гидг нер зүүнә. «Эврә сән дурар цусан өгдг улсин ач-тус темдгллһн сән авъяст тохрв. Тадн күнд болн бачм бәәдлд туссн улст дөңгән күргҗ, түрүн дуудврар цусан өгч әмтнә әм аврхар шуннат. Бидн күн болһнд ханлтан өргҗ, тана седвәр болн буйнч седкл олнд үлгүр болх зөвтә гиҗ тоолҗанавидн. Сүл цагт арһлачнр цусан өгдг улсиг дөңнҗ белг бәрүлҗ өгдг болв, бидн эднд бас ханлтан өргҗәнәвидн», – гиҗ Бадмин Рада келв.

БАТАН Наталья
ЗУРГТ: «Әрәсән ачта донор» гидг темдгәр ачлгдсн улс

Видео