Эн җил сән төл авгдв

20-06-2023, 09:30 | Общество

Таңһчин эдл-ахуст 2023-ч җилин төл авлһна дааврта кем төгсв. Өдгә цагт энүнә ашнь диглгдҗәнә. Чинртә эн көдлмшиг малчнр сән аштаһар давулв гиҗ келх кергтә. Нидн намрар Хальмг Таңһчин селәнә эдл-ахун министерствин зәңглсәр, АПК-н халхиг делгрүллһнә көтлврәр кесг малчнр болн фермермүд шаңһа дөңгиг олзлсмн. Шишлң дөң үкр, хө, мөр болн тохма мал өсклһнд йилһгдлә.

Мана таңһчд тәвн зурһан бүрдәцд хальмг тохма мал өскнә. Тер тоод бод мал өсклһнә хөрн хойр бүрдәц, тохма хө өсклһнә хөрн хойр бүрдәц, хальмг тохма мөр өсклһнә долан бүрдәц, темә өсклһнә тохма эдл-аху көдлҗәнә.
Таңһчин райодын зәрм эдл-ахуст төл авлһна кем эрт эклв. Эн җилин зураһар цуг эдл-ахуст 100 үкрәс 85 туһл, 100 хөөнәс болхла 95 хурһ авхар зуралҗала. Хөд ик зуудан мөрн сард хурһлв. Сән төл авхин төлә цуг таал тогтагдсн билә. Темдглхәс, чинәнь дор орсн малыг зәрм ормар бордад, шимтә өвсәр теткәд, төл авлһна кемиг сән йовудтаһар күцәсмн.
Хальмг Таңһчин селәнә эдл-ахун министрин үүлиг цаг зуур дааҗадг Тимур Гаваевин зәңглсәр, эн җилин төл авлһна көдлмш цуг райодын эдл-ахуст күцәгдв: 212,8 миңһн һар үкр туһлв, болн 1208,6 миңһн хөн хурһлв. Теднәс 181,3 миңһн туһл болн 1209,8 миңһн хурһн авгдв. Төл авлһна кемин ашар Ик Буурла болн Яшкулин райод нүүрт һарв. Салу эдл-ахус авад хәләхлә Приютна района «Уралан» агрофирмд» туһлмудын хамгин ик төл авгдв, Яшкулин района «Улан хөөч» АО ПЗ-д хурһдын то ик болв, гиҗ темдглх кергтә. Эн эдлахуст 1768 туһл болн 19323 хурһн авгдсмн. Тер мет таңһчин эдл-ахуст 4219 унһн болн 121 ботхн авгдв. Энд Үстин район ончрсмн.
Онц темдглхәс, өдгә цагт хошт көдлдг улсин төлә кесг мөрә авдг арһ бәәнә. Эннь йир сән дөң болна. Эн җилд 1,2 миңһн селәнә эдл-ахун бүрдәц болн КФХ ут тоодан шаңһас 500 сай арслң дем авсмн. Дәкәд болхла Хальмг Таңһчин Толһач Хаска Бату АПК-н халхар көдлҗәдг фермермүдиг дөңнҗ, селәнә һазрт эднә көдлмшинь даңгин өөдәнәр үнлнә, гиҗ келх кергтә. Мал өсклһнә чинртә керг-төр таңһчин Толһачин онц бүртклһнд бәәнә.
Шидр таңһчин селәнә эдл-ахун министрин үүлиг дааҗадг Тимур Гаваев, Яшкулин района муниципальн бүрдәцин толһач Бора Эдгеев болн «Улан Хөөч» АО ПЗ-н һардач Арлтан Эрдниев эн эдл-ахун эргндк һазрт тавн миңһн толһа багтамҗта тосхгдҗадг бордлһна эдл-аху хәләв. Келхд, эн төсв шаңһа демин мөңгәр күцәгдҗәнә.

КАРСАНА Евгения

Видео