Палестинә элчнрлә хамцу үүлдврин тускар күүндвр болв

20-06-2023, 09:35 | Общество

Давсн басң өдрлә, мөчн сарин 16-д, Элстд Палестинә орн-нутгин Аль Истикляль ик сурһулин ул деер үүлдҗәдг Сергей Есенинә нертә орс келнә болн сойлын төвин һардач Наджаджра Мухаммед болн Аль Истикляль ик сурһулин һардачин дарукин нөкд Яхья Бахаа Хальмг ик сурһулин һардач Бадм Салаевла харһҗ орс кел тархалһна болн сурһуль-эрдмин салврар күцәҗәх нөкцлтән цааранднь өргҗүлхин тускар күүндвр кев. Тер тоод Палестинә Аль Истикляль ик сурһулин болн талдан чигн вузмудын нөкцлтиг делгрүлх санаһан күндтә гиичнр медүлв. Тер мет эмнлһнә, зәңгллһнә шин технологийин халхар нөкцлтән шунмһадулх күсл эдн тәвҗәнә.

Эн халхар мергҗлтнриг белдлһнә сән дамшлт Хальмг ик сурһульд хоршагдв гиҗ Бадм Салаев темдглв. То-дигин эв-арһиг делгрүллһнә төсвд Әрәсән талдан 63 вузмудын тоод Хальмг ик сурһуль орв. Эмнлһнә салврар түрүләд нег баг оютнриг сурһҗ болҗана, гиҗ Бадм Катинович заав.
Номин халхар селәнә эдл-ахун эдл-уушин чинриг өөдлүллһнә, эн салврар генетикин шинҗллт келһнә, тер мет экологин, нарт-делкән журналистикин халхар хамцу көдлмш күцәҗ болҗана гиҗ энүнә дарук Кермн Бадмаева селвгән орулв. Тер мет энүнә келсәр, цергә-сурһулин төв хальмг вузд секгдҗәнә.
Хальмг ик сурһульд һазадын орна кесг кел дасчана, тер тоод арабск кел дасч болҗана гиҗ һардачин селвгч Владимир Имеев заав. Персидск кел ода оютнр бас дасчана, түүнә төлә Иранас багшнр ирҗ цәәлһвр өгчәнә.
– Бидн бас эн туст арабск келнә багшнриг мана Аль Истикляль ик сурһуляс йовулҗ чадҗанавидн, оютнр чигн мана тана тал ирҗ орс кел болн эмчин, программистин эрдм дасх, – гиҗ Наджаджра Мухаммед селвгәрн хувалцв.
Зурһан җилин туршарт хальмг вузин багшнр Палестинә орннутг орад, Аль Истикляль ик сурһулин оютнрт орс кел яһҗ дасхсна, талдан чигн олн халхар нөкцлтснә тускар һазадын орна оютнриг белддг дацңгин һардач Любовь Староверкина келв, тер нөкцлт цааранднь чигн өргҗәд бәәх гиҗ эн иткүлв.
- Хальмг Таңһчд ирсндән ик байрта бәәнәв, түрүн болҗ зурһан җил хооран тана таңһчд ирләв. Тер йовлһн маднд йир таасгдв. Тегәд бидн ода хойрдад ирҗәнәвидн. Нөкцлтән ода цааранднь батрулхар, мана урдк бооцаг цааранднь өргҗүлҗ күцәхәр, шин көтлвр бүрдәҗ үүлдхәр санҗанавидн. Өөрхн Дорд үзгин орн-нутгудт орс кел тархалһна, нөкцлтиг өргҗүллһнә халхар бидн баһ биш керг күцәҗ чадхвидн гиҗ тоолҗанав, тер үүлдврт маднд Хальмг ик сурһулин багшнр болн номтнр дөң болад бәәх гиҗ бат иктлтә бәәнәв, – гиҗ Наджаджра Мухаммед седкүлчнрлә болсн брифингд онц темдглв.
Бидн зәңгллһнә технологийәр, эмчнриг белдлһнә, хамцу номин шинҗллтиг күцәлһнә халхар үүлдврән шунмһадулхар зуралҗанавидн. Мана Аль Истикляль ик сурһулин һардач хальмг вузин һардачла нөкцлтән өргҗүлх седклтә.
Хальмг Таңһчин һоллгч вузла болн Әрәсән кесг вузмудла мана хәрлцән хамгин өөдән кемҗәнд делгрәд йовхин кергт бидн цуг эв-арһан олзлхвидн. Тер мет Элст болн мана Аль Истикляль ик сурһуль бәәршлҗәх Иерихон балһсд хоорндк хәрлцән бас батрад бәәтхә. Тер мана седвәр эрк биш бәәдл-җирһлд тохрагдх гиҗ санҗанавидн, гиҗ күндтә гиич темдглв.
Тер мет эврәннь тоолвран Бадм Салаев бас медүлв: «Аль Истикляль ик сурһульла бидн зурһан җилдән нөкцлтән делгрүлҗәнәвидн. Тер цагин эргцд бидн эн вузд орс келнә төв секләвидн. Түүнә ул деер кесг керг-үүлдвр күцәгдлә. Мана үүрмүд Палестинә нутгт орс кел дасхлһиг цааранднь делгрүлхәр зуралҗана.
Бидн онлайн таалд оютнрин кесг олимпиад, олна нәр-наад бүрдәҗ, сән дамшлт хоршалавидн. Тиим кевәр мана нөкцлтиг цааранднь өргҗүлхин төлә бат ул бәәнә. Хамцу номин шинҗллт келһнә зураһар бидн онлайн таалд Аль Истикляль ик сурһулин һардачла селвлцә кенәвидн, тер мет эн дегц Палестинә ик сурһулин министр болҗана, тиигәд кевәр мана нөкцлт талдан вузмудла залһлдаһан батрулх арһ өгчәнә. Номин нарт-делкән баг тогтах кергтә. Цааранднь болхла бидн хамцу шинҗллтин номин төв тогталһна тускар селвлцхәр бәәнәвидн, яһад гихлә мадниг болн Палестинәс ирсн үүрмүдиг соньмсулҗадг кесг төр бәәнә, тер дотр арабск тууҗин төр мөн. Манад Палестинәс ирсн оютнр сурна, бидн сурһуль-эрдмин халхар бат нөкцлт зуралҗанавидн, тер салвр бас өсәд-өргҗәд бәәхнь лавта».

ТҮРВӘН Һуна

Видео