«Баһ наста Пушкин» бичдг билгтнриг цуглулв

20-06-2023, 09:40 | Общество

Урн үгин халхар кесг соньн шин янз экләд олзлгджана. Иигәд «Баһ наста Пушкин» («Молодой Пушкин») гидг наадмд хальмг бичәчнр орлцв.

Мөчн сарин эклцәр Москва балһснд болн Московск мүҗин 20 талвңд өвәрц керг-үүлдвр болв, - гиҗ Хальмгин баһ наста утх-зокъялчнрин ниицәнә һардач Евгения Решетникова келнә. - Әрәсәд хамгин ик гисн баһчудын урн үгин наадм «Баһ наста Пушкин» гидг нертәһәр давв. Әрәсән 35 регионас 200 һар бичәч, эн үүдәлтиг бүрдәдг улс орлцсмн. Наадмин 20 талвңд медрлән өөдлүлхд туслсн олн-зүсн лекцс болв. Олн-зүсн төрмүдәр зүткәтә күүндврмүд кеһәд, баһ наста бичәчнр нег-негнләрн таньлдв, шүлгләнә театрмудын үүлдврт орлцв. Мастер-классмудт бичлһнә болн дүрмүд бүрдәлһнә дамшлтас медҗ авв. Дегтрин яармд, «шоу-рингд», нань чигн олн тоотд бичдг баһчуд орлцҗ чадв.
«Баһ наста Пушкин» наадмд урн үгәр соньмсдг улс оларн орлцснь бас сән йовдл болв. Наадмин һол үүлдврнь ик экранд үзүлгдснь, энд болҗадг олн керг-үүлдврмүд, харһлтс болн күүндврмүд онлайн үзүлгдснь әмтнд регионмудар хәләх арһ учрв.
Наадмин медрл өөдлүлгч көтлвртнь оютнр болн ах классмудын сурһульчнр орлцв. Медрлтә номтнрин, шинҗләчнрин болн дамшлтта багшнрин һардврт тедн классическ болн өдгә цага урн үгин үүдәврмүдин учр-утхинь медҗ авв. Әрәсән бичәчнрин ниицәнә гешүд, Москван болн Санкт-Петербургин бичәчнрин ниицәст орлцачнр мастер-классмудыг һардҗ давулв. Әрәсән бичәчнрин ниицәнә баһ наста утх-зокъялчнрин ниицәнә элчнр чигн тер үүлдврәс дутсн уга. Урн үгин цуг бүрдәцс, ниицәс хамцу үүлдҗ чадхинь эннь медүлҗәнә. Әрәсән иргч иргн болх баһчудт орн-нутгин олн келн-улсин урн-үгин зөөрнь болн шин үүдәврмүднь ямаран болҗахинь медҗ авхд эн байр туслв. Мөчн сарин 4-д «төгрг ширән» сүүр болв. «Пушкин – урн-үгин орчуллһна делкә. Девшлтин хаалһ секәд» гидг нертәһәр болсн тер сүүр йир соньн болв. Әрәсән улсин герт тер сүүр бичәчнриг цуглулв. Таңһчин нерн деерәс хальмг улсин бичәч Нуура Владимир болн РФ-н олн дунд сурһулин ачта көдләч, «Улан Зала» мөрән лауреат Канкин Эрднь орлцв. Пушкинск байрла цуг улст йөрәлән нерәдҗ видеозурган эдн йовулсмн. Пушкинә шүлгүд орчулсан умшсн тер видео олн-әмтн хәләв.
Хальмг Таңһчин баһ наста утх-зокъялчнрин ниицәнә һардач, бичәчнрин нарт-делкән ниицәнә гешүн Евгения Решетникова А. С. Пушкина үүдәврмүд хальмг келнд яһҗ орчулгдсна тускар илдкл кев.
«Баһ наста Пушкин» гидг төсв кесг сардан белдгдсмн. Әрәсән кесг балһсдар урн-үгин 40 һар олн зүсн керг-үүлдврмүд давулгдхмн.
Хальмгин баһ наста литератормудын ниицән олн умшачнртан үрвр кеҗәнә.
Литературн зуульчллһн таднд соньн болхла, электрон эн хайгар soleros@rambler.ru бичтн. Эс гиҗ Көглтин Даван утх-зокъялын саңгин халхд «ДНКфест» орҗ үзтн.
Хальмгт Пушкинә нерн йир хәәртә. Орсин билгтә бичәчин үүдәвр болһнд хальмгин тускар келгдсиг умшхд даңгин байрта болна. Тегәд хальмг бичәчнр эн керг-үүлдврт орлцснь сән йовдл болҗана.

УШКАНА Сувсн

Видео