Нөкцлтин бооцан батлгдв

20-06-2023, 09:45 | Общество

Санкт-Петербургд болсн Петербургск экономическ ик хургин кемҗәнд Хальмг Таңһчин делегац орлцад, таңһчин делгрлтд туслх зөвшәлмүд талдан регионмудла болн олн халхин кесг бүрдәцслә бооца батлв.

«Иргч үйнрин төлә күчн-чидлән хамцулый» гидг дуудвртаһар болсн хург делгрлт авч иргчдән залһлда батлхд туста болхнь лавта. Хальмг Таңһчин элчнр тер хургт орлцснь нег үлү чинртә болҗана. Энд түрүн болҗ Хальмг Таңһч эврәннь экспозицан үзүлв. Таңһчд инвестиционн болн зуульчллһна халхар бәәх көрңгиг үзүлҗ, талдан һазрас нөкднр хәәҗ цуг тер тоотыг делгрүлх күсл тәвгдсмн.
Иигәд хургин түрүн өдрт Хальмгин сойлын болн зуульчллһна министерств болн Ginza Project, холдинг хоорнд нөкцлтин туск бооцан батлгдв. Эн холдинг орн-нутгин кесг регионмудт болн балһсдт отельмуд секлһнә сән дамшлтта ниицән болҗана. Һазадын орн-нутгудт чигн холдинг үүлдврән делгрүлсн бәәнә. Долан гектар аһу һазрт бәәршлх ик өдгә цага гиичлүр мана таңһчд тосхх болҗ зуралгдҗана.
«Гинза Девелопмент групп» гидг ООО-н һардач Гюнель Исмаилова эврәннь үгдән Хальмг Таңһч соньн тоотарн байн һазр болҗана, өвәрц сойлта эн һазрт зуульчллһ өргнәр делгрүлх кергтә гиҗ темдглв. Әрәсән талдан регионмудар чигн олн төсв күцәх зуран тускар келәд, Г. Исмаилова Хальмг таңһчд әмтнә тааслт олх гиичлүр тосхҗ чадх арһ маднд бәәнә гиҗ иткүлв.
Хальмгт зуульчлҗ ирҗәх әмтнә то икдүлхин төлә эн халхиг делгрүлх кергтән тускар келәд, таңһчин сойлын болн зуульчллһна министр Түрвән Саглр таңһчд өдгә цага гиичлүр тосхлһна зура белдҗәхиг темдгләд, эн туст дамшлтта болн шин хәләцтә нөкднр хәәҗәснә тускар «Ginza Project» гидг компань гиичлүр тосхлһна туст нөкднртән таасгдна. Талдан һазрас ирҗәх әмтн таңһчд сәәнәр амрад, ке-сәәхн тоотла эвтә сән таалд бәәһәд таньлдхд туста тоотыг теткхәр бәәхин тускар министр келв. Петербургск нарт-делкән экономическ хургин кемҗәнд таңһчд зуульчллһиг делгрүллһнд туслх бооцан батлҗ авгдв.

ҖИРҺЛИН Кермн

Видео