Төрскнч седклтә әмтн хамцу үүлдҗәнә

20-06-2023, 10:00 | Общество

Хальмгин көгҗмчнрин Ниицән «Зултрһн» ансамбльла хамдан Диилврин өдрт белдәд, төрскнә туск дуд шинәс сергәһәд, балһсна талвңд һарч олн-әмтнлә хамдан дуулхар белдҗәлә. Болв нәрн эн цагт әмтн олар цуглрдг керг-үүлдврмүд хооран саагдсмн.

Тегәд Германьд церглсн улсиг (ГСВГ) хамцулдг олна ниицәнлә негдәд, эдн райодар йовҗ буйнч седклин концертс кех шиидвр авсмн.
Түрүн концертнь «Родина» сойлын төвд болсмн. Терүнд олна бүрдәцс, тер тоод Улсин фронтын үүлдәчнр, чигн ирҗ орлцсмн.
Шидр эдн Хар Һазра районд одад, тенд Комсомольск селәнә сойлын герт ик концерт үзүләд, бәәрн һазрин билгтә улсла хамдан дуулад, сәәхн нәр кев. Күүнә җирһлд юн эс учрна. Ямаран чигн җаңһрта бәәдлиг гетләд җирһлән цааранднь делгрүлдг заңшал күүнд чидл өгнә. Дун кезә чигн әмтнә урмд болдгинь медәд, «Зултрһн» ансамбльд ордг медәтнр эврә билг-эрдмәрн олнд байр үүдәҗ йовна.
Комсомольск селәнд әмтн эдниг сәәнәр тосад, хамдан дуулад, билг-эрдмән үзүлв. Концертд хальмг болн орс дуд дуулгдна. Тәәз деер һарсн артистнриг дахад, залд цуглрсн әмтн цугтан дуулна. Олн җилин туршарт дуулгдҗ йовсн, олна тааслт олсн дуд тиигәд әмтиг негдүлнә. Лаганя көгҗмч болн шүлгч Увшан Иван бичсн «Хальмгтан» гидг дун Комсомольскд соңсгдҗ, төрскн һазрин частр болҗ күнкнв. «Кизләр-Әәдрхн», «Хө Өрлг хан», нань чигн тууҗин болн өдгә цага дуд, өвкнрин зөргиг болн теднә заясн герәсиг медүлҗ, соңсхгдснь басл ик урмдта болв. Төрскндән нерәдсн өдгә цага дуд чигн оларн дуулгдв. Буйнч седклин эн концертс Олег Газмановин «Вперед, Россия!» гидг дууһар төгснә. Орн-нутгин төлә амр биш эн цагиг хамдан давҗ һарх седклән медүлҗ әмтн иим концертст орлцҗана.
Олна бүрдәцсин седвәрәр болсн эн концертс Городовиковск, Яшалтан, Ик-Буурла, Хар Һазра райодт давв. Дарани тиим концерт Приютна районд болхмн. Эн седвәрин эк татачнрт болн «Зултрһн» ансамбльд районд күрхин төлә көлгн кергтә. Городовиковск болн Яшалтан райодт күрхднь «Одн» заводын һардвр көлг һарһҗ өгв. Хар Һазра района һардвр эднд автобус илгәһәд, дөң болв. Приютна района һардвр эдниг бас эврә автобусарн ирҗ авхмн. Эн буйнч үүлдврин ашт цуглрсн мөңгн СВО-д дәәлдҗ йовх цергчнрт илгәгдхмн.
Ик-Буурлд болсн төрскнч седклин эн керг-үүлдвр бүрдәмҗин сән таалд давв. СВО-н үүлдврт орлцҗ, дәәч даалһвран күцәҗәдг көвүдиг дөңнхәр района олн әмтн сойлын болн амрлһна төвд цуглрв.
Ик Буурла РМО-н толһачин дарук Олег Дандаев эн керг-үүлдврин чинринь темдгләд, чидлән хамцулад, цергә даалһвран күцәҗ йовх баһчудт дөң болхин тускар келв. Көгҗмч, шүлгч Увшан Иваниг таңһчд сән меднә. Дууһинь дурлҗ дуулна, шүлгүдинь умшна. Төрскнч седклтә эн күүнә йөрәлиг цуглрсн улс оньган өгч соңсв. Шүлгчин халуч седклин үг хамцу үүлдх, хортнла дәәлдҗәх баһчудт дөң болх әмтнә седклинь батлв. «Зултрһн» ансамбль дуулсн дуудыг цугтан дахҗ дуулв. Концертын йовудт дәәнә цага видеозурцс үзүлгдҗ, үйнрин залһлдаг улм батлв. Цергә эн керг-үүлдврт әмнәсн хаһцсн баатрмудын нерд тодлгдҗ, теднд нерәдсн шүлгүд умшгдв. Тер баатрмудын негнь Джангар Байтишов болв. Эн баатрт нерәдсн шүлгән Маргарита Китаева умшв.
ГСВГ-н туг орулгдҗ, олна эн бүрдәцин күцәгч комитетин гешүн Сергей Бадендаев (зургт) йөрәлин үг келҗ, дәәчнрт нерәдсн дуд дуулсинь әмтн оньган өгч соңсв.
Района цергә комиссариатын һардач С. Дорджиев, Ик Буурла СМО-н һардач В. Барджеев хортнла дәәлдҗ йовх баһчудт эрүл-менд дурдв. А. Пюрбеевин нертә дунд сурһулин багш Елена Базырован келсәр, сурһульчнрт төрскнч седклин сурһмҗ өгдг олн керг-үүлдвр эдн күцәнә. Цергчнрт нерәдсн бичгүд бичәд, олн-зүсн кегдлмүд кеһәд, сурһульчнр чинртә эн кергт тәвцән орулҗана.
Төрскән харсгч дәәнд әмнәсн хаһцсн баатрмудын санлд нерәдсн «Журавли» гидг дууг цугтан хамдан дуулҗ, эн керг-үүлдвр төгсв.
Буйнч седклин концертсиг «Зултрһн» ансамблин һардач, көгҗмч Борис Уджаев һардҗ давулв. Эн концертсин йовудт цуглрсн мөңгн шишлң цергә керг-үүдврт орлцҗ йовх цергчнрт эрк биш илгәхмн. Иигәд төрскнч седклтә әмтн хамцҗ үүлдҗәнә.

ХӨӨЧИН Галина

Видео