Мана дамшлтыг өөдәнәр үнлв

22-06-2023, 09:05 | Общество

Эн долан хонгин эклцәр мана таңһчур Әрәсән орн-нутгин Хүүвд «Негдсн Әрәсә» партин фракцин һардачин дарук, «Сән көдлмш – герт олз» гидг партин көтлврин зүүцүләч Андрей Исаев ирв. Партин олна дөңнлтин региональн штабд болсн харһлтд эн көтлврин медлд күцәгдҗәх «Моя карьера с «Единой Россией» гидг төсвәр ямаран кергүүлдврмүд күцәгдҗәхин тускар ил күүндвр болв. Харһлтыг Хальмг Таңһчин залврин Ахлачин дарук – таңһчин социальн делгрлтин, күч-көлснә болн көдлмшәр тетклһнә министр Өлзәтин Марина һардҗ давулв.

Күүндврт босхгдҗах төр эркн чинртә болҗахиг Андрей Константинович темдгләд, эн төсв давсн җилд Әрәсән тавн регионд түрүн болҗ күцәгдсинь зәңглв. Эн җилин туула сарас авн орн-нутгин цуг регионмудт эн төсвин керг-үүлдврмүд эклв. Мөрн сарин чилгчәр кесн то-дигәр, орн-нутгт хойр дундур миңһн керг-үүлдвр бүрдәгдв, терүнд 370 миңһн күн орлцв. Партин төсвин медлд 17 миңһн күн көдлмшәр теткгдв. Ах классмудын сурһульчнр болн оютнр эн төсвәр соньмсад, иргчдән тааста эрдмәрн күцәмҗтәһәр үүлдҗ, шин медрл хоршаҗ мергҗлтән өөдлүлх санан бәәхиг медүлв гиҗ күндтә гиич келв.
Мана таңһч эн төсвд эн җил түрүн болҗ орлцв, тегәд ода зуг 8 керг-үүлдвр давулгдв, терүнд 1251 күн орлцв, 282 күн көдлмш олҗ авв, ут тоодан 1700 күүг көдлмшәр теткхәр зуралҗанавидн гиҗ вице-премьер Өлзәтин Марина зәңглв. Дааврта һардачин келсәр, мана таңһчд көдлмшәр тетклһнә төр чинртә төрмүдин негнь болна. Таңһчин экономикд селәнә эдл-аху һоллгч зөрүллт болҗахас иштә кесгнь эврә эдл-аху бәрнә, тегәд эдн көдлмш уга улсин тоод орна. Сүл цагт олн зүсн шаңһа көтлвр батлгдсна ашт әмтн эврә керг бүрдәҗ, онц эдл-аху бәрҗ үүлдҗәнә. Үлгүрнь, һурвн җилин эргцд мана таңһчд 240 күн социальн бооца батлад, олзта-орутаһар үүлддг болв. Таңһчд көдлмшч ормин яарм давуллһн бас көдлмш олҗ авхд туслна. Тиигәд, одахн болсн яармд 59 бүрдәц болн эдл-аху орлцад, 300 көдлмшч орм бәәхиг медүлв. Гемтә-шалтгта улсин төлә бас тиим яарм давулгдна. Немр сурһуль сурч шин эрдм дасх, мергҗлтән өөдлүлх саната улст бас келн-улсин төсвин, шаңһа көтлврин медлд дөң-тус күрггднә, гиҗ министр темдглв.
Б.Б.Городовиковин нертә ик сурһулин һардач, таңһчин Улсин Хуралын (Парламентин) депутат Салан Бадм «Центр карьеры» гидг төв оютнрт эрдмәрн көдлмш олҗ авхд туслдгин тускар келҗ, эн туст хоршасн байн дамшлтарн хувалцв. Ик сурһульд үүлдҗәдг бичкдүдин сурһуль, баһ академь, дунд шишлң сурһулин дацң, бакалавриат, магистратур, аспирантур болн көдлмш олҗ авхд дөң күргдг төв бичкнәсн авн тааста эрдм шүүҗ авч, гүн медрл авхд туслна гиҗ эн һардач заав. Эднә оютнр вожатнрин, тосхачнрин отрядт орлцҗ цаг зуур көдлҗ чадна. Ик сурһулиг төгсәсн улсин ниицән, көдлмшч бүрдәцсин хүүв көдлмшәр тетклһнд бас дөңгән күргнә. Таңһчин Толһачин седвәрәр болн дөңгәр нидн секгдсн медицинск дацң бәәрн эмчнриг белдлһнд, иргчдән таңһчин эмнлһсиг эврә кадрмудар тетклһнд туслхнь маһд уга гиҗ Бадм Катинович келв.
Андрей Исаев таңһчин һоллгч вузд баһчудт тааста эрдм шүүҗ авхд, оютнриг көдлмшәр тетклһнә туст хоршасн дамшлтыг өөдәнәр үнлв. Ик сурһулин күцәмҗин тускар бийдән тодлҗ авув гиҗ Андрей Константинович темдглв. Х.Кануковин нертә педагогическ колледжин һардач Җамбин Татьяна күүндврт орлцҗ, оютнрт гүн медрл өглһнә, сән мергҗлтнриг белдлһнә, селән һазрт көдлх багшнриг гер-бүүрәр тетклһнә төр босхв.
- Би Хальмг Таңһчур түрүн болҗ ирүв. Регионмудын һардачнрин селвлцәнд таңһчин Толһач Хаска Батула харһҗ күүндсн биләв. Бату Сергеевич нанд сән дамшлтсин тускар келҗ өглә, эндр би цугинь эврән соңсад көдлмшәр тетклһнә төрт ик оньг өггдҗәхиг медүв. Баахн мергҗлтнриг көдлмшәр тетклһнә, ик сурһульмудыг дөңнлһнә дамшлтыг тодлҗ авув. Тана сән дамшлтын тускар олнд медүлх санатав. Эндр болсн күүндвр туста болв, - гиҗ Андрей Константинович харһлтыг товчлҗ келв.

ДООҖАН Наталья

Видео