Нег һазра улсан дөңнхәр

22-06-2023, 09:10 | Общество

Шишлң цергә керг-үүлдвр эклснәс авн мана орн-нутгт «Бидн хамдан» гидг дуудвртаһар буйнч седклин акц эклв. Терүнә йовудт ик-бичкн уга мана цергчнриг болн теднә өрк-бүлмүдиг дөңнхәр демән күргнә, хувц-хунр болн хот-хол цуглулна, олн зүсн керг бүрдәнә. Мана таңһчин әмтн эн буйнч седклин керг-үүлдврт бас шунмһаһар орлцҗ, цергә даалһвр күцәҗ йовх нег һазра улсиг дөңннә. Төрскн һазрас ирсн дөң болн халун менд мана цергчнрт ик омг өгнә.

Городовиковск района әмтнә социальн теткврин төвин һардач Любовь Хавлякован келсәр, бәәрн әмтн Төрскән харсачнрт болн гертнь үлдсн өөрхн улстнь килмҗән тусхаҗ, түрүн сурврарнь дөңгән күргхәр адһна. Эндр эн районас һучн шаху күн цергә даалһвр күцәҗ йовна, күн болһн олна оньгт бәәнә. Кен-негнь амрлһнд хәрҗ ирхлә, цергчнрт ямаран дөң кергтә болҗахиг медҗ авна. Үлгүрнь, үвлин цагт мана цергчнрт беш кергтә болв. Виноградное селәнд бәәдг Виталий Джамбинов кергтә турва хулдҗ авад, бийнь беш кев. Эн эрдмәрн һаңнач болна, тегәд һартан эвтә залу күн 10 беш кеҗ цергчнрт илгәв. Бәрлдәнә хөөн учрсн завсрт цергчнр бешин өөр сууҗ, дулан таалд амрсн деерән хот халулҗ, хувцан хагсаҗ чадв. Эднә тускар ухалад, эднд эврә һарарн беш кеснд цергчнр Виталий Николаевичд ик ханлтан өргҗ халун менд илгәв.
Цергә даалһвр күцәхин төлә «Нива» тамһта машин, хортн альд бәәхиг шинҗлҗ деерәс хәләдг кергсл (дрон) бас керглгдв. Тегәд нег һазра улс демән күргәд, цергчнрин төр хаһлв. Социальн теткврин комплексн төвин көдләчнр, эднә хәләврт бәәдг медәтнр чадсарн демән күргҗ, кергтә мөңг цуглулхд бас орлцна. Эдн ут тоодан гиигн көлг хулдҗ авхд 50 миңһн арслң цуглулв, дрон хулдҗ авхд бас 50 миңһн арслңга демән орулв. Бәәрн арһлачнр, күч-көлсч бүрдәцс, фермермүд, келн-улсин ниицәс олна кергт шунмһаһар орлцдгиг Любовь Хапуровна темдглв. Виноградное селәнд түрг келн-улс олар бәәнә, эдн цергчнрт 90 миңһн арслң цуглулв. Шидр медәтнр Валентина Шрамко болн Виктор Березовский 1 миңһәд арслң, Антонина Хохлова 3 миңһн арслң авч ирв. Арһлач Олег Лиджиев 20 миңһн арслңга дем күргв, терүг махна зүүтә хот-хол хулдҗ авхд олзлв.
Цергчнрин өрк-бүлмүдиг дөңнҗ, эдниг үүмүлҗәх төрмүд хаһлҗ, гер-бүүрин олн зүсн керг күцәхд килмҗән тусханавидн, гиҗ КЦСОН-а һардач келв. Нег үлү эк-эцкнь медәтә улс болхла, герин һаза хог-бог хурах, һарудт дөң болх, ясвр кех кергтә болна. Дәкәд сән өдрин байрла цергчнрин өрк-бүлмүдт хот-хол күргҗ өгнә.
- «Бидн хамдан» болн «Цугнь Диилврин төлә» гидг буйнч седклин керг-үүлдврмүд олн-әмтиг хамцулҗ, цергә даалһвр күцәҗ йовх мана нег һазра улсиг болн эднә өрк-бүлмүдиг күнд цагла дөңнҗ, омг өгхд туслна. Мана района әмтн цаһан седкләсн эн кергт орлцна. Бичкдүд цергчнрт бичг бичҗ, бүлән үгәрн тедниг урмдулна. Мана төвин социальн көдләчнрин хәләврт бәәдг медәтнр дулан хувц өлгнә, пенсәсн демән күргнә, шикр-балта хулдҗ авч ирнә. Районд цергчнрт оньган эс тусхасн күн уга гиҗ келҗ болхмн. Сән дурар үүлддг улс цергчнрин өрк-бүлмүдт дөңгән күргнә. Олна дөңгәр ямаран чигн төр хаһлҗ болхмн. Эндрк амр биш цагла цуһар ниитә болн хамдан бәәх кергтә, – гиҗ Любовь Хапуровна келв.

ДООҖАН Наталья
ЗУРГТ: Виноградное селәнд бәәдг Виталий Джамбинов

Видео