Үлгүр болгч Дорджиевихн

22-06-2023, 09:40 | Общество

Олн җилдән ни-негн бәәҗ, үрдән өскҗ, чик хаалһд орулҗ, олнд үлгүр болгч Геннадий болн Раиса Дорджиевихнә өрк-бүл урдк җилд «Дурна болн итклин төлә» медаляр ачлгдсн билә. Эн өрк-бүл Целинн района Троицкое селәнд бәәнә. Ода эднлә умшачнран таньлдулхар бәәнәвидн.

Герин эзн, дамшлтта электрик Геннадий Карташевичиг Троицкое селәнд меддго күн уга болх, гиҗ келҗ болна. Тер юңгад гихлә олн җилдән эн района төв селәнә болн поселкудын олн герт герл орулсн болдг. Күч-көлснә 42 җилин туршарт кедү суңһуг болн шам эн тәвсинь тоолҗ болшго. Дорҗин Геннадий күч-көлснә хаалһан Троицкое селәнд 39-ч тойгта ПМК-д эклв. Тенд олн җилдән, үнн-чик седклтәһәр көдләд, хамдан көдлҗ йовсн улс дунд күндллһ болн тоомср олҗ, кесг күндллһнә темдгүдәр ачлгдсн болдг. Ачта амрлһндан һархларн, даңгин көдлдг күн гертән сууҗ чадлго Целинн района эмнлһнд орҗ тенд кесгтән көдлв.
Авальнь Раиса Борисовнан дамшлтта замач, урднь Троицкое селәнә бәәрн улс болн гиичнр дунд тааслт олсн «Булһн» нертә хотлврт көдлсмн. Энүнә кесн зүсн-зүүл хотыг нег һазра улс ода күртл тодлна. Федеральн хаалһар аца зөөдг җолачнр Дорҗин Раисан чансн шимтә хот нег дәкҗ амсад, хәрү эн хаалһар хәрҗ йовхларн дәкнәс нааран ордмн. Хөөннь дамшлтта замач «Родина» нертә колхозд көдләд, көдлмшчнриг шимтә, әмтәхн хотарн тоосмн. Раиса Борисовна хөрн шаху җилдән замачар көдлҗ йовсмн. Теткврт һарад, Дорҗин Раиса тааста нег эрдмдән седклән өгв. Эн герин хашадан болн гер дотран цецгүд урһахдан дурта. Дорджиевихнә һаза чигн, гертнь чигн каңнсн үнртә, ке-сәәхн цецгүд үзҗ болна. Күүкд күүнә чинр – аһу болн дааврта гиҗ келхлә буру болшго. Өрк-бүлин бәәдл-җирһлд ямаран чигн йовдл учрна. Болв герин һулмтын хадһлач эн туст чик шиидвр авхинь, арһинь олхинь меднә. Раиса Борисовна эн үгмүдлә мел ирлцҗәнә, гиҗ темдглх кергтә.
Геннадий Карташевич болн Раиса Борисовна нег-негән бичкнәсн авн меднә. Эдн Троицкое селәнд района техническ станцин өөр бәәдг билә. Бичкнәсн авн нег уульнцд өсч, баһ цагасн авн үүрлҗ, хөөннь нег-негндән дуран өгәд, 1975-ч җилд өрк-бүлән өндәлһсн болдг. Удл уга Дорджиевихн алтн хүрмән темдглхмн.
Ниитә өрк-бүлд һурвн көвүн болн нег күүкн өсв. Ууһн үрн Җаңһр болн Эльза күүкнь эцкиннь үлгүрәр Троицкое селәнә РЭС-т, Виталий Вадим хойр болхла тосхлтын халхар көдлнә. Җаңһр бичкнәсн авн эцкән дахад, гермүдт герл яһҗ орулдгинь медҗ авсмн. Өдгә цагт Җаңһр ах мастерар, Эльза күүкнь РЭС-т инженер болҗ көдлнә. Эн района электрическ сетьмүдин ясвриг болн ирлцңгү кергслин көдлмшиг бүрткнә. Эн бас эцкиннь көдлмшиг бичкнәсн авн үзҗ, олн-әмтнд туста болхар РЭС-т көдлхәр шиидв.
Эндр Геннадий болн Раиса Дорджиевихн ачнр-зеенрәрн бахмҗ кенә. Амрлһна болн байрин өдрмүдт Дорджиевихнә ик, өнр-өсклң өрк-бүл хамдан цуглрад, төгрг ширә эргәд, ээҗин чансн шимтә хот эдлҗ, үрднь, ачнр-зеенрнь күцәмҗсиннь тускар келҗ өгнә. Алтана болн Алина ачнрнь ик сурһуль төгсәһәд, багшар көдлнә. Милана ач күүкнь ветеринар болна. Келхд, өдгә цагт Баатр җич цуһараднь байр үүдәнә, цугтан энүг өкәрләд, наадна.
Геннадий Карташевич болн Раиса Борисовна хойр иим ниитә өрк-бүл болсн учрнь юундв, гиҗ үүрмүднь сурцхана. Хамгин түрүнд нег-негән соңсҗ, тевчҗ, ямр чигн кергиг хамдан күцәҗ кехлә ниитә өрк-бүл болдг, гиҗ Дорджиевихн хәрү өгнә. Дөрвн үрнь, арвн негн ач-зень эк-эцкәсн, аав-ээҗәсн даңгин үлгүр авч өссмн. Эдн тәвн шаху җилдән яһҗ нег-негнәннь үгд орҗ, ниитәһәр бәәснә тускар бас даңгин соньмсад сурна. Җил ирвәс өөрхн улс болад, нег-негән дөңнәд, эм-ээмән түшлдәд йовҗ, җилмүд яһҗ давснь медгдсн уга, гиҗ Геннадий Карташевич болн Раиса Борисовна эдндән келцхәнә.
Ууһн көвүнә Эллада берин келсәр, хадм эк-эцкәсн эн үлгүр авна. Эднә бәәдл-җирһлинь үзҗ, бүлән үгнь соңсҗ, ачнр-зеенртән яһҗ дурта болдгинь даңгин үзнәвидн. Хадм экм һартан өөтә, зүсн-зүүл шимтә хот кенә, герән сәәхрүләд цецгүд урһана, би болхла эрк биш энүнәс үлгүр авх зөвтәв. Хадм эцкм бас түрүн өдрәс авн намаг ямр чигн кергт дөңнв. Би иим ниитә өрк-бүлд орсндан даңгин хөвдән ханнав, гиҗ бернь темдглв.
Нидн җилд «Дурна болн итклин төлә» медаляр Дорджиевихнә өрк-бүл ачлгдх гисн зәңг һархлань үүрмүднь, хамдан көдлҗ йовсн улс, өөрхн элгн-саднь, нег һазра улс, үрднь болн ачнр-зеенрнь йир байрлв. Отхн Эльза күүкнь эк-эцкинь өөдәнәр үнлҗ темдглснд Целинн района болн Троицкое селәнә һардврт ханлтан өргв. Эльзан келсәр, эндр РЭС-ин баһ наста мергҗлтнрт урднь бүрдәцд көдлсн ах үйин улсин тускар келҗ, тедниг байрин өдрмүдт йөрәҗ, тедн үлгүр болгч мергҗлтнр бәәсинь даңгин келнә. Тер улсин тоод энүнә эцк йовхнь күүкнд омг өгнә.
Җаңһр, Виталий болн Вадим көвүдиннь келсәр, эк-эцкмдн мана һоллгч түшг, эдндән бидн даңгин ханлтта бәәнәвидн, бичкнәсн авн эднән һундашгоһар буру йовдл һарһлго өсхәр зүткләвидн. Эцкм маднд чидлтә, дааврта, йоста залус болҗ өсх зөвтәт, гиҗ заадмн. Өдгә цагт мел иим кевәр бидн эврәннь үрдән өсгхәр зүткнәвидн, гиҗ көвүд келнә.
Иим өнр-өсклң, ниитә өрк-бүлмүдин тускар соңсхла күүнә седкл байсна. Ах улсан тевчҗ, күндлҗ, бичкдүдән эрклүлҗ, чик сурһмҗ өгч, төрскн һазриннь төлә алтн үрдән өскҗ бәәхд эдн урмд өгнә.

КАРСАНА Евгения

Видео