Билгтә күүнә неринь һарһҗ

22-06-2023, 10:10 | Общество

Һарин хурһднь алтн, һартан өөтә, ик билгтә күн, гиҗ Ик Буурлд бәәдг Светлана Муеван (зургт) тускар нег һазра улснь, таньл-үзлнь чигн келдгнь мел үнн бәәҗ. Яһад медвч гихлә, шидр көдлмшин халхар Ик Буурла районд одсн саамдан дигтә эн билгтин шишлң һәәхүл секгдснлә харһад бәәвв. Района сойлын төвд эн билгтин кегдлмүдиг, тер дотр ке-сәәхн олн зүсн өңгтә тасмар хатхсн цецгүдиг, үзм цацу һәәхмҗтә тоотд авлгдҗ, йосндан бахтнач! Нег саамд зургудтнь хатхсн цецгүднь мел йоста болҗ медгдв, һаза сад-һарудт урһҗадгас юуһарн чигн йилһрҗәдго гиҗ санад, тедү мет лавтаһар яһж хатхҗ болхий гиҗ итклго өөрдәд шитлҗ хәләсмн тер. Акад юмн,әмд күн ю эс кеҗ чадна, нег үлү һартан урн күн хурһнаннь үзүрәр чигн олн зүсн кегдлмүд кеҗ эс һарһна биший, хәрнь, тегәд чигн альхна хазн чилдго гиҗ кезәнә басл хара бишәр келгдсн болдг гиҗ сангдв.

- Мөчн сарин 12-т Әрәсән Өдр темдглсн байрла ирлцҗ “Әрәсәг билгтә улс кеерүлнә” гидг нерәдлһтә һәәхүл сексн биләвидн. Хальмг Таңһчин Келн-улсин музейин О.Х.Кикеевин нертә әңгин болн мана сойлын төвин көдләчнр энүг белдҗ бүрдәв. Мана селәнд бәәдг һартан урн Светлана Муеван хатхсн ке-сәәхн зургуднь геринь кеерүлҗәхинь медсн учрар шишлң һәәхүлин йовудт үүдәврмүдинь олна оньгт тусхах седкл үүдв. Тегәд мана үрврәр Светлана Нимгировна гертән хадһлгдҗасн эврә кегдлмүдән иигәрән авч ирәд, олнд үзүлҗәнә, - гиҗ намаг алң болҗ ик соньмслттаһар һәәхүлиг хәләҗәсинь үзсн Ик Буурла района сойлын төвин һардач Нина Аджадыкова цәәлһвр өгв.
Зургудас нань энд һарсн өдрмүдт белглдг открыткс,күүкд улсин болн бичкдүдин төлә зүсн-зүүл даальңгуд, ке-сәәхн өңгтә кизәрәр уйсн көнҗлмүд, орн деер делгдг кевсмүд,чачрмуд кен-негнәннь нүднә хуҗр хаңһаҗ седклинь йосндан үүмүлв яһв!.. Келхд, нанла харһад күүндсн Светлана Муеван үгәр, бийиннь күүкднь чигн экиннь үлгүрәр һартан харһсан кеҗ чаддг болна,юм уйдг-юм өлгдг чигн арһта улс мөн. Күүкдән мордулхларн экнь ор-деринь бас эврән уйҗ белглсн бәәҗ. Һәәхүлд үзүлгдҗәдг өдгә цага кев-янзар уйгдсн бичкдүдин нег даальң һартан авч,шилтәд хәләҗәхим үзчкәд, - энүгитн шалврин шүрүн эдин кизәрмүдәр уяд ач күүкндән белглләв, ода болхла эн, даальңгм һәәхүлд хулдчквзач гиһәд намаг ээрәд, урдаснь саглад бәәнә, - гиҗ билгт инән бәәҗ келв.
Светлана Нимгировна сүл кесг җилмүдт районд болдг олна цуг кергүүлдврмүдт орлцҗ,һәәхүлмүдт эврә кегдлмүдән үзүлнә, Күндллһнә кесг һашгудар,дипломсар ачлгдсн мөн.Зуг иим өөдән билгтә күн таңһчд болдг урн һарин һәәхүлмүдт эс орлцдгнь нанд өврмҗтә болв. Кеҗ-һарһсн ке-сәәхн кегдлмүдинь таңһчин улс бәәтхә нам сүл цагт энд- тендәс олар ирҗәдг зуульчнр чигн үзҗ һәәхҗ чадх бәәсмн гиҗ сангдв.
Бийнь Светлана Муева насни турштан селәнә эдл-ахун халхар көдлв, хәрнь, өрк-бүләрн Ик Буурлд нүүҗ ирхәсн урд эврә райондан Светлый нертә селәнә Советд тоочар үүлдҗ йовсмн.Әрәсән Федерацин күч-көлснә ветеран ода ачта амрлһндан бәәнә, тегәд сул цагтан дурта кергән күцәх таал учрснь медәтиг йосндан байрлулҗана.
Ик Буурла района ачта иргн Лидия Васильевна Полтавская бас урн һарта күн болад,олн зүсн хатхмр кеерүләр эврәксән соньмсулҗ, кен-негнднь байр-бахмҗ үүдәнә. Эн бас бәәрн улсла хамдан һәәхүлд ирҗ, нег һазра үрэрдмчин кегдлмүдиг һәәхҗ, Светлана Нимгировнад цааранднь чигн района сойлын делгрлтд тәвцән орулҗ, байн дамшлтарн дорас өсч йовдг үйнрлә хувалцҗ байрта-бахта бәәхинь дурдв. Ик Буурла района муниципальн бүрдәцин толһач Вячеслав Бадмаев болхла Светлана Муеваг шишлң һәәхүл бүрдәсн йовдлла халун зүркнәсн йөрәһәд,Ханлтын бичг болн белгән бәрүлснь басл кеермҗтә болв.

ШАГҖИН Любовь
Түүрвәчин цоксн зург

Видео