Күн болх баһасн...

24-06-2023, 09:10 | Общество

Эндр мана орн-нутгт баһчудын сән Өдр темдглгдҗәнә. Эн сән өдр тууҗан Советин Союзин цагас авн эклнә. Урднь баһчудын Өдриг мөчн сарин 27-д темдглдг билә, одахн болхла Әрәсән Президент Владимир Путинә зәрлгәр эн байрин өдр гиҗ мөчн сарин сүл бемб өдриг батлв.

Күн болх баһасн, күлг болх унһнасн гиҗ хара келчксн үлгүр биш. Баһ болн дүүвр насн күн болһна җирһлд онц орман эзлнә. Мел эн саамд баһчуд сурһулян төгсәҗ, кергтә эрдмән олҗ, күч-көлснә хаалһан эклҗ, өркбүлән өндәлһнә. Эндрк сурһульчнр, оютнр, баахн арһлачнр, номтнр чигн Әрәсән өөрхн иргчин делгрлтин төлә тәвцән орулҗ йовна. Өдгә цагт Әрәсәд 14-әс авн 35 нас күрсн дөчн сай шаху баһ наста улс бәәнә. Баһчудын хәләциг, ухан-тоолвриг оньгтан авхин туст шишлң көтлвр үүлдҗәнә. Тер мет орн-нутг баахн өрк-бүлмүдиг дөңнхин туст олн зүсн эв-арһс күцәнә. Баһчуд гүн медрлтә болтха гиһәд дунд болн ик сурһуль сурхин төлә бас цуг таал тогтагдсн бәәнә. Тиим кевәр 2018-ч җиләс авн Әрәсән Президент Владимир Путинә седвәрәр «Әрәсә – олн эварһта орн-нутг» нертә шишлң төсв бүрдәгдәд күцәгдҗәнә. Эн төсв баһчудын социальн болн сурһуль-эрдмин халхар орн-нутгар бүрдәгдсн цуг төсвсиг негдүлсн болдг. Баһ наста күн болһнд эврәннь эрдмән, билгән, кергән бәәдл-җирһлд тохралһн төсвсин һол күслнь болна. Тер мет сүл җилмүдт баһчудын дунд волонтермудын җисән делгрлт авчана. Эдн олн соньн керг-үүлдвр бүрдәҗ, дамшлтарн хувалцҗ, төрскнч седклтә улс болҗ өсхәр шунна. Терүнәс нань Әрәсәд баахн өрк-бүлмүдиг дөңнхин туст шишлң көтлвр үүлдҗәнә. Эднә төлә патьр эс гиҗ гер хулдҗ авлһнд дөң күрггднә. «Баахн өрк-бүл» нертә марһан бас давулгдна. Дәкәд болхла таңһчин бүрдәцсин һардачнр көдлмшт нурһлҗдан баһ наста мергҗлтнриг авхар седнә, гиҗ келх кергтә.
Эндр Элст балһснд баһчудын Өдрт нерәдсн кесг керг-үүлдвр давулгдҗана. Энүг Хальмг Таңһчин баһчудын кергүдәр үүлддг агентств болн таңһчин баһчудын төв бүрдәсн болдг.
Арвн хойр часас авн Диилврин талвңд, «Иньгллт» паркд болн билг-эрдмин бичкдүдин Герт «Двигайся навстречу» нертә наадмин йовудт «Баһчудын парламентаризм», «Сойл», «Спорт», «Арһлачин керг» болн нань чигн талвңгуд көдлҗәнә.
Терүнәс нань эндр Цугәрәсән олимпийск Өдрин йовудт Элстин нәәмдгч микрорайонд «Восточный» стадионд спортивн керг-үүлдврмүд бас давҗана. Стритболар, мини-футболар, волейболар, гиигн атлетикәр болн талдан чигн марһас давулгдҗана. Асхн долан часла Элстин Диилврин талвңд таңһчин болн гиичнрин сойлын коллективсин орлцлһтаһар байрин концерт болхмн.

КАРСАНА Евгения

Видео