Йиртмҗин зөөр өөрхн болв

24-06-2023, 09:35 | Общество

Зуна сәәхн цаг ирв. Бичкдүд теңгсин көвәд болн ө-шуһу модта һазрт, энд таңһчд эс гиҗ талдан регионмудт одҗ амрна. Кесгнь болхла Элст балһснд болн райодт сурһульмудын уд деер үүлддг зуна лагерьмүдт цаган сергмҗтәһәр давулҗ байрлна. Үлгүрнь, Элстин 23-ч тойгта сурһулин лагерьт амрлһна төлә цуг таал тогтагдсн бәәнә.

Энүнә тускар маднд сурһулин һардачин дарук Наталья Николаевна Братышева келҗ өгв.
- Мана школын лагерь җил болһн секгднә. Эн зунар нааран 1- 5-ч классин 250 сурһульч орҗана, 10 отряд эдн тогтана. Мана «БЭМ» гидг нертә волонтермудын отрядын ах классин сурһульчнр сурһмҗлачнрла хамдан соньн кесг керг-үүлдвр бүрдәнә. Сурһулин замачнр бичкдүдт шимтә, сенр халун хот-хол белднә, - гиҗ Наталья Николаевна келҗ өгв.
Бичкдүд лагерьт амрхдан дурта. Үлгүрнь, одахн энд хаалһин җисәнә зокалын шишлң өдр бүрдәгдв. Өрүнәс авн күүкд-көвүд «Әәмшг уга орн-нутгар зуульчлһн» гидг соньн квест-нааднд орлцв. «Цуг багмуд өгсн даалһвриг болн олн зүсн уха-чидл сөрлһиг күцәв, эднд вожатнр болн сурһмҗлачнр чигн дөң болв. Тиим кевәр сурһульчнр хаалһар әәмшг угаһар йовлһна зокалын тускар медрлән байҗав. Үдин хөөн отряд болһн хаалһин зокалар наад тәвәд, хоршасн дамшлтан үзүлв. Тиим кевәр эн өдр ик тустаһар давв»,- гиҗ лагерин һардач Светлана Кумаевна Дармаева келҗ өгв.
Дарук өдрнь шогта-инәдтә нәрнааднд нерәдгдв. «Олн зүсн ахр шог келәд, наад тәвәд, шуугата, сергмҗтә өдр болв. Маднд йир таасгдв, яһад гихлә бидн артистнр мет тәәз деер һарад, бийән яһҗ бәрхин тускар медҗ авнавидн, тернь маднд цааранднь бас туста болх», -гиҗ 5-ч отрядын гешүн Марк Самтонов келнә.
Эн өдр көвүд- күүкд шогта, инәдтә йовдлд нерәдсн КВН-д, наад тәвлһнд чигн орлцв, актерин эрдмин нуувчиг кен сәәнәр меднә гиҗ хоорндан дөрлдв. Бас тер өдр эдн нарт-делкәд түрүн күүкд күн-космонавт Валентина Терешковад нерәдсн флешмобд орлцв.
Әрәсән өдрт нерәдсн керг-үүлдврин йовудт отрядмуд бас нег соньн квест-нааднд орлцв. 10 станцд эдн медрлән сөрҗ үзв. Эдн орс туульс, үлгүрмүд тодлад, олн улсин наад наадад, мана төрскн орн-нутгт нерәдсн сәәхн дуд дуулв.
- Эн керг-үүлдврин чилгчәр көвүдкүүкд Әрәсән туск фильм хәләв. Дәкәд эдн кесг кружокудин кичәлин йовудт олн зүн кегдл, Әрәсәд нерәдсн зургуд зурад, «Эврә нутган мед, түүнд седклән өг» гидг нертә үүдәлтин хора секв. Тиим керг-үүлдвр төрскнч сән сурһмҗ өглһнд туслна, - гиҗ сурһмҗлач Заяна Александровна Сухаева цәәлһв.
Тиим соньн кевәр болн ик тустаһар 23-ч сурһулин бичкдүд цаган давулна. Удл уга эдн Келн-улсин музейд одад ховр аңгудла болн урһмлла таньлдх, тер керг-үүлдвр «Улан дегтр» гидг төсвин кемҗәнд күцәгдҗәнә. Тиим кевәр бичкдүд мана таңһчин йиртмҗин туск кест соньн тоотыг медҗ авна. Тер мет билг-эрдмән яһҗ делгрүлхин тускар эднд сурһмҗлачнр цәәлһвр өгх, шин нааднд эдниг орлцулх. Бичкдүдин зуна амрлһн байрта-сергмҗтә болтха!

ТҮРВӘН Һуна

Видео