Көдлмш олҗ авхд туслхар

27-06-2023, 09:05 | Общество

Шидр Элст балһснд «Әрәсән көдлмш. Эв арһин цаг» гидг көдлмшәр тетклһнә Цугәрәсән яарм болв. Эн җил Әрәсән правительствин Ахлачин дарук Татьяна Голикован даалһврар «Демографь» гидг келн-улсин төсвин медлд эн керг-үүлдвр түрүн болҗ орн-нутгин цуг регионмудт бүрдәгдв. Терүнд көдлмш хәәҗәх улс болн көдләчнр керглгдҗәх бүрдәцс орлцв. Яарм эн җил хойр девсңгәр бүрдәгдв. Тиигәд, түрүн девсңгнь региональн чинртә бәәсмн, мана таңһчд тер мөрн сарин 14-д болсн билә. Федеральн девсңгнь мөчн сарин 23-д онлайн болн офлайн кевәр цуг регионмудт, тер тоод мана таңһчд давулгдв. «Көдлмш Әрәсәд» гидг шаңһа порталд шишлң халх бүрдәгдв, терүнд күн болһн бийдән тааста эрдмәрн көдлмш олҗ чадв.

Хальмг Таңһчин социальн делгрлтин, күч-көлснә болн көдлмшәр тетклһнә министерств көдлмшч ормсин яармин бүрдәһәчнь болв. Урдаснь вице-премьер, таңһчин социальн делгрлтин министр Өлзәтин Маринан һардврт көдлмшч баг тогтагдв, терүнә ханьд таңһчин бүрдәцсин, профсоюзин җисәнә, күцәгч йосна органмудын, ик болн дунд шишлң сурһуль-эрдмин бүрдәцсин элчнр орв. Яарм хойр талвңд давулгдв, тиигәд «Негдсн Әрәсә» партин олна дөңнлтин региональн штабин болн «Мини керг» төвин улд таңһчин бүрдәцс көдлмшч ормсин тускар келв, эврә керг бүрдәлһнә туст сүв-селвг өгв. Тер мет райодын әмтиг көдлмшәр тетклһнә цергллтин улд бас көдлмшч ормсин яарм болв. Хаврар болсн яармд орлцсн таңһчин нүүрлгч бүрдәцс болн эдл-ахус хойрдгч девсңд бас орлцв. Тиигәд, таңһчин селәнә эдл-ахун, жилищн-коммунальн болн хаалһин эдл-ахусин, сурһуль-эрдмин, эрүлменд харлһна бүрдәцсин элчнр көдлмш хәәҗәх улсла харһв. Эндр мана таңһчд 30 бүрдәц 150 көдлмшч ормд көдләчнриг авхдан белн бәәнә. Эдн дунд «Одн» завод, «Уралан» болн «Агроресурс» ниицәс, «ГЗХ» МБУ болн нань чигн бүрдәцс бәәнә, эдн үүлдвриннь тускар келҗ өгәд, көдләчнрин төлә ямаран таал бүрдәгдсиг, җалвин кемҗән ямаран болдгиг цәәлһв.
Темдглхәс, федеральн девсңгин йовудт «Ярмарка вакансий онлайн» гидг талвң үүлдв. Тегәд таңһчин әмтн Ростовск мүҗин бүрдәцслә онлайн кевәр болсн залһлдана эв-арһар көдлмшч ормсин тускар медҗ чадв. Ростовск мүҗин 30 бүрдәцин элчнр «Ростсельмаш», «Десятый подшипниковый завод», «Желдорреммаш» гидг ниицәст көдлмшч эрдмтә улс керглгдҗәхин тускар хувалцв.
Хальмг Таңһчин залврин Ахлачин дарук– таңһчин социальн делгрлтин, күч-көлснә болн көдлмшәр тетклһнә министр Өлзәтин Марина көдлмшч яармин федеральн девсңгиг нүр үгәр секәд, иим керг-үүлдвр тааста эрдмәрн көдлмш олҗ авхд, эврә керг бүтәхд эрк биш туслх гив. Региональн девсңд 59 бүрдәц орлцад, ут тоодан һурвн зун шаху көдлмшч орм бәәхин тускар медүлсн билә. Мана таңһчд нурһлҗ эрүл-менд харлһна халхд үүлддг бүрдәцст көдләчнр керглгдҗәнә. Мөрн сард болсн яармд миңһн шаху күн орлцсмн, эдн көдлмшч ормсин көрңлә таньлдад, олн төрәр бүрдәгдсн мастер-класст эврә керг бүтәлһнә, бийиннь туск резюме тогталһна, күч-көлснә хәрлцәнә туст дамшлт хоршав. Яармин ашар 141 күн көдлмш олҗ авв, ик зунь селәнә эдл-ахуд бийдән керг олв гиҗ министр темдглв.
Эн өдрмүдт деед болн дунд шишлң сурһуль төгсәҗәх баһчуд яармд шунмһаһар орлцад, эрдмәрн көдлмш олҗ авхар таңһчин бүрдәцсин элчнрлә күүндв. Кесг улс эврә керг бүтәлһнә болн социальн бооца батллһна туст сүв-селвг авч, «Мини керг» төвин мергҗлтнрлә күүндҗ соньмсулҗадг төрмүдәр цәәлһвр авв.

ДООҖАН Наталья
ЗУРГТ: көдлмшч ормин яарм болҗах кем

Видео