Өр-өвч седклтә ачта эмч

27-06-2023, 09:15 | Общество

Эндр Әрәсән эрүл-менд харлһна йилһән сән көдләч, Хальмг Таңһчин ачта эмч Санҗин Савр ончта сәәхн өөнән темдглҗәнә. П.Жемчуевин нертә таңһчин эмнлһнд хамдан көдлҗәх үүрмүднь Савр Гаряевичиг өөнләнь йөрәҗ, ач-тусинь темдглҗ, байрин керг-үүлдвр бүрдәҗәнә. Дөч һар җилдән әмтнә әм аврҗ үнн-чик седклтәһәр көдлҗ йовх эмч үүрмүд дундан ик күндллһ олҗ, байн дамшлтта болн өөдән мергҗлттә күүнд тоолгдна.

Эцкнь Һәрә Даданович Төрскән харсгч Алдр дәәнд орлцад, Широковск ГЭС-ин тосхлтд күнд көдлмш күцәҗ зовлң дааҗ һарад дару-дарунь гемндг бәәсмн. Көвүнь өсәд-босхларн эмч болад эцкән эдгәҗ авхв гиҗ сандмн. Дәкәд энүнә үй эгчнр Адьяна Софья болн Санҗин Александра, үй дү Шалбура Валерий эмчин эрдм бас шүүҗ авсмн, тегәд эднә элгн-садн дунд эннь сән авъяс болв гиҗ келҗ болҗана. Дунд сурһулян төгсәснә хөөн Санҗин Савр Әәдрхн балһснд медицинск институтд орад, хөөннь Приозерн района эмнлһнд күч-көлснә хаалһан эклв.
1989-ч җилд таңһчин эмнлһнә реанимационн әңгиг тер цагт һардҗасн өөдән мергҗлттә эмч Шовуна Владимир Савр Гаряевичд хамдан көдлх үрвр кев. Тегәд тер цагас авн эн РАО-д эндр өдр күртл көдлҗәнә. Тер җилмүдт реанимационн-анестезиологическ әңгд Владимир Алексеевичин һардврт кергән йилһән сәәнәр меддг, байн дамшлтта эмчнр Мучкан Николай, Мещеряковин Михаил, Темченкон Владимир болн нань чигн өөдән мергҗлтнр көдлҗәсмн, тегәд эдн әмтнә эмнлһнд шин эв-арһс олзллһиг орулҗ, кесг күүнә әм аврсмн. Эдн дару-дарунь орн-нутгин нүүрлгч эмнлһст дамшлт хоршаҗ, шин эв-арһсла таньлдҗ, медрлән гүүдүлҗ мергҗлтән өөдлүлдг бәәсмн. Савр Гаряевичин седвәрәр таңһчин эмнлһнд цусна гравитационн месллһнә, дистанционн литотрипсийин әңгүд секгдв. Эн әңгүд секгдснә нилчәр күнд гемтә улст сән чинртә эмнлһ кеҗ әм аврҗ болв. Тер мет Санҗин Савр үүдәҗ һарһсн олн зүсн эв-арһс месллһнә йовудт олзлгдҗана, тернь дарунь эдгхд туслна. Келхд, зәрмдән месллһнә йовудт бачм бәәдл учрад гемтә күүнд цус орулх кергтә болхла, Савр Гаряевич эврә сән дурар дор ормдан цусан өгдг йовдлмуд чигн учрсмн.
Таңһчин эмнлһнд көдлн бәәҗ Санҗин Савр УФСИН-ә бүрдәцлә нөкцҗ үүлдҗ, ут тоодан хөрн зурһан җилдән тенд көдлв. Зака эвдсн улст месллһ кех кергтә болхла, эн түрүн дуудврар дарунь һарч йовдмн. Олн җилин эргцд үнн кевәр үүлдсн төләдән эн цергллтин кесг ачлврар темдглгдсмн. Дунд сурһулян төгсәснә дару эн цергт мордад, Түрг орн-нутгла бәәдг меҗәд церглсмн. Тер цагас авн кесг җил давсн бийнь эн хамдан церглҗ йовсн үүрмүдтәһән бат залһлда бәрҗ, җил болһн меҗә харулчнрин өдрлә харһна. Элстд Диилврин паркд меҗә харулчнрт нерәдгдсн бумб углҗ тәвлһнә седвәр татсн улс дунд Савр Гаряевич бас орна. Коронавирусн гем түгәд, таңһчин эмнлһнд госпитальд кесг күн эмнлһ авсн цагт Санҗин Савр меҗә харулчнрт дуудвр кеһәд, эдн эмнлһнд буйнч седкләсн дөң күргсн билә.
Седвәртә, өр-өвч седклтә, төрскнч күн болад Савр Гаряевич олна кергт орлцҗ, өөрән бәәдг улст дөңгән күргхәр адһна. Хальмг улс цааҗла харһсн цагт Сиврин һазрт үлдсн элгн-саднаннь санл тевчхин болн бәәрн улст ханлтан өргхин төлә «Санлын поезд» гидг керг-үүлдвр бүрдәгдхлә, эн эмчнрин бригадыг хойр дәкҗ толһалҗ йовсмн. Хол хаалһд йовсн медәтнрин эрүл-менд харҗ, кен негнднь дөңгән күргҗ дахсмн. Һучн һар җилдән РАО-н әңгд көдлҗ йовх эмч райодын эмнлһсин көдләчнрт санавиацин болн телемедицинә халхар эмнлһнә туст сүв-селвгән өгнә, күч-көлснә хаалһан эклҗәх баһчудла байн дамшлтарн хувалцна.
- Һундл төрхд, би эцкдән дөң күргҗ чадсн угав. Намаг 2-ч курст сурчасн цагт эцкм гемин уршгар насан барв. Экм җил болад ардаснь бас сәәһән хәәв. Эмчин эрдм шүүҗ олн җилдән көдлҗ йовнав, эн җилмүдин эргцд кесг күүнд дөң күргв, эмнлһнә халхд шин эв-арһс орулв. Мини үлгүрәр отхн Байрта күүкм эмч болв, ода гүлгн гемәс саглулгч көдлҗәнә. Саша зе көвүм иргчдән эмчин эрдм шүүҗ авхар санҗана, тегәд мини кергиг цааранднь күцәх селгән бәәнә. Нанла көдлҗәх баһ наста эмчнр өдгә цагин некврлә ирлцҗ гүн медрлтә, кергән сәәнәр меднә, тегәд би теднәр бахмҗ кеҗ, кергтә болхла дөңгән күргнәв, зәрмдән теднәс чигн шин тоот медҗ авнав, – гиҗ Савр Гаряевич келнә.
Эрдмин халхар ямр нег күцәмҗ бәрҗ, олн дунд тоомсрта болсн күүнә өөр эрк биш ицлтә үр-иньг бәәдг. Савр Гаряевич Елена Макаровна авальтаһан дөч шаху җилдән бәәнә, эдн хойр күүктә, дөрвн зеетә аав-ээҗ болна. Ууһн Цаһан эрдмәрн архитектор, эн һурвн үртә эк. Отхн күүкнь эмч, нег үртә. Авальнь Элст балһсна 25-ч бичкдүдин садт медицинск эгч болҗ көдлҗ йовла, ода ачта амрлһнд бәәнә. Герин эзн зәрмдән сөөһәр чигн көдлмштән һарч йовх зөвтә болдмн, тегәд Елена Макаровна күүкдән сурһульднь күргәд, шимтә хот-хоолан белдәд, цугинь бийнь даадмн. Месллһ кесн цагт анестезиологин даавр цань уга ик болдгиг эн сәәнәр меднә, тегәд Савр Гаряевичиг дөңнәд, бүлән үгәрн урмд өгнә. Күнд көдлмшин хөөн авальн сенр хотар тооһад, зеенрнь ааван эргәд наадхла эн седкләрн амрна. Дәкәд Савр Гаряевич цогц-махмудан батрулҗ бассейнд усчна болн тренажерн залд цаган тустаһар давулна. Цуг эннь ут нас наслҗ чаңһ-чиирг болхд туслна.
Эндр Санҗин Савр хамдан көдлҗәдг болн церглҗ йовсн үүрмүдтәһән, олн элгн-садтаһан 70 насна өөнән темдглҗәнә. Цуһар энүнд бүлән үгән нерәдҗ, ач-тусинь хәрүлҗ, күцәсн кергинь үнлҗ ханлтан өргхмн. Савр Гаряевичд болхла энүнә нилчәр эдгсн улс эрүл-менд бәәхнь хамгин һоллгч белг болна.

ДООҖАН Наталья
ЗУРГТ : Хальмг Таңһчин ачта эмч Санҗин Савр (дунднь) эмчнр Башанкан Бадмла болн Манҗин Санлла

Видео