Бичкдүдин эв-довнь өсчәнә

27-06-2023, 09:25 | Общество

Бичкдүдт кезә чигн сурһмҗ өгч теднә медрлинь, дамшлтынь, эв-довинь гүүдүлҗ теднә ухан-серлинь делгрүлх кергтә. Тиим күслтәһәр сурһульмуд болн эднә медлд үүлдҗәдг зуна лагерьмүд көдлнә. Элстин 17-ч тойгта сурһулин кесг салврта «Дегц» лагерьт 5-7-гч классмудин 50 көвүд-күүкд болн өдрин йовудт көдлдг «Нарн» лагерьт 1 - 4-гч классмудин 130 бичкдүд орна.

Тиим цәәлһвриг баһ наста һардачнр Альма Владимировна Горяева болн Айса Георгиевна Дорджиева өгв. Һоллгчдан энд цергә-төрскнч учр-утхта сурһмҗ өгнә. Үлгүрнь, одахн «Мини Төрскнә баатр» гидг төсвиг бичкдүд болн арвтнр харсв. Эдн Төрскән Харсгч Алдр дәәнд орлцсн өвкнриннь болн мана цуг таңһчин баатрмудын тускар келҗ өгв.
Бичкдүдин төлә квест-наадн бүрдәгдв, эдн кесг даалһвриг дигтә-даратаһар күцәҗ тууҗин туск сән медрлән үзүлв. Тер мет «Орлята» болн Цугәрәсән нань чигн керг-үүлдврт бичкдүд орлцҗана.
-Нанд лагерьт бәәлһн ик гидгәр таасгдҗана. Бидн цугтан цаган тустаһар давулнавидн, соньн керг-үүлдврт орлцнавидн, цогц-махмудан батрулнавидн, кесг кегдлмүд кенәвидн. Би «Колобок» тууль тәвлһнд орлцлав, мектә аратын дүр наадлав. Тер нааднд бидн кесгтән белдләвидн, - гиҗ 2-ч отрядын гешүн Снежана Тавунова келв. Снежана 4-ч класст орна, олна керг-үүлдврт шунмһаһар орлцна.
Спортын эстафетд чигн цуг бичкдүд гүүлдҗ, һәрәдҗ кесг күҗцәмҗ бәрлә, түүнә йовудт эдн шин наад дасҗ авв, цогц-махмудан батрулв. Хойр лагерь сурһулин немр шин бәәшңд бәәршлнә. Энд ОГЭ-н шүүвр бүрдәгдҗәлә. Тер кемд бичкдүд «Иньгллт» паркд керг-үүлдврән давулҗала эс гиҗ музейд, кинод йовад мана таңһчин тууҗин, йиртмҗин тускар кесг шин тоотыг медҗ авчала.
Мөчн сарин 22-т мана орн-нутгт Төрскән харсгч Алдр дән эклснә 82-ч җилин һашута өөниг темдглв, энүнлә залһлдулҗ бичкдүд болн арвтнр «Ла» («Свеча») гидг флеш-моб кев. Дәкәд цуг орн-нутгуд эвин бәәдлд бәәтхә гиһәд кесг орн-нутгин нер бичәд санлын тасм белдв. Хойр лагерьт кесг кружок үүлднә, отряд болһн эврә кружокта, тиим кевәр дурта билг-эрдмән күүкд делгрүлнә.
Дәкәд бичкдүд хорта олн-зүсн тоот эдллһнә му авъясин тускар бас медҗ авв. Түүнә тускар эднд вожатнр болн сурһмҗлачнр келҗ өгв. Келҗ өгсиг күүкд сәәнәр тодлад авв. «Тәмк татхмн биш, наркотик эдлхмн биш, әрк-чаһр уухмн биш»,- гиҗ эдн нег дууһар келнә. Тиим туста сурһмҗиг эднд лагерьт өгнә.
Арвтнр Амр Санана нертә Келн-улсин детгрин саңд Гарри Поттерин туск дегтрәр бүрдәсн квест-нааднд орлцв, тиим кевәр утх-зокъялар эдниг соньмсулна. Билгтә – эрдмтә бичкдүд «Голос-дети» лагерин наадмд орлцҗ кен сәәнәр ду дуулдгинь йилһҗ авх, талдан чигн концертмүдт бичкдүд орлцна. Күндтә, дамшлта гиичнр, тер тоод «Росгвардин» дәәчнр эдн тал ирҗ эврә цергллтин, күцәҗәх дааврта кергин тускар келҗ өгнә. Көвүд эднәс үлгүр авна.
Өдр болһн лагерьт Әрәсән болн Хальмг Таңһчин туг өргҗ, давсн керг-үүлдврт йилһрсн күүкд-көвүдиг Күндллһнә һашгар ачлна,эднәс күцәмҗтә, седвәртә иргнмүдиг асрҗана.

ТҮРВӘН Һуна

Видео