Җаңһрч Манҗин Баатр келмрчнрин ик хургт орлцв

27-06-2023, 09:30 | Общество

Келмрчнрин Цугделкән хург Киргизьд болв. Терүнд Хальмг Таңһчас улсин җаңһрч Манҗин Баатр орлцв.

«Манас» дуулврин төрскн һазрт цуглрсн келмрчнрин ик хург мөчн сарин 14-әс авн 17 күртл болв. Иссык-Кульск мүҗд Моңһлын, Узбекистана болн Әрәсән келмрчнр чинртә олн төрәр күүндвр кехәр ирсмн. Киргиз келн-улсин «Манас» гидг академь эн сүүрин бүрдәһәч болв.
Әрәсән делегацин ханьд Якутин, Хальмгин, Башкирин, Бурятин, Тыван, Алтан, Хакасин келмрчнр тер ик хургт орлцв. Келмрчнрин эрдм ямаран кевәр хадһлгдҗахин болн ямаран делгрлт авчахин тускар хургт орлцачнр күүндвр кев. Келн-улс болһна кезәнк эрдмиг цааранднь яһҗ делгрүлхин туск тоолврарн эдн хувалцв.
Делкәд бәәдг олн дуулврмудыг амн үгин зөөр болгч үүдәврмүдиг хадһлхин төлә келмрчнрин нарт-делкән ниицә бүрдәхин тускар хургт күүндвр болв, ирлцңгү шиидвр батлҗ авгдв.
Хальмг Таңһчас эн чинртә керг-үүлдврт орлцсн Манҗин Баатрин тоолврар, тууҗд түрүн болҗ келмрчнр цуглрҗ кезәңк цагас авн әмтиг дахҗ йовх амн үгин сәәхн эн эрдмиг хадһлҗ, цааранднь делгрүллһнә тускар хувалцснь сән йовдл болв. Юнгад гихлә, эн төриг чикәр хадһллһн иргч үйнрт кергтә. Улсин кезәңк эн эрдм үйнриг залһҗахнь ик чинртә. Тууҗин йовдлмудыг тодлулад, кезәнк баатрмудын үлгүрәр дамҗад төрскндән дурта болдгиг дасхлһна күчнь йир ик болҗана.
Өвкнрин кезәңк дуулвриг олн улст медүлҗ йовх келмрчнрин эрдмин чинринь өөдән өргҗ батлхин тускар, өдгә цага делкән сойлд келмрч ямаран орм эзлҗәхин тускар сүүр деер гүн утхта күүндвр болв. Кезәнәс авн тууҗин ик девсңгүд һатлад, хадһлгдсн эрдмин күчинь гееҗ болшгон тускар келмрчнр нег дууһар тоолвран медүлсмн. Иргчдән тогтагдх келмрчнрин нарт-делкән бүрдәц яһҗ үүлдхин туск сүв- селвгән хургт орлцачнр келҗ медүләд, цааснд батлҗ үлдәв.
Ик Бухса билгт Манҗин Баатриг таңһчд сән меднә, күндлнә. Улсин җаңһрчин өөдән нериг эн зүүнә. Кезәнк эрдмиг баһчудт дасхҗ йовна. Баһ Дөрвдә районд бичкн җаңһрчнрин сурһуль эн бүрдәв. Нарт-делкән, Цугәрәсән болн нань чигн марһаст орлцад, Манҗин Баатр хальмгудын амн үгин зөөрлә олн улсиг таньлдулҗ йовна.
Якутскд болсн «По зову Земли Олонхо» гидг Нарт-делкән келмрчнрин онлайн наадмд җаңһрч Манҗин Баатр лауреатын нер зүүсмн.
«Җаңһр» дуулврарн делкәд нер туурсн хальмг билгтнрин нерн деерәс Цугделкән негдч хургт орлцад, җаңһрч Манҗин Баатр өвкнрин келни сәәхн зөөр Хальмгт яһҗ хадһлгдҗ йовхин тускар олн келмрчнрт медүлв.

ҖИРҺЛИН Кермн

Видео