Җирһлин хаалһнь сарул-сәәхн болтха!

27-06-2023, 09:35 | Общество

Давсн басң өдрлә таңһчин цуг сурһульмудар байрин асхна хургуд болв. Тер мет Элстин Зая-Пандитын нертә этносойлын гимназиг 2022-2023 сурһулин җилд төгсәсн 45 арвтиг йөрәҗ эднд хөв-кишг дурдв.

- 11-ч хойр класст сурчасн мана билгтә арвтнриг җилин туршарт һардҗ тедниг ЕГЭ-н амр биш шүүврт белдҗ Марина Борисовна Марзаева болн Данара Васильевна Ванькаева аһу ик көдлмш күцәлә. Ода эдн сурһульчнран өргн ик җирһлд һарһҗана. Мана хойр сурһульч ЕГЭ-н шүүвриг хамгин өөдән аштаһар өгв, тер тоод тууҗар Даяна Сангаджиева болн химийәр Санал Сумьянов 100 балл хоршав, эдн хойр гимназин олна җирһлд шунмһаһар орлцҗана. Даяна болхла билг-эрдмин гимнастикәр спортын мастерин кандидат болҗана. Саналас нань тиим ончта ашт таңһчд күн күрсн уга.
Тер мет 8 күн сурһульдан онц күцәмҗ бәрснә төлә медаляр болн онц кев-янзта хату цаасар ачлгдв. Тер тоод Савһр Ванькаев, Арслң Очиров, Бадм Сохуров, Диана Сангаджиева, Алтн Эдеева, Лариса Яценко йовна. Мана гимназиг төгсәҗәдг арвтнр социальн-гуманитарн, химийн-биологийин болн инженерин-технологин салврар сурла, ирлцңгү вузмудыг эдн шүүҗ авх – гиҗ сурһмҗин көдлмш һарддг һардачин дарук Элеонора Уджакова темдглв.
Арвтнрт нерәдсн байрин асхн «Намсад» гидг сәәхн хальмг дууһар эклв, энүг нертә дууч Мингиян Хонинов дуулҗ өгв. Тиим авъясиг өргәд йовдг этносойлын гимназин коллектив болн һардвр йир сән заңшалыг мана таңһчин бәәдл-җирһлд тархаҗана. Эн дун дәәнә өмнк җилмүдт үүдәгдсн билә, мана өвкнрин авъясиг тиим кевәр алдр хальмг үүлдәч Зая-Пандитын нертә гимназин багшнр делгрүлҗәнә. Эднә седвриг цааранднь талдан сурһульмудт тархаһад бәәхлә сән болхнь лавта.
Йирдән ик сойлын эс гиҗ сурһмҗин, баһчудын керг-үүлдвр бүрдәсн саамд терүг хальмг дууһар экләд бәәсн болхла йир ке болн гүн учр-утхта болх бәәсмн. Тиим кевәр бидн баһчудт, олн улст, мана тал ирдг олн зуульчнрт мана кезәңк үндстә, ончта сәәхн ховр сойлыг тодлулҗанавидн. Баһчудыг җирһлин өргн цаһан хаалһд һарһҗах байрин асхнд тиим авъяс йир орта болҗ сангдна. Эн дуунла хамдан мана өвкнр чигн баһчудт хөв-кишг дурдҗана, мана туурмҗта тууҗла бәрдг залһлдан батрад йовна гиҗ медгднә.
Олна ик нәр-наадна йовудт цааранднь хальмг айсмуд күңкнв, эн саамд тәәз деер 11-ч классин арвтнр хошадар сәәхн бүшмүдтә күүкд болн кеерсн седң көвүд һарч ирәд бәәв. Эдниг школын һардач Елена Лиджиева йөрәв. «Мана төгсәһәчнр дунд олимпиадмудын призермүд, спортсменмүд, шунлтта көвүд-күүкд йовна. Эднд сән сурһмҗ өгснд бидн эк-эцкнрт болн мана гимназин багшнрт ханлтан өргҗәнәвидн. Түрүн болҗ мана гимназьд 8 күн медальмүдәр ачлгдв. Мана гимназин нериг цааранднь дуудулҗ йовтн!»,- гиҗ Елена Сергеевна келв.
Элст балһсна һардврин нерн деерәс арвтнриг Андрей Шеркешев йөрәв. Эндр Элстин 759 арвт 11-ч классан төгсәҗәнә. Эдн иргчдән Хальмг Таңһчин болн Элстин делгрлтд нилчән күргәд бәәх. Эднә эк-эцкнрин нәәлврнь күцтхә, гиҗ Андрей Мингиянович темдглв.
Тер мет таңһчин сурһуль-эрдмин министерствин ахлгч мергҗлт Дарина Чимидова хальмгар келәд сурһульчнриг йөрәһәд, сурһуль-эрдмин министр Булган Ангирован йөрәл умшҗ өгв. Зая-Пандитын нертә гимназин багшнр дорас өсҗ йовх үйнрт сән сурһмҗ болн гүн медрл өгчәнә. Цуг төгсәһәчнрт күцәмҗ дурдҗанав. Тааста эрдм олҗ таңһчдан тусан күргтн гиҗ министрин йөрәлд келгдв.
Эк-эцкнрин нерн деерәс Хальмг ик сурһулин эмнлһнә дацңгин декана үүл дааҗадг Саглр Бадмаева йөрәв. Мини күүкн гимназиг бас эндр төгсәҗәнә, тер ончта йовдлла йөрәҗәнәв, цуг арвтнрт хөв-кишг дурдҗанав. Сурһулян болн багшнран, Хальмг Таңһчан бичә марттн, эк-эцкнрән күндлтн гиҗ Саглара Евгеньевна дурдв.
Дәкәд тәәз деер хальмг хувцта көвүд-күүкд һарв. Эдн йоста хальмг бичкдүд мет сәәхн хальмг келәр «Ялуха» олн улсин ду дуулҗ өгәд, дәкәд хальмг би биилв. Тиим кевәр гимназьд хальмг сойлын, келнә болн авъясин халхар дамшлтта багшнр сән сурһмҗ өгнә гиҗ лавтаһар келҗ болҗана. Терүг «Торһа» багин сурһульчнр иткүлв. Тер мет хальмг олн улсин бииһин студин ах класст ордг күүкд шар шаҗна олн бурхнд нерәдсн йоста нәр-наад үзүләд, теднә би бииләд ирсн әмтнә зүрк авлв. Эн салврар улм өөдән күцәмҗ бәрҗ йовтн гиҗ этносойлын гимназин багшнрт дурдҗ болҗана, мана өвкнрин авъясиг хадһллһна болн цааранднь делгрүллһнә аһу ик чинртә амр биш кергиг эдн седклән өгч күцәҗ йовна.
Уйн сәәхн наста төгсәһәчнрт хату цаасинь сурһулин һардач, түүнә дарукс болн классин һардачнр бәрүлҗ өгв. Сурһульдан, үүдәгч көдлмштән, спортд болн нань чигн халхар күцәмҗ бәрсн арвтнр баг-багар тәәз деер һарв.

ТҮРВӘН Һуна

Видео