Эн җилин хойрдгч өрәл ямр болх?

27-06-2023, 09:40 | Общество

Лам Еши Намжил – шаҗнд шүтдг улс сән меддг зурхач. Бурятин Курумканск дацана ах багш болҗ церглнә. 2023-ч җилин хойрдгч өрәлин зурхаг лам белдсн бәәнә. Кениг бәәхтә җирһл күләҗәнә. Кен бийән саглх зөвтә. Энүгинь медхин кергт эн зурхаг умштн. Лам Еши Намжил «Комсомольская правда» газетд келҗ өгсн тоотла мана умшачнриг таньлдулҗанавидн.

- 2023-ч җил – Көкрңһү өңгтә Туулан җил, улнь Усна чинртә. Туула җил күцәмҗтә, тоолврта үүлдврин җил болдмн. Ик күсл тәвҗ үүлддг улст туста җил. Һаха болн Хөн җилтә улст сән болх. Така болн Туула җилд төрсн улст харш җил болҗана.

ОЛН УЛСИН ҖИРҺЛ

- Бүклднь авад хәләхлә, кен чигн күн коллективәрн, өрк-бүләрн цуг әмтнлә нег җирһләр бәәх зөвтә. Цуг тоотнь сольгдад бәәдг эн җилд мел тиигҗ хамцу бәәхлә, цуг учрҗах тоотыг давҗ һарч болхмн. Сольгдад бәәдг тоотыг тер дарунь тоод авч үүлддг әмтн күцәмҗтә болхмн. Болв бәәдл улм нәрдәд чигн бәәхинь бичә марттн.

ЭРҮЛ-МЕНДИН...

- Усна күчн икдҗәхәс иштә хальдврта гем түглһн өсәд йовхмн. Чинәнь тату болн медәтә әмтиг хәләвр уга бичә үлдәтн. Хамгин түрүнд чикнь хату болн бөөрин гемтә улс әәмшгтә бәәдлд тусхмн болҗана. Залу улсин эрүл-менднь дора орх әәмшг бәәнә. Нилхд күләҗәх, үрдүд өскхәр бәәх өрк-бүлмүд нег үлү эрүл-мендән батлх зөвтә.
Эдлҗәх хотан ясад, давста, шарсн, шар көндәдг нань чигн хотан баһрултн.

КӨДЛМШИН БОЛН МӨҢГНӘ...
- Эн җил зуг зәрм эрдмин әмтнд туста болхмн. Келхәс, интернетин, залһлдана, логистикин халхар көдлҗәх әмтнд җирһлнь сән таалта болх. Әмтнә бәәцин халхд, ясвр келһнд, хувц уйлһнд болн тосхлтд көдлҗәх әмтн чигн мөңгнә туст бәәдлнь сән болхмн. Патьрт әмт бәәлһҗ, көлгән олзллһнд өгч олз үздг әмтн чигн мөңгнә олзта болхнь маһд уга. Мөңг олх саната болхла, тәрә-темс тәрҗ урһатн, мал өсктн. Урн һарин эрдм ик делгрлт авчана. Һартан өөтә улсин цаг ирҗәнә. Юм урлдг, хувц уйдг улс даңгин мөңгтә бәәхмн.

ХӘРЛЦӘНӘ ТУСКАР
- Хәләц-тоолвран шинҗләд-шалһад, бәәдл-җирһлән сольх кем чигн кесгтнь учрҗана. Урднь бәәсәрн бәәҗ болшгог медҗ, чик шиидвр авч үзтн. Өөр эргндк сольгдҗах цагт җирһлдән хүврлт орулх кергтә. Цагин бәәдл дахч бәәх кергтә болҗана. Тегәд Туула җил кенд тааста болҗана? Хамгин түрүнд тоолврта болн өмнән өөдән күсл тәвҗ үүлддг улст йир туста җил. Цагин бәәдләс иштә җирһлән болн үүлдврән сольҗ чаддг әмтн чигн сән бәәхмн. Болх болшго уха зүүһәд, җирһл үнндән ямаран болдгинь меддго санамр улст амр болшго. Учрҗах нәрн бәәдлиг медлго тедн дарунь гемнәд бәәхмн. Тер төләд учрҗах ямр нег йовдлд цагларн оньган өгч, цагин неквриг медҗ үүлдх арһ хәәтн.

Барт белдснь ҖИРҺЛИН Кермн

Видео