Луганскас бичкдүд амрчана

29-06-2023, 09:00 | Общество

Одахн Санкт-Петербург балһснд болсн экономическ ик хургт Хальмг Таңһчин Толһач Хаска Бату болн Луганск Улсин Республикин толһачин үүл дааҗадг Леонид Пасечник нөкцлтин туск бооцанд һаран тәвлә. Терүнд заагдсн керг-үүлдврмүд дунд ЛНР-ин бичкдүдин зуни амрлһ бүрдәлһнә төр бас батлгдсн билә. Ут тоодан мана таңһчур эн зуни кемд 500 күүкн-көвүн дөрвн селгәһәр ирхмн гиҗ зуралгдҗана. Шидр мана таңһчур 139 күүкн-көвүн ирв.

ЛНР-ин Антрацитовск районас ирсн бичкдүд Ока Городовиковин нертә хазгудын кадетск корпусин улд амрхмн. Энд сойлын болн спортын амрлһна пункт секгдв, терүг кадетск корпусин директор Абушина Сергей һардв. Энд һурвн селгән ноха сарин 8 күртл бүрдәгдхмн. Сүл дөрвдгч селгән района «Березка» лагерьт болх. Лагерьмүдин сурһмҗлачнр Луганск улсин республикин бичкдүдин төлә амрлһна көтлвр белдв, эднә төлә чик сурһмҗин, билг-эрдм делгрүллһнә, хальмг улсин сойлла таньлдуллһна керг-үүлдврмүд болхмн. Гиичнрт хотл балһсар экскурсь болхмн, эдн таңһчин ке-сәәхн һазр хәләхмн, хальмг улсин авъясмудла таньлдҗ, мана тууҗин халхар медрлән гүүдүлхмн. Тер мет күүкд-көвүд мана таңһчд үүлддг бичкдүдин болн баһчудын олна бүрдәцсин үүлдврлә таньлдхмн, хамдан цаган сергмҗтәһәр давулхмн.
Кадетск корпусин улд бүрдәгдсн түрүн селгәнә ах вожатый Сергей Сокиркинә келсәр, бичкдүдин амрлһн әәмшг уга болн сергмҗтә болхин төлә цуг таал тогтагдв. Энд психолог бәәнә, тегәд бичкдүд ямр нег төрәр цәәлһвр болн сүв-селвг авч чадхмн. Нааран ирсн бичкдүд 11-16 наста болна, тегәд эк-эцкнрәс хол йовхнь зәрмстнь күнд болҗахас иштә психологин дөң кергтә болхмн. Х.Кануковин нертә педагогическ колледжин оютнр болн Ока Городовиковин нертә хазгудын кадетск корпусин көдләчнр вожатнр болҗ көдлҗәнә.
- Манаһур 139 күүкн-көвүн ирв, тегәд бидн бидн 7 отряд бүрдәввидн. Отряд болһнд хөрн күн бәәнә. Бичкдүдиг дахад ирсн багш Вита Николаевна Рудницкая энд селгән төгстл бас бәәхмн. Эн өдрмүдт бидн сәәнәр таньлдад, олн зүсн соньн керг-үүлдврмүд, марһас зуралҗанавидн. Мана көтлврт зәрм сольвр орулгдҗана, тегәд бичкдүд Элст балһснур йовҗ, тенд төв хурлд, орс чонҗд, музейд одҗ мана сойлла болн тууҗла таньлдхмн. Элстд эднә төлә олн зүсн харһлтс болхмн, тегәд күүкд-көвүд сергҗмтәһәр амрхнь лавта. Эдн өдрт тавн дәкҗ халун хот ууна, олн зүсн зер-земш, темс, үснә болн һуйрин зүүтә хот-хол өдр болһн өгнәвидн. Бидн күүкд-көвүдин төлә сән таал тогтаҗ, цаһан седкләсн эдн ирснд байрта бәәнәвидн. Тегәд бичкдүд эрүл-мендән батрулҗ, сәәнәр амрад, мана таңһчд шин үүрмүд олҗ хәрх, - гиҗ Сергей Васильевич келв.
Мөчн сарин 26-д селгән байрин таалд секгдв, бичкдүд билг-эрдмән үзүлв. Хойр долан хонгин эргцд эдн сергмҗтәһәр амрад, мана таңһчла таньлдхмн. Энд давулсн өдрмүд бичкдүдт хөөннь кесгтән тодлгдхин төлә вожатнр соньн көтлвр белдв.
Луганск улсин республикас ирсн бичкдүдиг Хальмг Таңһчин залврин Ахлач Босхмҗин Гилән, таңһчин сурһуль-эрдмин болн номин министр Анһра Булган, Городовиковск района толһач Абушина Валерий тосад, зуни амрлһна кем хамгин сергҗмтә болн байрта цаг болна гив. Хальмг Таңһч болн Луганск республик хоорнд нөкцлт батрҗ, бидн нег-негндән дөң болҗ, иньгллтин залһлдаг делгрүлҗ хамцу үүлдхвидн гиҗ дааврта һардачнр темдглв.

ДООҖАН Наталья
ЗУРГТ: Луганск Улсин Республикәс ирсн бичкдүд

Видео