Немр сурһуль дасхин төлә

29-06-2023, 09:10 | Общество

Одахн Хальмг Таңһчин Толһачин медлд үүлддг бичкдүдин зөв харслһна хүүвин дарани сүүр болв. Терүг таңһчин Улсин Хуралд Хальмг Таңһчин Толһачин элч Манҗин Араш һардҗ давулв. Сүүрт таңһчин бичкдүдин зөв харслһна элч Чужан Наталья, сурһуль-эрдмин, спортын министерствсин, Олна палатын, прокуратурин, мөшклһнә комитетин элчнр орлцв. Сүүрт насни дигт күрәд уга бичкдүдин немр сурһулин төр хәләгдв, зуни амрлһна йовудын болн бичкдүдиг әср йовдлмудас саглуллһнд сурһмҗлгчин чинрин тускар күүндвр болв.

Таңһчин сурһуль-эрдмин болн номин министерствин сурһмҗин болн немр сурһулин әңгин һардач Немгрә Балҗр, таңһчин спортын министрин дарук Тямиса Аксен күүкд-көвүдин төлә ямаран немр сурһулин бүрдәцс үүлддгин тускар тодрхаһар келв. Балҗр Каруевнан зәңглсәр, мана таңһчд 322 немр сурһулин бүрдәц үүлднә, терүнд 2017 көтлврәр бичкдүдиг сурһна. Сүл кесн то-дигәр таңһчд тавн наснас авн арвн нәәмн нас күртл 27137 күүкн-көвүн олн зүсн халхар немр сурһуль сурна. Нидн җиләс авн таңһчин сурһуль-эрдмин бүрдәцст долан хонг болһн «Чинртә төрәр болсн күүндвр» гидг керг-үүлдвр давулгдна, терүнд сурһульчнрт төрскнч сурһмҗ өглһнд ик оньг өггднә. Дәкәд долан хонг болһн финансин халхд бичкдүдин медрл гүүдүллһнә, тааста эрдм шүүҗ авхд тусллһна керг-үүлдвр бүрдәгднә. «Өдгә цага сурһуль» гидг көтлврин медлд Элст балһсна 20-ч тойгта сурһульд, бичкдүдин билг-эрдм делгрүллһнә төвд болн Орс келн-улсин гимназьд «Кванториум» секгдв. Тенд сурһульчнр өдгә цага шин эв-арһсин, технологическ болн инженерн халхар медрл хоршана. Үрндән немр сурһуль шүүҗ авхд «Немр сурһулин навигатор» гидг шишлң эв-арһ дөң болна гиҗ министерствин элч келв.
Таңһчд үүлддг спортивн бүрдәцсин, тенд ямаран спортар секцс үүлддгин тускар Тямиса Аксен зәңглв. Урднь спортивн секцст 6 миңһн һар күн ордг бәәсн болхла, эн җил 3269 күүкн-көвүн орҗана. Дааврта һардачин келсәр, сүл цагт тренермудын то бас баһрв, тегәд эннь нәрн төр болҗана. Таңһчин уйн наста спортсменмүд олн зүсн марһаст орлцҗ, диилвр бәрнә. Харм төрхд, министерств онц эздүдин секцсин то-диг шинҗлхш, тегәд эн туст көдлмшән ясрулх кергтә гиҗ сүүрт келгдв.
Насни дигт күрәд уга бичкдүд зака эвдлго чик авг-бәрцәр бәәхин төлә эдниг аля-азд йовдлмудас саглхин төлә сурһмҗлгчнр эднд чик сурһмҗ өгх зөвтә. Тоомсрта, күндтә болн олн әмтн тевчдг улс сурһмҗлгчнр болҗ, дорас өсч йовх бичкдүдлә төрскнч сурһмҗ өглһнә, бүртклһнә керг-үүлдврмүд давуллһнд орлцхмн. Эн чинртә көдлмшт орлцх улсиг диглҗ, район болһнд болн хотл балһснд йилһҗ авчана. Таңһчин бичкдүдин зөв харслһна элч Чужан Наталья одахн Севастополь балһснд ЮФО-д бичкдүдин зөв харслһна элчнрин хүүвин сүүр болсна тускар келәд, терүнд сурһмҗлгчнр әср күүкд-көвүдиг чик хаалһд орулҗ, дөңгән күрглһнд орлцхиг темдглв гив.
Сүүрт хәләгдсн төрмүдәр шиидвр батлгдв. Зуни амрлһна кемд насни дигт күрәд уга бичкдүд эрүл-мендән батрулҗ, сергмҗтәһәр амрх зөвтә, тегәд лагерьмүдин үүлдвр әәмшг уга болх зөвтә гиҗ сүүрт келгдв.

ДООҖАН Наталья

Видео