Урһц хуралһна көдлмш эклҗәнә

01-07-2023, 09:10 | Общество

Селәнә эдл-ахун көдләчнрин төлә урһц хуралһна дааврта кем эклҗәнә. Хөн сарин эклцәр таңһчин селәнә эдл-ахун министерствин мергҗлтнрин кесн то-дигәр, 2023-ч җилд сән урһц хураҗ авлһна төлә райодын эдл-ахуст 245 миңһн гектар аһу һазрт намрин буудя болн тосна урһмл тәргдв. Тер тоод 242,7 миңһн гектарт цаһан буудя, тритикале болн хар буудя тәргдсмн.

Тәрәнә һазр яслһна төлә 3,57 миңһн тонн ясрлт белдгдв. Тер мет олн зүсн хорхаһас гетлдг керг-үүлдврмүд күцәгдв. Селәнә эдл-ахун техник болн кергсл 100 процентд белдгдсн билә. Энүг өдр болһн шинҗлнә, эвдрсн техник илдкгдхлә, тернь өдр болһн ясгдна. Хаврин цагт агротехническ цуг керг-үүлдврмүд давулхин төлә 7300 тонн тосн-түлән олзлгдв.
Шидр Целинн района Хар Булг поселкин аһуд тәрсн намрин цаһан буудяг Хальмг Таңһчар үүлддг «Россельхозцентр» ФГБУ-н, М.Б.Нармаевин нертә КНИИСХ-н мергҗлтнр болн номтнр йовҗ бүрткв.
КФХ-н толһач Владимир Булхуковин келсәр, намрин цаһан буудя 2600 гектар аһу һазрт тәргдв. Эннь яшкулянка, булһн болн хаср чинртә буудя болна, эн урһмл хагсу һазрт сәәнәр урһна. Эн экнә урһмлын тохм ясруллһна халхар арвн җилдән көдлҗәнәвидн. П.П.Лукьяненкон нертә Краснодарск селәнә эдл-ахун номин-шинҗллтин күрәлң болн М.Б.Нармаевин нертә КНИИСХ маднд дөң-тусан күргнә, гиҗ темдглх кергтә. Цаһан буудя тәрсн һазрт буг өвс хаврар түүҗ, агротехническ керг-үүлдврмүдиг цагтнь күцәввидн, селәнә эдл-ахун техник бас бәәнә. Эн җил болхла хур икәр орҗахнь сән болҗана. Тодлхла, иим ик хур орад уга билә, тегәд эн җил гектар болһнас 30-35 центнер цаһан буудя хураҗ авх санатавидн, гиҗ Владимир Дорджиевич иткүлв.
Хальмг Таңһчар үүлддг «Россельхозцентр» ФГБУ-н һардачин дарук Тамара Дентелинован келсәр, тәрә тәрсн аһу һазрт шинҗллт кех кергтә. Энүг шишлң сурһуль төгсәсн көдләчнр күцәнә. Өдгә цагт иим сурһульта хөрн нег күүнәс арвн нәәмнь таңһчин «Россельхозцентрин» мергҗлтнр болна.
Эн ФГБУ-н Целинн района әңгин һардач Надежда Курдюкова болхла ирлцңгү керг-үүлдвриг яһҗ кедгинь келҗ үзүлв. Урһсн цаһан буудян уңгинь хәләһәд, хөөннь энүнә толһань шинҗлгднә. Буудян толһань бүкл болх зөвтә. Урһц цуг таласнь шинҗлгдҗ, аштнь шиидвр һарһгдна гив.
Ямр чигн урһмлын экн сән урһц хуралһнд туста болдг. Җил болһн мана таңһчд 27-28 миңһн тонн шаху урһмлын экн олзлгдна. Эдл-аху болһн кесг урһмл тәрнә. Шинҗләд цааранднь эн урһмлыг тәрҗ болх угаһинь меднә. Эн өдрмүдт урһцан хурахар зуралҗанавидн, зуг хур дәкәд орхмн гиҗ зәңглгдв, тегәд теңгрин бәәдлиг учртан авч, удл уга цаһан буудяһан экләд хурахвидн, гиҗ М.Б.Нармаевин нертә КНИИСХ-н әңгин һардач, Хальмг Таңһчин күндтә иргн Борис Гольдварг темдглв.
Ашлад келхлә, эн җилд таңһчин селәнә эдл-ахун көдләчнр дааврта көдлмшән цаг-болзгтнь давулад, элвг урһц хураҗ авхар зуралҗана.

КАРСАНА Евгения
Зургт: Борис Гольдварг, Надежда Курдюкова, Тамара Дентелинова болн Владимир Булхуков

Видео