Эрмдгтә улсин төрмүд хәләгдв

01-07-2023, 09:15 | Общество

Шидр Хальмг Таңһчин Толһачин медлд үүлддг гемтә-шалтгта улсин хүүвин дарани сүүр болв. Терүг Хальмг Таңһчин залврин Ахлачин дарук–таңһчин социальн делгрлтин, күчкөлснә болн көдлмшәр тетклһнә министр Өлзәтин Марина һардҗ давулв. Сүүрт эрмдгтә улс медико-социальн шинҗллтд орлһна, эдниг эмәр тетклһнә, реабилитацин онц көтлврин керг-үүлдврмүд күцәлһнә, «Абилимпикс» марһа давуллһна төрмүд хәләгдв.

Хальмг Таңһчар үүлддг МСЭ-н һоллгч бюрон үүлдврин ашин болн таңһчин күцәгч органмудла нөкцлтин халхар күцәсн көдлмшин тускар эн цергллтин һардачин дарук Давана Маргарита тооцаһан өгв. 2020-ч җиләс авн медико-социальн шинҗллт пандемийин таалд давулгдв, 2022-ч җилд зурһан сардан шинҗллт очн-заочн кевәр күцәгдв. Давсн җилд МСЭ-н цергллтд 10 миңһн һар күн эрлһән орулв, 1567 күн түрүн болҗ эрмдгтә иткл цааста болв. Таңһчин күцәгч йосна органмудла ведомствс хоорндк нөкцлт батрулгдсна ашт 6020 бичгәс 5179 электронн кевәр йовулгдв. 2021-ч җилин туула сарас авн гемтә-шалтгта күүнә реабилитацин онц көтлвр (ИПР) зуг электронн кевәр тогтагдна, тегәд терүнд заагдсн керг-үүлдврмүд күцәхин төлә ведомствс хамцу үүлдх зөвтә гиҗ сүүрт темдглгдв. Сүүрт орлцсн гемтә-шалтгта улсин олна ниицәсин элчнр медико-социальн шинҗллтд орлһна туст зәрм төрмүд хаһлхиг сурв. Тиигәд, эрмдгтә бичкдүдт давтад шинҗллтд орхин төлә стационарн эмнлһ авх кергтә, зуг эмчин шиидврәр зәрмнь өдрәр үүлддг әңгд эмнлһ авч чадҗана. Эн төрәр вице-премьер таңһчин эрүл-менд харлһна министерствд даалһвр өгәд, эмчнрт шишлң сүв-селвг белдх неквр тәвв. Келхд, сүүрин йовудт зәрм төрмүд тер дарунь гилтә хаһлгдв, сурһуль-эрдмин, эрүл-менд харлһна, сойлын болн спортын министерствсин элчнр гемтә-шалтгта улсин олна ниицәсин гешүдт цәәлһвр өгв.
Эмәр тетклһнә төр нәрн болҗахиг таңһчин эрүл-менд харлһна министрин дарук Курдюкован Оксана медүлв. Федеральн бюджетәс йилһгдҗәх мөңгәр 5727 күн эмәр теткгдх зөвтә, теднәснь 78 процентнь эмин ормд мөңг авхар шиидв. Зуг күнд гемтә болн үнтә эм керглҗәх улс шаңһас йилһгдҗәх мөңгәр эмәр теткгднә. Эн җил эднд 104 сай арслң йилһгдх зөвтә, ода деерән 86 сай арслң олзлгдв. Региональн льготникүдиг эмәр тетклһнд 400 сай арслң кергтә, ода деерән зуг 288 сай арслң йилһгдв. Гемтә-шалтгта улсин «Абилимпикс» марһан 2018 җиләс авн давулгдҗана, мана таңһчд терүнд 313 күн орлцв. Эрүл-менд харлһна болн социальн хәләврин халхар болдг марһаст эдн шунмһаһар орлцҗ, хөөннь Цугәрәсән девсңд күцәмҗ бәрнә. Эн марһа давулхин төлә региональн 147 шинҗләч сурһуль сурв, 260 күн эврә сән дурар терүг давуллһнд дөңгән күргнә. Эрмдгтә улсин олна ниицәсин элчнр эн марһана тускар соньмсулҗадг сурврмуд бас өгв. Гемтә-шалтгта улс музейд, театрмудт болн дегтрин саңгудт болдг сойлын керг-үүлдврмүдт орлцлһна тускар бас келгдв. Сүл цагт сойлын бүрдәцст эднә төлә олн зүсн харһлт, концерт, экскурсь бүрдәгддгиг олна ниицәсин элчнр темдглв.
Сүүрт хәләгдсн төрмүдәр ирлцңгү шиидвр батлгдв, зәрм төрмүдәр дарук сүүрт дәкнәс күүндвр тогтах даалһвр өггдв.

ДООҖАН Наталья

Видео