Төсв экләд күцәгдҗәнә

01-07-2023, 09:25 | Общество

Шидр Хальмг Таңһчин селәнә эдл-ахун министрин үүлиг цаг зуур дааҗадг Тимур Гаваев Уфа балһснд болсн Әрәсән болн Беларусь орн-нутгудын X хургт орлцв.

Энүнә йовудт олн чинртә күүндвр болв, тер мет хойр орн-нутгин аграрн төрмүдт онц оньг өггдв.
Терүнәс нань Хальмг Таңһчин Толһач Хаска Батун даалһврар «Минск тракторн завод» АО-ла немр бооцан батлгдв. Энүнә йовудт мана таңһчд инвестиционн төсв күцәгдхмн.
Төсв күцәлһнд 50 сай арслң һарһгдхмн. Иим кевәр урднь Минск балһснд батлсн бооцан экләд күцәгдхмн. Хальмг Таңһчд секгдх тетклһнә төвд көдлмшч шин ормс бүрдәгдхмн, эннь региона экономикд эрк биш тусан күргхмн, гиҗ темдглх кергтә.
Өдгә цагт нарт-делкәд тогтсн бәәдләс иштә орн-нутг дотран кеҗ һарһсн эд-тавран болн эдл-уушан олар олзлҗана. Хулд-гүүлгәнә халхд әәмшг уга бәәдл тогтахар шуннавидн, гиҗ Тимур Гаваев келв.

КАРСАНА Евгения

Видео