Һашута өөнд нерәдҗ

01-07-2023, 09:35 | Общество

Эн җил мана таңһчд хальмгуд Сиврт туугдснас авн 80 җилин өөн темдглгдхмн. Эн һашута өөнд нерәдәд, олна үүлдәч, продюсер Виктория Инджикова «Мөңк зул» нертә төсв таңһчин номин болн сойлын үүлдәчнрлә хамдан белдҗәнә. Энүнә тускар «Калмыкия» РИА-н барин төвд шидр болсн брифингин йовудт келгдв.

Көгҗмин наадн хальмг улсин бичәч Балакан Алексейин «Һурвн зург» түүкәр дамҗад тәвгдхмн. Эн җил нертә бичәчин 95 җилин өөн темдглгдҗәнә, тегәд энүнә үүдәвринь шүүҗ авснь темдгтә гиҗ келх кергтә. «Мөңк зул» нертә төсв Сиврт әмнәсн хаһцсн, тенд мөңкинд үлдсн бичкдүдт нерәдгдҗәнә, гиҗ Виктория Инджикова келв.
Балакан Алексейин «Һурвн зург» түүк дунд сурһульмудын көтлврт орна, энүг сурһульчнр нурһлҗдан орс келәр умшна. Зуг түүрвәчин бичсн сәәхн хальмг келәр умшхла улм сән болх бәәсмн, гиҗ филолог номин доктор, РАН-а Хальмг номин Төвин әңгин һардач Римма Ханинова ухан-тоолврарн хувалцв.
Номт Геннадий Корнеевин келсәр, эн төсв йир соньн, дорас өсч йовх баһчудт эрк биш кергтә, тер юңгад гихлә тедн төрскн тууҗан сәәнәр медх зөвтә. Сиврт хальмг көвүд-күүкд бичкнәсн авн күнд көдлмшәс әәлго, хар өдмгин нег тасрхан болн көрә боднцгин төлә көдләд йовсмн. Тегәд арвн һурвн җилдән мана өвкнр ямаран зовлң эдлсинь, эн һашута цагин тускар бичкдүдт медүлх кергтә гив.
«Бамб цецг» ансамблин артистк Ольга Бадрашкиева бииһин эв-арһар наадна һол күслинь медүлхмн. Наадна либретто филолог номин кандидат Кермн Джушхинова бичв. Басңга Баатрин нертә Келн-улсин театрин артист Эренцен Авяшкиев режиссер болҗ наадыг тәвхмн. Келхд, көгҗмин нааднд нурһлҗ бичкдүд орлцхмн. Терүнәс нань Хальмг Таңһчин Баатр Петр Надбитов, таңһчин улсин артистк Вера Тепкеева, тууҗин номин доктор Уташ Очиров эн төсв күцәлһнд тусан бас күргхмн. «Мөңк зул» нертә наадна премьер бар сарин эклцәр болхмн, гиҗ зуралгдҗана.

ОЛЬДАН Цаһан

Видео