Күүнә әм аврҗ көдлнә

01-07-2023, 09:50 | Общество

Эврә сән дурар цусан өгч, күнд гемтә улсин әм аврдг күн өр-өвч седклтә болдгнь лавта. Эдн таньдго улсин төлә эврә цусан өгч, тедн эдгхин төлә дөң-тусан күргнә. Эрүл-менд харлһна көдләчнр дунд донормуд олн болна, юңгад гихлә бачм бәәдл тогтад, гемтә болн шарх-шавта күүнд дарунь цусн керглгдхлә, эдн удан ухаллго дөңгән күргнә. Цус гүүлгдг төвин донормудын әңгиг һардҗадг Дорҗин Софья (зургт) түрүн болҗ хаалһд зеткртә йовдлла харһсн таньл күүкнә төлә цусан өгсмн, тер йовдлын хөөн эн хөр шаху җилин эргцд цусан өгәд, «Әрәсән ачта донор» гидг цол зүүв.

Ик Буурла района Баһ-Буурл селәнд өсәд-боссн Нохан (күүкн цага нер уснь) Софья эцкән болн авһан дураһад дотр-дундын кергүдин органмудын үүлдврлә җирһлән залһх саната билә. Болв 9-ч класст күүкн эмч болхар шиидв. Дунд сурһулян цаһан мөңгн медаль авч төгсәһәд, эн Әәдрхн балһснд медицинск академьд орв. Ик сурһулян төгсәһәд, П.Жемчуевин нертә таңһчин эмнлһнд җилдән көдлв. Дарунь Ик Буурла района эмнлһнә ах эмч Киштән Намруевна Бакаеван дуудврар эн төрскн һазртан күч-көлснә хаалһан эклв. Района түргн дөң күрглһнә станцд баахн эмч бәәрн улсин эрүл-менд харлһна халхд көдләд, түрүн дамшлт хоршав. Селән һазрт түргн дөң күрглһнә станцин көдләчнр бичкдүд болн бөдүн улс гемнсн цагт һарч йовна, тегәд Софья Викторовна олн зүсн дөң күргдгиг дасв. Хөөннь баахн эмч Элст балһсна поликлиникин 6-ч микрорайонд үүлддг әңгд терапевт болҗ көдлв. Әңгин һардач Светлана Маулатовна Азыдова байн дамшлтарн хувалцҗ, олн төрәр сүв-селвгән өгч энүнд эрдмин халхар төлҗхд дөңгән күргв, гиҗ Софья Викторовна темдглнә.
2009-ч җиләс авн 2021-ч җил күртл Дорҗин Софья УФСИН-ә цергллтд эмчәр көдләд, майорин цолта болв. Эн җилмүдин эргцд олн әңгин эмнлһнд эн көдләд, засгла харһсн улст дөң күргсмн. Тедн дунд хуучтань, күнд гемтәнь олн болна, тегәд кен-негнднь эмнлһ кех, эрмдгтә күн болҗахиг иткүлхин төлә цаас белдх кергтә бәәсмн. Софья Викторовнан келсәр, зака эвдәд засгла харһсн бийнь эднә зөвиг эвдҗ болшго тегәд күн болһнд килмҗән тусхаҗ дөңгән күргх кергтә.
Өр-өвч седклтә, цаһан саната, тесвртә болдг төләдән Дорҗин Софья олн җилин туршарт эврә сән дурар цусан өгч, ачта донор болсмн. УФСИН-ә халхар үнн-чик седклтәһәр көдләд, амрлһнд һархларн эн цус гүүлгдг таңһчин төвд көдлмшт һарв. Цусан өгдг улсиг төвин көдләчнр сәәнәр таньна, тегәд эн дарунь иҗлдәд, донормудын әңгиг һардсмн.
- Мини цусн ховр багин цусн болна, тегәд би донор болхар шиидләв. Күнд гемәр гемтсн, зеткрлә харһад шав авсн улст мини цусн туслх гисн ухан нанд урмд өгв. Эврә сән дурар цусан өгснь эрүлмендд туста болдгиг би үүрмүдтән цәәлһнәв, тегәд мини үлгүрәр зәрмнь бас эн җисәнә шунмһа орлцачнр болснь байрта. Мана бүрдәцин улд нидн рекрутингов төв секгдв, бидн цусна, гүлгн гемтә улсин төлә донормудыг олҗ тедниг тоод авнавидн. Урднь иим гемтә улсин төлә онц болн һазадын орн-нутгудын көрңгәс цус авдг билә, ода болхла Әрәсәд федеральн шаңһа регистр тогтагдҗана. Цусна гемтә улст дөң болхин төлә донормудас шишлң кергсл олзлҗ цус авна, теднә цусиг эд-бод кеһәд, хәрү эднд орулна. Энтн 4-6 частан күцәгддг керг-үүлдвр болна. Гүлгн гемтә улсин чимгн химиоэмнлһ авсна хөөн эвдрнә, тегәд терүг шинрүллһнд донормудын дөң керглгднә. Мана төв тиим донормудыг олҗ, күнд гемтә улсин әм аврна, – гиҗ Софья Викторовна келв.
Цус гүүлгдг төв донормудт нерәдҗ олн зүсн керг-үүлдвр бүрдәнә. Дорҗин Софья Альмина күүктәһән болн Данзн көвүтәһән зүркнә болн цусна дусалын кев-янзта һуйрин зүүтә кегдлмүд болһҗ, донормудт белглнә. Тегәд күүкднь донормудын тускар бичкндк цагасн авн сәәнәр меднә, өсәд-босхларн бас сән дурар цусан өгдг болх гиҗ экнь ицҗәнә. Өрк-бүлнь күүкд күүнд хамгин үнтә болна. Александр авальтаһан эдн арвн һар җилдән ни-негн бәәнә. Герин эзн Софья Викторовнан көдлмш ик дааврта болҗахиг медәд, күүкдән асрлһнд, гер-бүүрин олн төр хаһлхд ицлтә үр-иньг болна. Эдн өрк-бүләрн хамдан амрхдан дурта. Данзн көвүнь күсдундур настаһасн авн эцкән дахад заһс бәрдг болв, тегәд эдн Иҗл һолын көвәд палатк углҗ тәвәд, сул цаган сергмҗтәһәр давулна. Ода йистә көвүн йоста заһсч болв яһв.
Одахн Дорҗин Софья сәәхн өөнән темдглв, хамдан көдлҗәдг үүрмүднь, элгн-саднь энүг йөрәҗ, цаһан седклднь ханҗ, бүлән үгән нерәдв. Софья Викторовнан келсәр, әмтнд дөң күргҗ, күүнә әм аврлһн энүнә җирһлин һол керг болв. Ода эн дааврта керг һардҗ күнд гемтә улст дөң күргхин төлә арһ-чидлән нөөлго көдлҗәнә.

ДООҖАН Наталья

Видео