Һанц модна евәлд

01-07-2023, 10:25 | Общество

Хар Булг селәнәс холд биш бәәх һанц модн «Маршрут построен» гидг келн-улсин зуульчллһна мөрә шүүҗ авв. Һанц модн урһҗах әрүн һазр мана таңһчд хамгин хәәртә ормнь болдмн. Сүл цагт һанц модн дүңгәҗәх һазр зуульчнрин оньг авлдг һәәхмҗтә орм болв. Шидр Һанц модн дарани нег хәләврт орлцад, нүр орм эзлв.

«Мана әмтнд энтн хамгин хәәртә һанц уласн модн урһҗах һазр болҗана, – гиҗ эврәннь телеграммканалдан Хальмг Таңһчин Толһач Хаска Бату бичсмн. - Чинртә эн модыг әрүнәр хадһлҗ харлһн мана һол керг. Мадндан хәәртә эн модна чинрин тускар цуг Әрәсәд меддг болҗана. Әрәсән болн нарт-делкән кесг марһанд мана Һанц модн диилвр бәрҗ йовхнь терүгинь медүлҗәнә».
«Маршрут построен» гидг төсв «Комсомольская правда» медиабагин үүдәсн эн мөрә йир өвәрц болсн деерән чинртә ачллһн болҗана. Дотр-дундын туризм делгрүллһнд эннь хамгин чинртә мөрә болҗана. «Маршрут построен» гисн төсв цуг әрәсән кемҗәнд бәәх хамгин соньн болн һәәхмҗтә һазрмудын тускар тодрха цәәлһвр өгдг хаалһин амдач болҗана. Калининградас авн Чукотк күртл, зуучлҗ болх ямаран бәәрн бәәнә, цуг теднә тускар эн төсвәс медҗ болхмн. Хамгин ик балһсдас авн бичкн селәд күртл альд соньн нег ормн бәәнә терүг эн төсвин дөңгәр олҗ болхмн. Инновационн кластермүдт күрсн деерән йиртмҗин зерлг бәәдлиг хадһлҗадг бәәрнс күртл күрч болх арһ эн төсв өгнә.
2022-2023-ч җилмүдин йовудт эн мөрән марһан хойрдад давв. «Маршрут построен» гидг мөрән марһанд кесг номинац орсн билә. Цуг терүнднь әмтн, предприятьс, организацс, сойлын учрежденьс орлцв. Кесг төсв болн һәәхмҗтә тоот хәләврт бас орулгдв. Келхәс, зуульчллһн соньн болн мартгдшго болхд туслхин тоотыг жюри шинҗлҗ хәләв.
«Комсомольская правда» газетин умшачнр марһана ашинь диглсн үүлдврт орлцҗ, эврә дууһан өгв. «КП» радион соңсачнр чигн дууһан өглһнд орлцв. Жюрин ханьд зуульчллһна халхин көдләчнр, олна организацсин элчнр болн сойлын үүлдәчнр орв. Әмтн олар дууһан өгч темдглгдсн тоотас хамгин тааслтта бәәрнсиг болн һәәхмҗтә ормсиг йилһҗ авв.
Хальмг Таңһчин Һанц уласн модн «Место силы» гидг номинацд марһанд орсн билә. «Күчн-чидлин һазр» – энтн заповедникүд, паркс, зоопаркс, ботаническ урһа модд, өөр эргндк йиртмҗиг харлһар ик үүлдвр күцәҗәх экологическ бәәрнс болҗана. Әмтн дууһан өгсн кемд Һанц модна төлә 50 миңһ һар күн дууһан өгсинь темдглх кергтә. Тер учрар эврә номинацдан Һанц модн дииләч болв.
Һанц модн – таңһчин чинртә йиртмҗин бумб болҗана. Күчн-чидлин хәәртә һазрур цуг делкәһәс бурхн-шаҗнд шүтдг улс зуульчлҗ ирнә. Нааран ирсн әмтн зальврад, ни-төвкнүн болн эвин бәәдлд бәәхин тускар бурхдас дөң сурна.
Һанц модн 2008-ч җилд региональн чинртә йиртмҗин бумб гиҗ шиидгдсмн. 2015-ч җилд Әрәсән хамгин ут наста моддын реестрт орулгдсмн. Әмд йиртмҗин цугәрәсән чинртә бумб гиҗ зарлгдсмн.
Әрүн чинртә эн модна өөр бурхн-шаҗна керг-үүлдврмүд күцәгднә. Үрс сарин байриг ашлгч мөргүл энд шидр болв. Нааран таңһчин әмтнәс нань һазадын ордудас олн күн ирдг болв. Зун җил хооран Дала ламд баралхҗ одсн шаҗна багш Пурдаш гелң тер әрүн һазрас авч ирҗ суулһсн моддас энд уңгнь батрҗ үлдсн модн хальмгудтан йир хәәртә болҗана.

УШКАНА Сувсн