Нармин Морхаҗин дәәнә цага девтрмүд

01-07-2023, 10:30 | Общество

Хальмгин Келн-улсин архивд соньн һәәхүл секгдв. Терүнднь бичәч болн Төрскән харсгч Алдр дәәнә орлцач Нармин Морхаҗин дәәнә цага девтрмүд тенд үзүлгдҗәнә.

Төрскән харсгч алдр дәәнд Нармин Морхаҗ эврә дурарн мордсмн. Үзсн болн медҗ авсн тоотан баһ наста дәәч бичҗ йовсмн. Келн-улсин архивин көдләчнр дәәнә цагт цааснд буулһҗ бичҗ авсн Нармин Морхаҗин тодлврмудыг тооһин технологәр белдҗ, ода олна оньгт тусхаҗана.
Сталинградск дәәлдәнә тускар баһ наста Морхаҗ бичсинь умшхд соньн. Балһсн тиигхд ямаран бәәдлд бәәснә тускар бәрәнд авгдсн немшнрин тускар, советск салдсмудын залу-зөрмгин тускар девтриг умшад медҗ авнач. Күүкд санинструктормуд дәәнә һалас шавта цергчнриг авч һарад, теднд дөң болҗ ик күнд көдлмш кеҗәснә тускар девтрт йир тодрхаһар бичгдсн бәәнә. Бүслврт авгдсн немшнрин бәәдл ямаран бәәсиг түүрвәч девтртән үзүлҗәнә. Муурсн, гемтсн әмтн үвлин киитнд гиигн һоста, зүсн-зүүл кенчрәр бийән орасн хортна салдсмуд тиим күчр бәәсинь девтртнь орсн бәәнә.
«Сталинградск дәәллдән ямаран күчтә болсинь, дәәнә йовудыг уңгарнь сольсн дәәллдәнд кедү күн хорсиг, кедү олн күн тер дәәлдәг белдҗ, диилвр тетксиг медҗ авхд тер аврлт уга дәәнд орлцсн күн нүдәрн үзсн тоотан бичҗ үлдәснь ик чинртә», - гиҗ Хальмг Таңһчин правительствин аппаратын архивмудын төрәр үүлддг әңгин һардач Эльза Улюмджиева ухан-тоолврарн хувалцна.
Келн-улсин архивд Нармин Морхаҗин материалмудын шишлң саң хадһлгдҗана. Терүнд - 500 документ орсн бәәнә. Бичәчин һар бичмр, дегтрмүд белдлһнд олзлҗасн тоот, статьяс, бичгүд болн нань чигн материалмуд энд хадһлгдҗана. Таңһчд мал өсклһиг делгрүллһәр энүнә кеҗ йовсн көдлмшиг герчлҗәх тоот чигн баһ биш бәәнә. Нармин Морхаҗин өрк-бүлнь бичәчин хувц-хунриг болн нань чигн терүнә олзлҗ йовсн тоотыг архивд орулҗ өгсмн. Таңһчин әмтн цуг тер тоотла Келн-улсин архивд ирҗ таньлдҗ чадҗана.
Төрскән харсгч Алдр дәәнд орлцсн бичәчин бәәдл-җирһл болн үүлдвр баһчудт төрскнч седкл сурһлһнд йир сән үлгүр болҗана.

ҖИРҺЛИН Кермн