Зөргтә цергчнриг ачлв

04-07-2023, 09:25 | Общество

Шидр Росгвардин медлд бәәдг түргн шишлң багин (СОБР) 30 җилин өөнд нерәдсн хург болв. Хальмг Таңһчин Толһач Хаска Бату, Улсин Хуралын (Парламентин) ахлач Анатолий Козачко, таңһчин Залврин ахлач Босхмҗин Гилән, таңһчин Росгвардин һардвр болн цергчнр энүнд орлцв.

СОБР-ин тууҗ 1993-ч җиләс авн эклнә. Тиигхд терроризмиг уга келһнә туст шишлң баг бүрдәгдв, терүнә ханьд СОБР орв. Така сарин 1-д эн баг бүрдәгдснә өдр болҗ тоолгддг. 2010-ч җилд болхла Әрәсән Президентин медлд бәәдг геральдическ комиссь багд «Кречет» нер батлв. Онц темдглхәс, эн шишлң багин хойр офицер Баатр Гиндеев болн Магомед-Казим Гайирханов Әрәсән Баатрин өөдән нер зүүсн болдг.
Хальмг Таңһчин Толһач Хаска Бату СОБР-ин ветеранмудыг, цергчнриг ончта өөнләнь йөрәв. Энүнә темдглсәр, СОБР орн-нутгин амр биш йирдгч җилмүдин эклцәр бүрдәгдсн билә. Түрүн өдрәсн авн эндр күртл багин цергчнр Әрәсән олн-әмтнә төлә әәмшг уга бәәдл тогтаҗ йовна. «Кречет» багин күцәсн кергүднь кемҗәһәрн олн гиҗ келх кергтә, терроризмәс гетлдг шишлң кесг керг-үүлдвриг давулҗ, олн-әмтиг харсч, зер-зевтә зака эвдсн улсиг бәрҗ авлһнд тусан күргнә гив. Тер мет Бату Сергеевич 2010-ч җилд Дагестан Республикд шишлң керг-үүлдврт орлцсн болн әмнәсн хаһцсн офицермүд Магомед-Казим Гайирхановин болн Александр Эрдниевин туурмҗиг тодлҗ санлынь тевчв.
Хургин йовудт Бату Сергеевич өдгә цагт цергә шишлң керг-үүлдврт орлцҗадг эн багин цергчнриг темдглҗ, эдн Төрскнәннь төлә кергән күцәҗ, гертән эрүл-менд ирхиг дурдв.
Һучн җилин туршарт СОБР-ин цергчнр хамдан көдлҗ йовсн үүрмүд дунд күндллһ болн тоомср олсн болдг. Эндр СВО-н йовудт зөргтә кевәр әмән әрвллго даавртаһар көдлҗ йовх цергчнрлә бат залһлда бәрҗ йовнавидн. Нег үлү СОБР-ин ветеранмудт онц ханлтан өргҗәнәв, гиҗ таңһчин Росгвардин һардач, полковник Нарн Настинов йөрәҗ келв.
Темдглхд, хургт ончрсн хөрн һар СОБР-ин цергч медальмүдәр болн талдан кесг темдгүдәр ачлгдв.
Хальмг Таңһчин ачта артистк Анна Очкаева болн «Бамб цецг» ансамбльд орлцачнр билг-эрдмән үзүлҗ олыг байрлулв.

КАРСАНА Евгения

Видео