Уул хальмг келән делгрүлий!

04-07-2023, 09:30 | Общество

Күндтә мана умшачнр! Мөчн сарин 30-д 2023-ч җилин хойрдгч өрәлд «Хальмг үнн» газетд бичгдлһнә кем төгсв. 3500 күн мана газетиг бичүлҗ авсмн. Эн туст хамгин түрүнд Лаганя, Октябрьск, Целинн, Яшалтан райодын бәәрн улст, райодын толһачнрт онц ханлт өргҗәнәвидн. Эн райодт йоста төрскнч седклтә, хальмг келндән хару улс бәәхнь ил медгдҗәнә. Харм төрхд, Көтчнрә, Ик Буурла, Приютна, Баһ Дөрвдә, Сарпан райодт умшачнрин то зөвәр баһрҗ одв. Юн болҗ одсмн? Энд төрскнч улсин то баһрв яһв? Аль мини нег нәәҗин келсәр, Сарпулин, Аһшин, Әәдрхнә бәәрн улс бичүлҗ авх зөвтә гиж санҗант? Бидн, Хальмг Таңһчин бәәрн улс, эврә газетән эс бичүлҗ авхла, эврә келәрн эс күүндхлә, талдан һазра әмтн мана келиг дасшго, газетиг бичүлҗ авшго! Ода яахмб?

Төрскн газетән дөңнсн эңкр мана умшачнрт кезә чигн икл гидг ханлтан өргҗәнәвидн! Эн нарт-делкә деер хальмг келәр һардг ор һанцхн газетиг бичүлҗ авснд бидн маш байрта бәәнәвидн. Тадн газет бичүлҗ авсн деерән хальмг кел делгрүллһнд, батруллһнд эврә тәвцән орулҗанат!
Хальмг келн чинрән гееҗәнә, удл уга олзлгддган уурх гиҗ нарт-делкән ЮНЕСКО бүрдәц ашлвр кев. Келн уга болхла, мана Хальмг Таңһч чигн бәәдгән уурвза! Тегәд хальмг күн эрк биш төрскн келән дасх зөвтә, тер келнь энүнә махн-цуснд орсн юмн. Өдгә цагин эв-арһсиг олзлхла төрскн келән амрар дасч болхмн. Мана өвкнрин туурмҗта тууҗин тускар баһчудтан өргнәр медүлхмн.
Эн җил дегц бидн мана хальмг үндсни тод бичгин 375 җилин өөн темдглҗәнәвидн. Цуг эн тоот мана сойл, үндсни заңшал, авъяс делгрүллһнә нег арһ-билг болҗана. Хальмг келән геех зөв угавидн, авъясан сергәҗ, тууҗан дасч төрскнч седклән батрулх кергтә, хальмг күн болһн төрскн келән медх зөвтә, мана таңһчд бәәдг талдан келн-улс бас мадниг дөңнҗ, хальмг кел дасад бәәхнь лавта. Тегәд, мана эңкр умшачнр, цуг арһ- чидлән агсҗ уул хальмг келән делгрүлий! Күн болһн эврәннь тәвцән орулхла, мана келн бөкшго гиҗ нәәлҗәнәвидн! Бидн хамдан!

БЕМБИН Евгений

Видео