Таңһчин нертә улс ачлгдв

08-07-2023, 09:00 | Общество


Така сарин 5-д Элст балһснд болн таңһчин райодар Хальмгин сән Өдр өргнәр темдглгдв. Сән авъяст тохрсар, төрскн һазр-усна делгрлтд ик тәвцән орулсн улст кесг ачлврмуд бәрүлҗ өггдв.

Элстд Н.Пальмовин нертә Келн-улсин музейд Хальмг Таңһчин Толһач Хаска Батун, Улсин Хуралын (Парламентин) Ахлач Анатолий Козачкон, таңһчин Залврин Ахлач Босхмҗин Гиләнә, министерствсин, ведомствсин, зөв-йос харлһна органмудын һардачнрин, шаҗна элчнрин болн райодын толһачнрин орлцлһтаһар байрин хург болв.
– Мана улсин ач-тусин нилчәр Хальмг Таңһч өсәд-өргҗәд йовна. Олна кергин төлә ик тәвцән орулсн улст ханлтан өргҗәнәв. Тадна үлгүрәр нег һазра цуг улс негдәд, кен-негән дөңнәд, төрскн отг-әәмгиннь төлә, нег үлү Әрәсән цецгәрлтин төлә көдлх зөвтә, – гиҗ таңһчин Толһач Хаска Бату йөрәлин үгдән темдглв.
Эн җиләс авн мана региона делгрлтд ик тәвцән орулсн улс урднь таңһчиг чадмгар һардҗ йовсн нертә үүлдәч, Советин Союзин Баатр Б.Б.Городовиковин нертә орденәр ачлгдхмн. 2021-ч җилд иим өөдән ачлврин туст Хальмг Таңһчин Толһач Хаска Бату седвәр татсн билә. Эн седвәриг цуһар дөңнҗ батлсн болдг.
Шидр Хальмг Таңһчин сән Өдрлә Советин Союзин Баатр Б.Б.Городовиковин нертә орденәр күндтә болн тоомсрта мана һазра зурһан күн ачлгдв. Хальмг Таңһчин күндтә иргн, Әрәсән күч-көлгнә ачта көдләч Хасан Бикбулатов, таңһчин ачта агроном, селәнә эдл-ахун кандидат Борис Гольдварг, номт, Б.Б.Городовиковин нертә Хальмг ик сурһулин профессор Биткән Петр, эмч-травматолог Хоньна Валерий, И.Г.Карпенкон нертә Приютна лицейин багш Людмила Качанова болн Үстин района КЦСОН-а көдләч Чумда Наталья өөдән ачлвр авв.
Хасан Бикбулатовин келсәр, региона өдгә цагин һардвр урднь таңһчин цецгәрлтин төлә седклән тәвҗ көдлҗ йовсн улсиг темдглҗәхнь йир сән йовдл гив. Б.Городовиковин келдгәр, цуһар олна төлә негдх зөвтә. Олна төлә күцәҗәх кергин тускар хөөннь дегтрмүдт бичгдх, гиҗ Басан Бадьминович келдг бәәсмн. Чадмг һардач иргч үйин төлә сән ул тогтасн болдг, гиҗ Хасан Васимович тодлв.
Тер мет «Әәдрхн-Кизләр» дәәнә цагин чинртә хаалһин тосхлһнд орлцсн ах үйин улс Җекин СаңһҗҺәрә болн Мукан Сарң «Хальмг Таңһчин күндтә иргн» гидг нер зүүв.
– Бичкнәсн авн ик зовлң үзҗ, кесг җил давад өдгә цагт «Хальмг Таңһчин күндтә иргн» гисн өөдән нер зүүхв гиҗ сандго биләв. Таңһчин Толһач Хаска Батуд болн таңһчин һардврт ханлтан өргҗәнәв, – гиҗ Сарң Шараевна келв.
Терүнәс нань көдлмшин халхар күцәмҗ бәрсн мана һазра олн улс Әрәсән Президентин Күндллһнә Һашгудар, Ханлтын бичгүдәр болн талдан темдгүдәр ачлгдв.
Хальмг Таңһчин Толһачин хайгар Әрәсән Залврин һардачнрин, регионмудын толһачнрин болн орн-нутгин агентствсин, компаньс-бүрдәцсин нерн деерәс йөрәлин бичгүд ирсмн.

КАРСАНА Евгения

Видео