Дурна болн итклин төлә

08-07-2023, 09:15 | Общество

Эндр мана орн-нутгт өрк-бүлин, дурна болн итклин Өдр темдглгдҗәнә. Эн сән өдриг бидн 2008-ч җиләс авн темдглдг болвидн, ниднәс авн эн шаңһа байрин өдр болв. Эн өдр хөрн тавн шаху җилдән хамдан ни-негн бәәдг, күүкдтән чик сурһмҗ өгсн өрк-бүлмүдиг йөрәҗ, «Дурна болн итклин төлә» гидг медаляр ачлдг авъяс бәәнә. Мана таңһчд өцклдүр байрин керг-үүлдврмүд болв, терүнд олн җилдән ниитәһәр бәәдг өрк-бүлмүдин ач-тус темдглҗ ачлвринь бәрүлҗ өгв.

Элст балһснд болсн байрин хургт Анатолий Иванович болн Екатерина Очировна Конушевихн «Дурна болн итклин төлә» гидг медаляр ачлгдснь күүкдтнь болн ачнр-зеенртнь ик бахмҗ үүдәв. Эдн тәвн җилдән ээмээмән түшлдәд, нег-негнәннь седкл медҗ, ниитә бәәнә. Хол 1973-ч җилд эдн өрк-бүлән өндәлһәд, отг-әәмгтән күндтә болн тоомсрта улс болв. Герин эзн бийнь Сарпан района Аршан Зелмн селәнд өсәд-боссн күн болна, авальнь Шарнут селәнәс мөн. Эдн төрскн Сарпан, хөөннь Октябрьск райодт көдлҗ йовсмн, 1990-ч җиләс авн Элст балһснд бәәнә. Анатолий Иванович олн җилдән селәнә эдл-ахун, нефть эд-бодг кедг халхар көдлв, Екатерина Очировна болхла юристин эрдмтә, эн кесг күүнә зөвинь харссн төләдән Хальмг Таңһчин ачта адвокатын өөдән цол зүүв. Ода эдн ачта амрлһнд бәәнә, һурвн үрнәннь болн ачнр-зеенриннь кишгт багтҗ, эдндән чадсарн дөң болна. Эдн герин һаза олн зүсн зер-земшин модд урһаҗ, элвг урһц хураҗ элгн-садан тоона. Ачнр-зеенрнь ирхлә, аав ээҗ хойрнь теднән альд суулһхан медхш.
- Авальм шимтә болн сенр хот-хол болһна, гиичнр орҗ ирхлә цугтаһинь тоона, һуйрин зүүтә кегдлмүднь цугтаднь таасгдна, тегәд герин үүдн хаагдхш. Ачнр-зеенр сад-һарудт маднд нөкд болад, зер-земш цуглулна, хөөннь терүг эд-бод кеҗ үвлд белднәвидн. Сән өдрмүдин байр болхла күүкд болн ачнр-зеенр бас манад цуглрҗ, хамдан нәәрлнәвидн. Өрк-бүлин Өдрлә эдн маднд белгән авч ирнә, экдән цецгүд белглнә. Эн җил бидн ханьцад тәвн җил болв, тегәд эрк биш өрк-бүләрн болн элгн-садарн эн ончта өөниг темдглхвидн. Өрк-бүлин байр зарлснь йир сән гиҗ тоолҗанавидн. Эндрк күнд цагла өрк-бүл бат болн ниитә болхла, цуг мана орн-нутг чигн бат болхнь маһд уга. Дурн болн иткл өрк-бүлин ул болна, тегәд нег-негән күндлҗ тевчх, өөрхн улсан сәәнәр хәләҗ килмҗән тусхах кергтә. Эк-эцк хойр күүкдтән чик сурһмҗ өгч, дөң-түшг болх, үрднь болхла җирһл заясн эк-эцкән тевчҗ, ачинь хәрүлх зөвтә болҗана. Өрк-бүлнь ниитә болхла, күүнә седкл амр, тогтун болдг, - гиҗ Анатолий Иванович келв.
«Дурна болн итклин төлә» гидг медаляр ачлгдсн Конушевихн болн нань чигн кесг өркбүл нег һазра улс дунд күндтә, ачта болн тоомсрта улс болна. Эдн олн җилин эргцд дурна залян хадһлҗ, өлзәтә сән үрд өскв. Өрк-бүл болһнд дурн болн иткл хамгин һоллгч улнь болҗ, җирһлин хаалһар хамдан йовхд урмд өгнә. Эднә тоолврар хамгин түрүнд нег-негән дөңнҗ, ниитә бәәх кергтә, тер цагт ямаран чигн төр хаһлҗ болхмн. Дурн болн иткл өрк-бүлин хойр җивр болҗ, сәәхн җирһлд күрхд дөң болхнь лавта.

ДООҖАН Наталья

Видео