Заһсчиг магтҗ

08-07-2023, 09:20 | Общество

Җил болһн така сарин хойрдгч нарн өдрлә мана орн-нутгт Заһсчин сән Өдр темдглнә. Эн өдрлә заһс аңнлһна халхар көдлдг улсиг йөрәнә. Сән Өдр угтҗ таңһчин селәнә эдл-ахун министерствин барин цергллт хаврин заһс аңнлһна кемин ашин болн намрин зуран тускар зәңглв.

2023-ч җилин заһс аңнлһна хаврин кем лу сарин 15-ас авн хөн сарин 20 күртл болв. Эн җилин йовудт Көк теңгст 3633,5 тонн заһс аңнхар зуралгдв. Хаврин кемлә заһс аңнлһнд долан бүрдәцин 305 заһсч орлцв. Энүнә ашар 816,8 тонн теңгсин эдл-ууш бәргдв. Тер тоод 636,5 тонн ик заһсн, 180,3 тонн үүрмг заһсн мөн. Хамгин элвгәр сазн, җаал, цуув, кет балг бәргдсн билә. «Джалыково» АО, «Каспий» ООО болн Хальмг Таңһчин заһс аңнлһна халхар үүлдг арһлачнриг дөңнлһнә саң күцәмҗтәһәр көдлв, гиҗ темдглх кергтә.
Теңгрин бәәдл чигн харшлтан күргәд бәәв. Келхд, заһсчин көдлмш йир күнд, теңгрин бәәдлиг эрк биш учртан авх кергтә болна.
Әмтн заһсиг олар таасад энүг көргәһәд Элстд, Лаганьд болн хам-хоша бәәдг селәдт хулдв. Тер мет утсн болн хатасн заһсн бас хулдгдна.
Зунар амрад, заһсчнр оңһцсан болн гөлмән ясч намрин кемд эртәснь белдҗәнә. Намрин заһс аңнлһна кем һаха сарин 11-д экләд бар сарин 10 күртл давхмн. Намрар заһсчнр 3,2 тонн заһс бәрҗ, зураһан 90 процентд күцәхәр зүткчәнә, энүнә төлә цуг таал бәәнә.
Маңһдур авъяст тохрсар, Лагань балһснд заһсчин сән Өдрт нерәдсн керг-үүлдвр болхмн. Өрүн дөрвн часла шинкн нарн боссн кемлә заһсчнр дунд марһан давулгдхмн. Йисн часла болхла теңгст аюлла харһад, әмнәсн хаһцсн заһсчнрин санлынь тевчәд, Заһсчин бумблвд гүрмр цецгүд тәвгдхмн. Хөөннь «Көк теңгсин айс» нертә паркд цааранднь байр давулгдхмн. Тенд ирлцңгү һәәхүл, тер мет «Заһсн-фест» марһан бүрдәгдхмн. Энүнә йовудт заһсна зүүтә зүсн-зүүл хот кеҗ гиичнриг тоохмн.
Онц темдглхд, байрин йовудт заһсна эдл-ахун халхар ончрсн көдләчнр Күндллһнә һашгудар болн Ханлтын бичгүдәр ачлгдхмн. Тедн дунд А.К.Дорджиев, М.О.Кекеева, В.Ф.Каримов, М.З.Курманов, Н.Н.Тумудова заагдхмн.
Заһсна эдл-ахун халхар үүлдҗәдг көдләчнриг сән Өдрләнь йөрәҗ, эрүл-менд болн олн зүсн заһс икәр бәртхә гиҗ дурдҗанавидн.

БАДМИН Занда

Видео