Олн җилдән селәнә поштд көдлв

08-07-2023, 09:25 | Общество

Така сарин хойрдгч нарн өдрлә Цугәрәсән поштын Өдр темдглгднә. Өдгә цагт мана орн-нутгт дөчн миңһн һар поштын әңг көдлнә. Җил болһн эн әңгүдәр дамҗад һурвн тербум һар бичг болн талдан тоот илгәгднә. Эн өдр угтҗ, Төрскнәннь босхмҗд тәвцән орулҗ, поштын халхар олн җилдән седклән тәвҗ көдлсн нег һазра улсин тускар бичх седвәр үүдв.

Яшкулин района Хар Толһа поселкд олн җилдән Бускомже Исяевич болн Анастасия Егоровна Ахаджаевихн көдлҗ йовла. Эдн хоюрн туугдсн хальмгудын өрк-бүлмүдт төрскн теегәсн хол һазрт һарсмн. 1975-ч җилд эдн өрк-бүлән өндәлһҗ, даруһас Әәдрхнә мүҗәс Яшкулин районд нүүҗ ирв. Көвүн күүкн хойран сән сурһмҗ, сурһуль өгәд өскв.
Анастасия Егоровна Яшкулин района Хар Толһа поселкин поштын әңгд хөрн долан җилдән көдлв. Түрүләд энд поштын эгл көдләч бәәсмн, даруһас болхла әңгин һардачд шиидгдв. Анастасия Ахаджаеван тодлсар, урднь мана орн-нутгин бәәрн улс олар умшдг бәәснь нуувч биш. Эн учрас таңһчин, района, орн-нутгин чигн барин һарцст цуһар бичгддг билә. Ода санхнь поселкд бәәдг өрк-бүл болһн «Хальмг үнн», «Искра» һарцсиг даңгин бичүлҗ умшдг билә, гиҗ Анастасия Егоровна тодлна.
Тер мет поштын әңгд лотерейин билетмүд олар хулдгддг билә. Терүнәс нань урднь өдгә цага интернетын эв-арһ уга болад, поселкин әмтн талдан регионмудт сурчадг үрдтән поштар хамг юм илгәдг бәәсмн. Дамшлтта, дааврта һардач А.Ахаджаева көдлмшин халхар авсн зураһан даңгин күцәдг билә. 2004-ч җилд Анастасия Егоровна ачта амрлһндан һарв. Даңгин көдлмштән бәәдг күн гертән хара сууҗ чадлго, поштд баһчуд көдлмшән яһҗ диглсинь медхәр орҗ ирдмн. «Почта России» ФГУП-ин, Яшкулин района муниципальн бүрдәцин болн талдан чинртә Күндллһнә һашгудар эн ачлгдсн билә. 2005-ч җилд болхла Анастасия Ахаджаевад «Әрәсән залһлдана эрдмч» гидг өөдән нерн зүүлһгдв.
Авальнь Бускомже Ахаджаев болхла селәнә эдл-ахун халхар олн җилдән көдлсн болдг. Тер җилмүдт тәрә тәрлһнә төлә олн гектар аһу һазр олзлгддг билә. Урһц хуралһна көдлмшт болхла Бускомже Исяевич даавртаһар орлцдмн. Трактор, комбайн, ус зөөдг машин болн талдан көлг эн чадмгар залдг билә. Теегт көдлмш чилдмн биш, тегәд баһчудыг эн кергт орлцулад, механизатор Б.Ахаджаев дамшлтарн хувалцҗ, тедниг дасхдг бәәҗ. Хамдан көдлҗ йовсн үүрмүд дунд күндллһ болн тоомср олсн мергҗлт мөн. Олн җилдән седклән тәвҗ, селәнә эдлахун халхд тәвцән орулҗ, үнн-чик седклтәһәр көдлсн төләднь Бускомже Исяевич Күндллһнә темдгүдәр ачлгдсмн.
2014-ч җилд Ахаджаевихн Элстүр нүүҗ ирв. Өдгә цагт эдн Байрта күүкндән нөкд болҗ хойр зееһән хәләҗ бәәнә. Герин хашад аав-ээҗнь бичкн һаруд тәрәд, темс урһаһад, зер-земшин модд суулһв. Үвлд белдәд, ээҗнь зер-земшәр әмтәхн шүүс болн талдан сенр тоот кенә.
Иим ачта, тоомсрта улс таңһчиннь цецгәрлтин төлә олн җилдән райодын селәдт, поселкудт көдлҗ йовла. Теднә күцәмҗнь, күч-көлснә туурмҗнь дорас өсч йовх баһчудт, ачнр-зеенртнь эрк биш үлгүр болх зөвтә.

КАРСАНА Евгения

Видео