Цергчнрин өрк-бүлмүдинь дөңнҗ

08-07-2023, 09:35 | Общество

Сара хонг хооран мана таңһчд орн-нутгин цуг регионмудт мет «Төрскән харсачнр» нертә саңгин әңг секгдсн билә. Давсн сарин туршарт энүнә хайгар зун һар күүнәс олн зүсн эрлһн ирв.

Эн саңгин региональн әңгин һардач Хаалһин Очрин келсәр, нурһлҗдан әмтн социальн дөңнлтин туск сурврмуд өгнә. Медицинск, юридическ болн талдан халхар дөң күргҗ туслнавидн. «Төрскән харсачнр» саңгин региональн әңгд дааврта, цаһан седклтә, һольшг улс көдлнә. Ниитә баг болад көдлснд цугтаднь ханлтан өргҗәнәв, гиҗ Очр Владимирович темдглв. Келхәс, эн әңг таңһчин кесг бүрдәцлә нөкцлтҗ хамцу үүлдврән давулхар үгцсн болдг.
Темдглхд, шишлң цергә керг-үүлдврин йовудт әмнәсн хаһцсн болн өдгә цагт церглҗ йовсн нег һазра улсин өрк-бүлмүдтнь онц оньг тусхагдна. Тер мет шидр «Ойрат-Арена» спортын төвд СВО-н йовудт әмнәсн хаһцсн болн эндр Төрскән харсч йовдг цергчнрин өөрхн улсин орлцлһтаһар хург болв.
«Төрскән харсачнр» саңгин әңг, Төрскнә цергчнрин өрк-бүлмүдин ниицән Хальмг Таңһчин спортын министерствлә болн «Ойрат-Арена» төвин һардврла үгцҗ, тенд бәәдг бассейнд болн спортивн залд СВО-д орлцачнрин өөрхн элгн-саднь өңгәр ирдг зөвтә болв.
«Ойрат-Арена» спортын төвин һардач Муджика Борисин темдглсәр, Төрскән харсад әмнәсн хаһцсн цергчнрин өрк-бүлмүдинь эрк биш дөңнҗ, теднд онц оньган тусхах кергтә. Зовлңгинь хувалцҗ, теднә үрдинь спортд орлцулҗ, бәәдл-җирһлинь ясрулхар шуннавидн гив.
Цергә шишлң керг-үүлдврт орлцачнрин өркбүлмүдтнь цаһан седкләсн дөң болхар зүткнәвидн, «Ойрат-Арена» СК-н һардврт ахр цагин болзгт иим шиидвр авснднь ханлтан өргҗәнәвидн, гиҗ Хальмг Таңһчин Олна палатын һардач Мучан Баатр келв.
Харһлтын чилгчәр СВО-н йовудт әмнәсн хаһцсн болн өдгә цагин цергчнрин өөрхн элгн-саднднь шишлң цаас бәрүлҗ өггдв.

ОЛЬДАН Цаһан

Видео