Көк теңгст йовдг зөргтә заһсчнрт нерәдҗ

11-07-2023, 09:05 | Общество

Җил болһн орн-нутгт така сарин хойрдгч нарн өдрлә заһсчин сән Өдр темдглдг биший. Энүнлә ирлцҗ мана таңһчд чигн заһс аңндг, заһсна зүүтә эдл-ууш кеҗ һарһдг улс бас эврә байран өргнәр темдглдгнь ода нам сән авъяст тохрв яһв. Зуг эн сән Өдр Лаганя района ,энд бәәдг заһсчнрин,эн һазра улсин төлә чигн хамгин чинртә болҗ үнлгддгнь мел үнн юмн. Тегәд давсн нарн өдрлә лаганяхн эн байран шуугадниргәд,байрта- бахтаһар, өргмҗтәһәр давулв гиҗ келх кергтә.

Әрә өр цәәсн кемд ик- баһ уга, залусла әдлхн күүкд улс чигн һахулян бәрҗ усна көвә тал адһв. Өрүн өрлә,дөрвн часин алднд,энд бәәрн заһсчнр бәәтхә энд- тендәс гиичд ирсн улс бас ирлцңгү марһанд орлцхар олар цуглрснь хәләһәчнриг зөвәр соньмсулв.
Балһснд сән кец- таал тогталһна туст күцәгдсн шаңһа төсвин йовудт Лаганьд “Көк теңгсин айсмуд” нерәдлһтә кесәәхн шин парк секгдсн билә.Тегәд ода олна нәр минь энд давулгддг болснь басл орта болв. Сүл саамд мана таңһчин райодар “махн-фест”, “тутрһ-фест” болн нань чигн өвәрц марһас бүрдәгдҗәхнь кен- негинь соньмсулҗ,өврмҗтә эс болҗану? Тиигхлә Лаганя район юуһарн темдгтә,өвәрц болдгнь гихлә минь энд заһс аңнлһна,заһс эд-бод келһнә бүрдәцс өргнәр делгрҗәхинь цугтан меднә биший.Энүнәс нань лаганяхна улсас деерәр заһсна зүүтә шимтә,сенр әмтәхн хот-хол кеҗ чаддгнь нань олдхий?Тоота боллта… Кедү дәкҗ эн һазра нәәрт орлцҗ,белдсн зүсн-зүүл хотынь амсчанав,тедү дәкҗ өврәд-бахтх саам чигн учрна.
Тегәд эн өдр “заһсн-фест” гидг соньн марһан давулгдсиг хәләхәр әмтн олар цуглрҗ ирснь тер. Шин паркин усна көвәд заһсна шөлн белдгдв,углҗ тәвгдсн ширәс эргҗ суусн кен- негнь шарсн,утсн,хатасн олн зүсн заһс амсад һарв. Эн марһанд района бүрдәцс,СМО-с,бәәрн улс чигн шунмһа кевәр орлцсинь заах кергтә. Шишлң жюри ашинь һарһсн саамд марһанд орлцачнр яһҗ бәәрән кеерүлсинь,ямр хувцтаһар гиичнрән тосч авсинь,белдсн хотын амтынь,бәәдлинь чигн тоод авсмн.
Хальмг Таңһчин селәнә эдл-ахун министрин үүл дааҗадг Тимур Гаваев,Улсин Хуралын (Парламентин) депутат Борис Муджиков, депутатнрин Элстин Хургин депутат Аюка Хасиков, таңһчин финансин- бюджетин Цергллтин һардач,нег һазра Санл Дордҗи-Горяев ахта лаганя улсла байринь хувалцхар ирснь басл темдгтә болв. Эдн цугтан Лаганя района толһачин зөвиг цаг зуурт күцәҗәдг Юрий Когаевла,Лагань балһсна муниципальн бүрдәцин толһач Геннадий Очировла болн района эмнлһнә ах эмч Николай Шараповла хамдан балһсна тал дунд дүңгәҗәдг Көк теңгсин көвәд түрүн болҗ бәәршлсн заһсчнрт нерәдгдсн Заһсчин бумблвд гүрмр цецгүд тәвв. Дарунь байрин керг-үүлдвр эклв. Депутатнрин Элстин Хургин депутат Аюка Хасиков Хальмг Таңһчин Толһач Бату Хасиковин нерн деерәс цуглрсн улсиг заһсчин сән Өдрлә йөрәһәд, цуг халхарнь күцәмҗ дурдв. Таңһчин Улсин Хуралын(Парламентин) Ахлачин болн цуг депутатнрин нерн деерәс Борис Муджиков йөрәлин үг келәд,олн җилин туршт ниитәһәр бәәҗ,күүкдтән сән сурһмҗ өгсн Горяевихнә,- Сараевихнә, Музаевихнә болн Саңһҗ-Горяевихнә бүлмүдт “Дурна болн итклин төлә” гидг медальмүд бәрүлҗ өгв.
Нег һазра улсан Юрий Когаев бас бүләнәр йөрәһәд, бәәрн күч-көлсчнр заһсна эдл-ахун болн Лаганя района экономикин делгрлтд аһу ик тәвцән орулҗахинь онц темдгләд,заһс аңнлһна төрәр бәәдг Федеральн агентствин Иҗлин-Көк теңгсин һазра Заллтын Хальмг Таңһчд үүлддг әңгин һардач Валерий Басанговд Хальмг Таңһчин Залврин Күндллһнә Һашг бәрүлҗ өгв. Заһсчнр Вадим Каримов болн Мухтар Курманов хойр Лаганя района толһачин Күндллһнә Һашгудар ачлгдв,кесг улсиг болхла района һардач Ханлтын бичгүдәр мөрәлв.
Дарунь үг авсн Тимур Гаваев бас бәәрн заһсчнриг йөрәһәд, заһс аңнлһна болн эд-бод келһнә таңһчин бүрдәцсин ассоциацин заһсч Валерий Гришиниг Хальмг Таңһчин селәнә эдл-ахун министерствин Күндллһнә Һашгар ачлв. Эн ассоциацин звенон һардач Валерий Цаган-Манджиев болн заһсна эдл-ахуг сәәнәр бүрдәһәд, заһсна зүүтә эдл-уушиг эврә таңһчдан болн орн-нутгин талдан регионмудт орутаһар хулдҗадг Виктория Бадмаева министерствин Ханлтын бичгүдәр темдглгдв. Эн кемд Лаганя района депутатнрин Хургин ахлач Михаил Богатов бас эврәксән халунар йөрәснь ке болҗ медгдв.
Заһсчин Өдрт нерәдгдсн нәр- нааднд эрк биш Усна хаана туулин дүр орлцдгнь орта юмн. Энүнлә дегц Хальмг Таңһчин Келн- улсин оркестрин концерт эклв,асхарнь болхла Хальмг Таңһчин ачта артистк Эрвена Оргаева лаганя улсиг эврә билг- эрдмәрн байрлулв. Эн саамд марһасин аш диглгдҗ, дииләчнрт дипломс болн мөңгнә мөрәс үнтә, белгүд бәрүлҗ өггдв: заһс аңнлһна марһанд йисн һар киил заһс бәрсн Давид Зарахтаев болн «заһсн-фест» марһанд Айшиковихнә бүл ончрв. Эн өдрин бийд Диилврин 70 җилин нертә стадионд Хальмг Таңһчин улсин эдл-ахун ачта көдләч, заһс аңндг “ Каспиец” колхозин ачта ахлач Константин Бадма-Халгаевич Нактановин санлд нерәдгдсн футболар марһан давулгдснь бас үзмҗтә болв.
Бәәрн баһчуд болхла сөөни өрәл күртл гишң нәәрлҗ,цаган сергмҗтәһәр давулв.Тиигәд байрин нәр төгсв,зуни эн өдр дегд халун чигн болсн бийнь бәәрн улс эврә нәәртән олар цуглрҗ ирснь һәәхмҗтә болв. Хаврин көдлмшән төгсәһәд,ода амрчадг заһсчнр гөлмән,онһцсан ясад,намртан теңгст һархар белдҗәнә. Җил ирвәс теңгсин усна кемҗән баһрад,заһс бәрдг ормс хагсад,заһсчнрт теңгст холд һарх керг учрад бәәнә. Тегәд эн туст хаһлх төрмүд чигн баһ биш,зуг тиигсн бийнь зөргтә лаганя заһсчнр авсн даалһвран тер кевәрн давулад күцәҗ,олн дунд тоомср олҗ,цааранднь чигн нерән һарһҗ көдлхнь лавта болх гиҗ йосндан иткнәч!

ШАГҖИН Любовь

Видео