Төрскнч седклтә баһчудыг өскхәр

11-07-2023, 09:10 | Общество

Шидр Элстд Олна палатын, министерствсин, ведомствсин, келн-улсин ниицәсин, кесг бүрдәцсин болн шаҗна элчнрин орлцлһтаһар «төгрг ширә» болв. Төрскнч седклтә баһчудыг өсклһнә төр харһлтын йовудт хәләгдв.

Сүл цагт эн чинртә төрт онц оньг өггднә. Орн-нутгин баһчудын политикин көтлврт эн төр батлгдсн бәәнә. Сурһуль-эрдмин бүрдәцсин көтлврт болхла шишлң кичәлмүд орна, гиҗ келх кергтә. Нег үлү хамгин түрүнд төрскнч седклтә баһчудыг эк-эцкнь өскх зөвтә. Мел эн төр иргчдән сән делгрлттә орн-нутгин улнь болҗ, дорас өсч йовх баһчуд тууҗан медҗ, эврәннь отг-әәмгән ямр чигн хортнас харсҗ чадхмн.
Олна палатын һардач Мучан Баатрин келсәр, сүл арвн җилин туршарт эн төрт кергтә оньг өггдҗәдго болна. «Төгрг ширәд» орлцач болһна илдклнь соңсад, хөөннь үүдсн сурврмудт хамдан хәрүһинь олад, шишлң көтлвр батлхар зүткҗәнәвидн гив.
Төрскнч седклтә баһчудыг сурһмҗллһн эннь һанцхн эк-эцкнрин керг биш гиҗ темдглх кергтә. Мана таңһчд эн төр шунмһаһар хадһлгдҗана. Одахн Хальмг Таңһчин сән Өдр темдглсн кемд күндтә болн тоомсрта нег һазра улсиг Советин Союзин Баатр, нертә үүлдәч Б.Б.Городовиковин нертә орденәр ачлв. Эннь төрскнч седклтә керг биший... 2010-ч җилд Келн-улсин төсвс күцәлһнә туск селвлцәнә йовудт Әрәсән Президент Владимир Путин төрскнч седклтә баһчудыг сурһмҗллһнд онц оньг өгхиг дәкнәс темдглсн билә, гиҗ педагогическ номин доктор, Б.Б.Городовиковин нертә Хальмг ик сурһулин профессор Дәкин Раиса тодлулв.
Раиса Батнасуновнан келсәр, эн Санкт-Петербург балһсна ик сурһульд сурч йовсн цагтан тенд Советин Союзин Республикүдин олн элчнрлә үүрлҗ йовла. Тер цагт цуһар төрскнч седклтә бәәснь ода медгднә. Өдгә цагин баһчуд болхла оңдан, зуг эннь эднә гем биш, цагнь тиим, гиҗ келх кергтә.Тегәд бидн цуһар негдәд нөкцлтҗ олна кергин төлә хамдан эн төриг хаһлх зөвтәвидн гив.
Тер мет «төгрг ширән» йовудт социологическ шинҗллтин, шаҗна төрәр давулгддг керг-үүлдврмүдин, «Движение первых» җисәнә үүлдврин тускар болн нань чигн илдклмүд соңсхгдв.
Онц темдглхәс, Олна палатын һардач Мучан Баатр «Төрскән харсачнр» саңгин региональн әңгин һардач Хаалһин Очрла нөкцлтин бооца батлв. Очр Владимировичин темдглсәр, саңгин әңг Олна палатын элчнрлә хамдан ирлцңгү керг-үүлдврмүд давуллһнд тусан күргҗ йовхмн.

КАРСАНА Евгения

Видео