Партьсин бәрмт цаасд иткүлгдв

11-07-2023, 09:15 | Общество

Удл уга, һаха сарин 10-д, цуг Әрәсәд суңһврин хамцу өдр болхмн. Тер тоод Хальмг Таңһчд Улсин Хуралын (Парламентин) депутатнриг суңһх. Тер керг-үүлдврин тускар таңһчин Суңһврин комиссин Ахлач Бембә Чужаев тодрхаһар келҗ өгв.

Мөчн сарин 10-ас авн така сарин 10 күртл партьсин болн онц кандидатнрин бәрмт цаасд орулгдад тоод авгдхмн гиҗ Бембә Сергеевич темдглв. Иигәд, мөчн сарин 29-д «Негдсн Әрәсә» партин КРО-н кандидатнрин таңһчин болн нег мандатта округудын кандидатнрин спискүдин бәрмт цаасд иткүллһнә төлә Суңһврин комиссьт орулҗ өгв. Таңһчин спискд 88 кандидат, нег мандатта округудар 17 кандидат йовна.
Тер мет КПРФ партин КРО бас спискүдән иткүллһнә төлә орулҗ өгв. Теднә тоод ирлцңгүһәр 60 болн 17 кандидат йовна. Тер мет «Справедливая РоссияЗа правду» партин спискүд иткүлгдв.
Тоод орулҗ авлһна керг бас така сарин 10-д 18 час күртл күцәгдхмн.
Кандидатнран заалһна керг-үүлдврән күцәҗәхин тускар така сарин 3 күртл «Негдсн Әрәсә», КПРФ, ЛДПР, «Справедливая Россия», «Новые люди», «Родина», «Партия роста» болн «Российская партия свободы и справедливости» партьсин региона әңгүд медүлв. Долан парть һар тәвлһ цуглуллһнас сулдхгдсн бәәнә. Йирдән 27 парть болн региона 17 әңг суңһврт орлцх зөв авла, гиҗ таңһчин Суңһврин комиссин ахлач заав.
Ут турштан Хальмг Таңһчд һаха сарин 10-д болх суңһврт 227 участкин, 14 территориальн, 17 округин болн таңһчин Суңһврин комиссьмүд орлцх.
Дууһан өглһн һаха сарин 8-д, 9-д болн 10-д болхмн, тиим кевәр цуг улст суңһачин зөвән күцәхин төлә арһ өггдх болн ирлцнгү таал тогтагдхмн. Суңһвриг дигтә-даратаһар бүрдәхин төлә 22 КОИБ олзлх. Эн комплексмүд суңһврин бюллетеньсиг дигтә-даратаһар эд-бод кехин төлә райодын болн Элстин участкудт олзлгдх.

ТҮРВӘН Һуна

Видео