Алтн теегтән – көгҗмин болн дууна белг

11-07-2023, 09:35 | Общество

Хальмг Таңһчин Өдр байрин бәәдлд темдглгдв. Эн сәәхн өдрт нерәдәд, олн керг-үүлдврмүд күцәгдв. Тедн дунд «Алдр теегтән нерәдсн дууна дееҗ» наадм әмтнә тааслт олв. Академическ көгҗмин наадм таңһчин хамгин билгтә дуучнриг цуглулв. Эдн орн-нутгин нер һарсн коллективст үүлдҗ йовна. Кесгнь Москван, Санкт-Петербургин, Аһшин, Шартун болн нань чигн балһсдын консерваторьт эрдмин ах сурһуль дассн нертә дуучнр болн көгҗмчнр мөн.

Таңһчин Өдрт нерәдсн көгҗмин ик байрин эклцәр Хальмг Таңһчин тугиг орулҗ тәәзин өмн волонтермуд делскв. Дарунь Хальмг Таңһчин частриг артистнр өргмҗтә кевәр дуулҗ хәләһәчнрин седклд омг болн бахмҗ үүдәв. Эн җил таңһчин Өдр һурвдад темдглгдҗәнә. Байрин эн үүлдвриг һардҗ давулсн Манҗин Аркадин нертә Хальмг шаңһа филармоня билг-эрдмин һардач Ольга Дедникова эн байрин чинриг өөдән темдгләд, энүнә йовудт олн керг-үүлдвр күцәгдсинь зааҗ келв. Академическ көгҗмин наадмиг баһ наста дууч, Н. Римский - Корсаковин нертә Санкт-Петербургск консерваторин оютн Байирта Бадма-Халгаева эклв. Цугәрәсән болн нарт-делкән олн марһана лауреатын дуулсн дун Диилврин талвңгиг дүүргҗ, цуг таңһчар күңкнсн болҗ медгдв.
Аһшин билг-эрдмин болн сойлын ик сурһулин оютн Бадма Баджаевин дуулсн дун классическ көгҗмин янзар Хальмгт билгтә дуучин эрдмнь өөдлҗәхинь медүлв.
Диилврин талвңд болсн концертд орлцсн нертә дуучнр цугтан эврә цагтан П. Чонкушовин нертә билг-эрдмин колледж төгсәсмн. Үүдәлтин түрүн ишкдлән Элстин тәәз деер эклсән эдн кезә чигн мартхш. Тегәд чигн эн асхн цуг эднә седкләс һарсн дун олн хәләһәчнрин оньг авлв.
Билг-эрдмәрн таңһчин нериг дуудулҗ йовдг билгтнр иигҗ дегц оларн ирҗ орлцҗахнь цугтад ик байр үүдәв. Төрскн теегин һазртан нерәдҗ Юлия Яшкулова, Герензел Мацакова, Гиляна Дорджиева, Мингиян Оджаев, Светлана Катаева эдн Элстин тәәз деер һарч сергмҗтә дууһан өргҗ дуулснь цугтад ик тааста болв. Келхәс, Аһш балһсна консерваторин багш, билгтә дууч Светлана Катаева эн җил хойрдад Таңһчдан ирҗәнә. «Пасхальный благовест» гиҗ нерәдгдсн концертд Элстин хойрдгч тойгта бичкдүдин билг-эрдмин сурһулин көвүд-күүкдлә эн дууч орлцсн концерт олн хәләһәчнрт ода чигн мартгдад уга болх. Деер заагдсн дуучнр Москва балһснд Хальмг автономин 100 җилин ончта өөнд нерәдсн байрин ик концертд дуулсинь цугтан меднә.
Әрәсәд бәәтхә, цуг делкән кесг орн-нутгудын тәәз деер билгән үзүлҗ йовдг нертә хуурч Петр Чонкушов, Хальмг Таңһчин улсин артист Игорь Лазарев, артистнр Лиджи Доржинов, Айса Брюгидикова, цуглрсн улст дууна билгәрн байр белглв.
Хальмг Таңһчин сойлын болн зуульчллһна министрин селвгч Герман Санджарыковин келсәр, академическ көгҗмин иим наадм таңһчин Өдрлә ирлцүлҗ давулдгнь сән авъяст тохрхнь маһд уга. Эн наадм байрин өдрин хамгин чинртә керг-үүлдвр болснь лавта. Мана таңһчин байриг хам- хоша бәәдг регионмудас ирсн артистнр бас хувалцв. Дун- көгҗм әмтиг хамцулҗ, эвин сәәхн бәәдл тогтхд туслдгиг тедн медүлв. Т. Мурадовин нертә Дагестанск шаңһа филармоня камерн оркестр билгән үзүлв. Дагестана улсин артистк, РФ-н ачта артистк Зарифа Абдуллаеван һардврт эн оркестр, Әәдрхнә көгҗмин театрин көгҗмчнрлә хамдан Хальмг симфоническ оркестрин ханьд академическ көгҗмин наадм белдҗ давуллһнд орлцв.
Хальмг Таңһчин билг-эрдмин ачта үүлдәч, ах дирижер Мергн Настиновин һардврт Хальмгин симфоническ оркестр Дагестана болн Әәдрхнә көгҗмчнрлә ниитәһәр үүлдәд, классическ көгҗмлә хальмг хәләһәчнриг таньдулв. Эднә наадсн көгҗмиг дахҗ эн асхн нертә олн дуучнр билгән үзүлв.
А. Цебековин нертә Шаңһа хор эн өдр билг-эрдмәрн олн әмтиг бас байрлулв. Хальмг Таңһчин билг-эрдмин ачта үүлдәч Ольга Сердюкован һардврт дууна баг классическ үүдәврмүд соңсулв.
Москва, Санкт-Петербург, Аһш, Владивосток болн нань чигн балһсдт көдлҗәдг дуучнриг болн көгҗмчнриг академическ көгҗмин наадм хамцлулв. Төрскн теегтән нерәдҗ дууһан дуулхар эдн ик байртаһар таңһчурн ирв. Эврә билгтә үрдән Хальмг Таңһч байртаһар тосв. Билгинь өөдән үнләд ончта ачлврар тедниг темдглв. Хальмг Таңһчин ачта артист гисн нериг Петр Чонкушов, Юлия Яшкулова, Герензел Мацакова, Гиляна Дорджиева, Мингиян Оджаев, Светлана Катаева эдн зүүв. Хальмг Таңһчин залврин ахлачин дарук Нарн Кюкеев болн таңһчин сойлын болн зуульчллһна министр Саглр Тюрбеева билгтә артистнрт күндтә ачлвринь бәрүлҗ өгв. Баһ наста билгтнр Байирта Бадма-Халгаева болн Бадма Баджаев таңһчин сойлын министерствин Күндллһнә һашгудар ачлгдв. Дагестана камерн оркестрт Хальмг Таңһчин залврин Ханлтын бичг бәрүлҗ өггдв.
«Таңһчд сойлын сән селгән өсч йовхиг эндрк концерт үзүлв. Әрәсән регионмудт болн талдан һазрт чигн хальмг дуучнрин болн көгҗмчнрин нерн темдгтә болҗахнь байрта йовдл». – гиҗ тоолврарн Хальмг Таңһчин улсин артист Игорь Лазарев хувалцв.

ХӨӨЧИН Галина

Видео