Тәрә тәрлһнә төрмүдәр күүндв

13-07-2023, 09:05 | Общество

Хальмг Таңһчин селәнә эдл-ахун министрин үүл дааҗадг Тимур Гаваев һардҗ йовсн делегац Татарстан Республикд болсн «Тәрәнә һазрин Цугәрәсән Өдр-2023» һәәхүлд орлцв.

Энүнә йовудт Әрәсән селәнә эдл-ахун министр Дмитрий Патрушевин һардвртаһар давулгдсн селвлцәнд мана орн-нутгин туст бәәдг санкцсиг учртан авч, тәрә тәрлһнә көдлмшин йовудын төр босхгдв.
Орн-нутгин регионмудын АПК-н заллтын әңгүдин, бизнесин элчнр болн фермермүд эн керг-үүлдврт орлцсмн. Тер мет өдгә цага селәнә эдл-ахун техник, селекцин халхар һарһҗ авсн шин эв-арһс үзүлгдв.
Терүнәс нань Хальмг Таңһчин Толһач Хаска Батун даалһврар Тимур Гаваев «Селәнә эдл-аху» гисн төрәр Алтан крайин губернатор Виктор Томенкон һардврт болсн дарани селвлцәнд орлцв. Тенд АПК-н технологическ үлмә уга бәәдлин халхар күүндвр болв. Эн төр Әрәсән Президент Владимир Путинә даалһврар хәләгдсн билә.
Селәнә эдл-ахун шишлң техникиг лизингәр дамҗад кимдәр хулдҗ авлһна төрәр бас күүндцхәв. 2022-ч җилд фермермүд шишлң техникиг икәр хулдҗ авсн уга, эн җил болхла бәәдл невчкн ясрҗана. Селәнә эдл-ахун көдләчнриг дөңндг эв-арһс цааранднь күцәгдҗәнә.

КАРСАНА Евгения

Видео