Нег һазра улсин санлынь тевчхәр

13-07-2023, 09:15 | Общество

Төрскән харсгч Алдр дәәнә кемд эврә орн-нутган аврлт уга хортнас харсад,ааһ-цусан асхҗ,әмнәсн хаһцсн улсин санл әрүнәр хадһлгдҗ йовна.Шидр Сарпан районд гиичлсн эврә цагтан межә харҗ йовсн, ода болхла ачта амрлһнд бәәдг Башкортостана элч Валерий Петряков болн Калининград балһсна бәәрн газетин ах редактор Григорий Зуевич мана һазрт оршагдсн нег һазра улсин санлынь тевчхәр ирсмн. Хальмг Таңһчин медәтнрин Хүүвин ахлачин дарук Сергей Ершов болн Хальмг Таңһчин әәмшг уга бәәлһнә органмудын ветеранмудын Хүүвин ахлачин дарук Анатолий Таранов эн делегацин ханьд бас ирсн болдг.

Иигәрән ирхиннь өмн гиичнр Приютное болн Баһ Дөрвд селәдт болсн харһлтст орлцсн билә. Сарпан района одмн Евгений Перфильев холас ирҗ йовх гиичнриг Садовое селәнә төв бумблвд тосад,бәәрн улс дәәнд әмнәсн хаһцсн зөрмг дәәчнрин санлынь әрүнәр хадһлҗахин тускар тодрхаһар цәәлһҗ өгв. Келхәс,Башкортостанас ирсн гиич хамгин түрүнд зөргтә башкир баахн дәәч Зайтуна Альбаеван цогц оршагдсн үкәрт одад,нег һазра күүкнә санлынь тевчҗ күндләд мөргәд һарв. Одахн гилтә хол эн республикәс ирсн хәәврин баг бәәрн хазгудла хамдан дәәнә цагт эн баахн күүкн оршагдсн һазринь олҗ авад,бумблв босхсна тускар Евгений Иванович бүләнәр келҗ өгснь гиичнрин седклинь йосндан үүмүлв яһв…
Дөчдгч җилмүдт Садовое селәг догшн хортнас сулдхҗ йовад баатр йовдлмуд һарһсн полковник Е.Ф.Макарчукин цергчнрт нерәдәд углҗ тәвгдсн санлын чолун гиичнрт бас үзүлгдв. Эдн болхла бәәрн улст ик ханлтан өргҗ, Төрскән харсгч Алдр дәәнә цагт әмнәсн хаһцсн улсин санлынь әрүнәр хадһлҗахинь өөдәнәр үнлв.

ШАГҖИН Любовь

Видео