Өөдән ачлвр бахмҗ үүдәв

13-07-2023, 09:35 | Общество

Таңһчин Өдрлә төрскн һазр-уснаннь делгрлтд ик тәвцән орулсн улсин ач-тус темдглҗ Советск Союзин Баатр Басан Городовиковин нертә орденәр ачлв. Таңһчин селәнә эдл-ахун, эрүл-менд харлһна, сурһуль-эрдмин, номин халхд үнн-чик седклтәһәр көдлҗ, эрдмәрн олн улст тусан күргсн, күцәмҗ бәрсн болн отг-әәмгтән күндллһ олсн улс түрүн болҗ эн орденәр ачлгдснь темдгтә. Өөдән ачлвр авсн түрүн улс дунд Үстин района әмтнә социальн теткврин комплексн төвин социальн көдләч Наталия Чумудова билә. Эн һучн хойр җилдән төрскн Эрднихн селәнд социальн көдләч болҗ көдлҗәнә.

Хол 1991-ч җилд социальн көдләчнрин цергллт бүрдәгдхлә Наталия Тагировна района социальн теткврин төвд ирв. Тегәд тер җиләс авн эндр күртл күүкд күн һанцарн бәәдг болн гемтә-шалтгта нег һазра улст нөкд болҗ, эднд нүдн-амн болҗ үүлдҗәнә. Ода энүнә хәләврт нәәмн күн бәәнә, күн болһнд социальн көдләчин дөң кергтә. Наталия Чумудова эднд гер-бүүринь ахулна, худгас ус орулна, хот-хоолынь болн эминь хулдҗ авна, коммунальн туслмҗин мөңгинь өгнә, нань чигн керг күцәнә. Селән һазрт кех-күцәх көдлмш дала болна. Дәкәд медәтә болн эрмдгтә улст дару-дарунь эмчд бийән үзүлҗ эмнлһ авх кергтә, тегәд социальн көдләч тедниг дахна. Күүкднь өсәд-босад хол һазрт йовх медәтнрт йириндән өөрнь бәәҗ күүндх, ямр нег төрәр севлг өгх, тодлврмудынь соңсх күн кергтә. Олн җилмүдин эргцд социальн туслмҗ күргҗ дөң болдг социальн көдләч эднд элгн-саднла әдл өөрхн күн болна.
- Эн җилмүдин эргцд мини хәләврт дөч һар күн билә. Күн болһнд килмҗән тусхаҗ, цаһан седкләсн дөңгән күргнәв. Олн зүсн учрар ода эдн һанцарн бәәнә, тегәд эднд нөкд болх кергтә болҗана. Гер-бүүрин көдлмш кеҗәһәд бидн күүндәд, селәнә болн района зәңгсәр хувалцад, ямаран төр учрсиг соньмсад, ямаран керг күцәх кергтәһинь диглҗ авнавидн. Медәтнр баһ цаган тодлад җирһлднь учрсн йовдлмудын тускар келҗ өгхләнь тедниг соңсад, оньган өгх кергтә. Медәрәд ирхлә күүнд хамгин түрүнд оньг болн килмҗ кергтә. Зәрмдән эмин ормд бүлән үг келснь урмд өгч чидл урһана, - гиҗ Наталия Тагировна келнә.
Ода энүнә хәләврт бәәдг улс дундас медәтәнь Ноһан Кисяевна Джанжигаева болна, эн найн тавта. Ээҗ һартан урта, юм уйхдан болн өлгхдән дурта. Наталия Тагировна бас һартан эвтә күүкд күн, тегәд эдн хамдан үүл бәрҗ цаган сергмҗтәһәр давулна. Ямр нег сән өдрин байр болхла, социальн көдләч медәтнрт һарарн кесн кегдлмүд белглнә. Эдн хамдан цәәһән ууһад, олн төрәр күүндәд, таньл-үзл улсан тодлад, чееҗән сергәнә. Эднә социальн көдләч Басан Городовиковин орденәр ачлгдсиг соңсад, Наталия Тагировнан байриг хувалцҗ медәтнр бүлән үгән нерәдв.
- Хамдан көдлҗәх үүрмүдм, көвүм берм, элгн-садм ик байрта бәәнә. Таңһчин социальн көдләчнр дундас нанд түрүн болҗ Басан Бадьминовичин нертә орден бәрүлҗ өгснь ик бахмҗ болв. Нанд энтн бас байрта болн ик дааврта йовдл мөн. Төрскән харсгч Алдр дәәнд залу-зөрмгән үзүләд Советск Союзин Баатрин нер зүүсн, таңһчиг күнд цагла чадмг кевәр һардҗ, төрскн һазриннь делгрлтд ик тәвцән орулсн мана ик ачта толһачин нертә орден зүүнә гидгтн дааврта болҗана гиҗ би тоолҗанав. Мана көдлмш күнд болв чигн олнд туста болн кергтә, - гиҗ Наталия Тагировна темдглв.
Үстин района КЦСОН-а көдләчнр ниитәһәр, нег өрк-бүл кевтә бәәнә. Эдн байр-зовлңган хувалцҗ, нег-негндән түшг болҗ, күнд цагла дөң күргхәр адһна. Өөдән ачлвр авснлань үүрмүднь болн таңһчин социальн делгрлтин министерствин һардвр йөрәснь энүнд ик байр үүдәв. Ор һанцхн Церн көвүнь болн Кема бернь элгн-садан цуглулад тооһад, экиннь байр хувалцв.
Байрин хургт таңһчин нертә, күндтә, тоомсрта улс орлцв. Хальмг Таңһчин Толһач Хаска Бату өөдән ачлвр бәрүлҗ өгч, эднә ач-тусиг өөдәнәр үнлҗ, ханлтын үг келв. Күн болһн эврәннь көдлмшәрн, кергәрн бәәсн һазран делгрүлҗ йовна. Теднә негнь эгл социальн көдләч Наталия Чумудова болна.

ДООҖАН Наталья
ЗУРГТ: Хальмг Таңһчин Толһач Хаска Бату Үстин района КЦСОН-а социальн көдләч Наталия Чумудовад ачлвр бәрүлҗ өгчәх кем

Видео