Хамгин билгтәнь ачлгдв

15-07-2023, 09:15 | Общество

Давсн үлмҗ өдрлә, така сарин 12-т, Хальмг ик сурһулин инженерин –технологин дацңгин бәәшңд байрин хург болв. Хамгин билгтә болн шунлтта, сәәнәр сурдг оютнрт нерәдсн ик сурһулин һардачин нерн деерәс тоовр болв. Энүг нүр үгәр хальмг вузин һардач Бадм Салаев секв.

- Эн өдрмүдт, така сарин 3-ас авн экләд цуг дацңгудын төгсәһәчнрт бидн хату цаасинь бәрүлҗ өгчәнәвидн. Эндр асхлад иим цаасан экономикин дацңгин баһчуд авх, дәкәд эсвин болн физикин дацңгин элчнрин байрин асхн болх.
Ут турштан 1500 төгсәһәч эн җил хату цаасан авчана. Эн байрин хургт болхла йилһән сән 22 төгсәһәч цуглрв. Эднд сурһулин кесг җилин эргцд номин, олна, спортын, билг-эрдмин җирһлд орлцсинь иткүлҗәдг цуг бәрмт цаасинь цуглулад бәрүлҗ өгчәнәвидн, – гиҗ Бадм Катинович келв.
Тер мет ода ик сурһульд кесг тоот дару-дарунь сольгдад йовна, зуг тиим кевәр өдгә цагин мергҗлтнриг белдҗ болҗана. Тер учрар одахн «Бизнес-информатика» зөрүллтин төгсәһәчнр Эрвена Васкеева, Элистина Джапова, Заяна Таскирова болн Алдар Манджиев, эсвин болн физикин дацңгин төгсәһәчнр хату цаасна көдлмшән «Стартапин» төрәр харсв. Элстд болн таңһчин талдан балһсдт чигн ховр, онц тоот үүдәхин, шалтгта әмтн ноутбукиг болн нань чигн тоотиг амрар олзлдгин төлә то-дигин шин технологий үүдәҗ һарһв. Тер шин технологийсиг олзлад, эдн эврә бизнес бүрдәҗ чигн чадх.
Хальмг ик сурһульд иим оютнр дунд йоста марһан болв. Хамгин ик балл хоршасн оютнр энд диилвр бәрв. Тер тоод Буйнта Катананова, Цаһан Васяркиева, Амулң Манжикова, Ольга Дюгидова, Анастасия Чужгинова, Роман Ширекинов, Цедн Кикеев, Светлана Кикеева, Заяна Таскирова болн кесг нань чигн билгтә төгсәһәчнр ачлгдв.
Марһана дииләчнриг болн теднә эк-эцкнриг, элгн-садыг Хальмг Таңһчин залврин Ахлачин дарук Марина Ользятиева, Улсин Хуралын (Парламентин) депутат Борис Муджиков, Элст балһсна толһач Николай Орзаев, Хальмг вузин дацңгудын һардачнр йөрәҗ күцәмҗ дурдв.
-Мини күүкн тиим ик ачлвр авснд би теңкән угаһар байрлҗанав. Эмнлһнә дацңд химийин зөрүллтәр эрдм авла, сурһульдан чигн эн кичәләр соньмсчала. Ода Элстин гимназьд химийин багш болҗ көдлх. Бидн Яшкульд бәәнәвидн. Гертән көдлсн болхла улм таалта болх билә, болв ода деерән тиим кичәлин багшин көдлмш уга. Күүкм цааранднь магистратурт орхар седҗәнә -, гиҗ Ольга Дюгидован экнь эврәннь байрарн хувалцв.
- Хальмг ик сурһульд сурчасн цагтан би кесг керг-үүлдвр бүрдәләв, ЮФО-н профсоюзин бүрдәцсин марһанд хойрдгч орм эзлләв, 1,2 сай арслңга «ЮФО-н оютнрин көтләч- 2023» мөрә шүүҗ авлав, талдан чигн кесг марһанд орлцҗ, олн улсла харһлав, теднә дамшлт хоршалав, тиим кевәр сурһулин җилмүд нанд ик туста болв.
Мана һардач Бадм Салаевд, экономикин дацңгин цуг багшнрт ик ханлтан өргҗәнәв, эврә билг-эрдмән делгрүлхин, туста дамшлт хоршахин төлә эдн цуг таал тогтана. Би көдлмшән чигн олад авчклав, Москвад хулд-гүүлгәнә менеджер болҗ нег компаньд көдлхв, тенд урднь оютн цагтан зунар көдлҗәләв, тегәд компаня һардвр нанд тиим үрвр келә, – гиҗ Сабина Джумабекова байрта-бахтаһар келв.
Тиим кевәр Хальмг ик сурһулин оютнр медрлән гүүдүлх, билг-эрдмән, олна шунлтан, номин көдлмшән делгрүлх цуг эв-арһ олзлна, тер туста кергт багшнрнь, дацңгудын һардачнр, ик сурһулин һардвр эднд даңгин дөң болна. Җил ирвәс эн дамшлт өргҗәд улм ик билгтә, медрлтә уйн наста иргнмүдиг өскх цуг таал тогтхмн, тиигхлә тер үүлдврнь цаһан хаалһта болтха!

ТҮРВӘН Һуна

Видео