Суңһврин туст цәәлһвр өггдв

15-07-2023, 09:20 | Общество

Талданар келхлә бәрмт цаасиг орулҗ авлһн төгсв, ода болхла таңһчин Улсин Хуралын (Парламентин) депутатнриг суңһлһнд орлцхар седҗәдг партьсин кандидатнрин спискүдиг зөв-йосна болн талдан чигн органмуд така сарин 19 күртл бүрткх. Тер болн суңһврин урдк нань чигн керг-үүлдврин тускар таңһчин Суңһврин комиссин Ахлач Бембә Чужаев, түүнә дарук Батр Эрднеев болн комиссин сегләтр Наталья Федорченко цәәлһвр өгв.

Мөчн сарин 10-ас авн така сарин 10 күртл партьсин болн нег мандатта округудын кандидатнр заагдла. Тиим керг-үүлдвриг 9 парть күцәлә, иткүллһнә төлә долан партяс Суңһврин комиссьт спискүд орҗ ирв, гиҗ Бембә Сергеевич зәңглв. Тер тоод «Негдсн Әрәсә», КПРФ, «Справедливая Россия-За правду» (таңһчин спискд 32 кандидат йовна, нег мандатта округар-15 кандидат), «Роста» нертә парть (ирлцңгүһәр – 37 болн 2 кандидат), ЛДПР (–54 болн 17 кандидат), «Российская партия свободы и справедливости» (–32 болн 17 кандидат), «Новые люди» (–39 болн 16 кандидат) партьсин региона әңгүдин таңһчин спискин болн нег мандатта округудын кандидатнрин спискүд батлгдсмн. «Российская партия пенсионеров за социальную справедливость» гидг партин Хальмг әңг нег мандатта округар ор һанцхн кандидатын нер заав.
Тер мет таңһчин Суңһврин комиссьт кандидатнрин спискиг орулҗ авлһн бас така сарин 10-д төгсв. Тер мет 3-ч тойгта округин комиссьт «Российская партия пенсионеров за социальную справедливость» гидг партин кандидат нег мандатта округар тоод авлһна төлә бәрмт цаасан, тер тоод 387 суңһач һар тәвсинь иткүлҗ цаас орулҗ өгв. Эврә дурар суңһврт орлцҗадг нег кандидат бас 408 суңһач һар тәвсинь иткүлв. Цуг тер һар тәвлһн бүрткгдхмн.
Спискүдән орулҗ өгснә хөөн партьс агитацан эклҗ чадҗана. Телеүзлһнә каналмудт, барин һарцст суңһврин өмнк агитац ноха сарин 12-ас авн һаха сарин 8 күртл болхмн. Ноха сарин 10 күртл таңһчин Суңһврин комиссь барин, телеүзлин болн радиозәңгллһнә шаңһа бүрдәцст өңгәр өгдг кемҗәг, эфирин цагиг йилһлһнә төлә җирв хайлһна керг-үүлдвр күцәх.
Тер мет ноха сарин 10 күртл таңһчин спискүдән тоод орулсн суңһврин негдлтсин хоорнд җирв хайлһн болхмн, терүнлә ирлцҗ суңһврин бюллетеньд теднә нериг болн темдгүдиг оруллһна диг-даран йилһгдх, гиҗ брифингин йовудт цәәлһвр өггдв. Тер мет суңһачнр таңһчин Суңһврин комиссин сайтд кесг сурвртан дигтә хәрү олҗ авх.

ҖААХАН Бадм

Видео