Өөдән күцәмҗ бәрсн Санана үлгүрәр

15-07-2023, 09:25 | Общество

Элстин этносойлын гимназин 11-ч классин сурһульч Санан Сумьянов химийин болн биологийин ЕГЭ-н шүүвриг 100-ад балл хоршаҗ өгв, орс келәр болхла 97 балл хоршав.

-Мана гимназиг эн җил төгсәсн Санан Сумьянов сурһулин олна җирһлд шунмһаһар орлцна, химийин ЕГЭ-н шүүвриг 100 балл хоршаҗ өгв. Тиим ашт таңһчд күрснь һанцхн Санан болв, - гиҗ сурһмҗин көдлмш күцәдг сурһулин һардачин дарук Элеонора Викторовна Уджакова төгсәһәчнрин байрин асхна йовудт олнд соңсхҗ келсмн. Дәкәд хөөннь биологийәр чигн шүүврән 100 балл хоршаҗ өгснь медгдв. Орс келәр медрлтә бәәсинь ЕГЭ-н аш медүлв.
«Яһҗ тер шүүвртән белдсән, иим өөдән күцәмҗ яһҗ бәрсән Санан эврәннь интервьюдан тодрхаһар келҗ өгв. Тиигҗ Санана дамшлтыг талдан сурһульчнр яһҗ олзлҗ чадхин тускар келҗ өгв, цаһан седклднь бидн ханлтан өргҗәнәвидн. Тиим арвтнриг мана сурһульд сурһмҗлна, түүнә селвгиг олзлҗ наадк мана сурһульчнр бас шүүврт белдх»,- гиҗ Элеонора Викторовна темдглв.
Дааврта шүүврт Санан 10-ч класстан экләд белдсмн. Эн кичәлмүдәр болдг онлайн курсмудт орлцҗала. Тер мет гимназин химийин багш Елена Алексеевна Колесникова болн биологийин багш Татьяна Николаевна Манжиева энүнд дөң болҗасмн. Эднә селвгәр Санан шүүврт белдлһнә диг-дара тогтав, терүгәр һардвр кеҗ кичәл болһнд тохнятаһар белдҗәлә. Цуг өрк-бүлнь, элгн-саднь Сананд бас түшг болҗасмн, тиигҗ олна нилчәр ик күцәмҗ бәрҗ болҗана гиҗ Санан келнә.
ЕГЭ - энтн мана җирһлин дарани девсң болҗана. Түүнд урдаснь, чик эв-арһ олзлҗ белдх кергтә гиҗ Санан төгсәһәчнрт болн сурһульчнрт селвгән өгчәнә. Шүүврт чигн үүмхмн биш, цуг даалһвриг төвшүн-тогтунар күцәх кергтә, тиигхлә ашнь чигн сән болхмн гиҗ арвт селвглнә.
Ик күцәмҗ бәрсн Сананиг йөрәҗәнәвидн, сансн санань эрк биш күцәтхә! Санана үлгүр сурһульчнрт, теднә эк-эцкнрт урмдта болтха!

ТҮРВӘН Һуна

Видео