Өдгә цагин туск фильм цокч авхар

15-07-2023, 09:30 | Общество

Шидр «Калмыкия» РИА-н барин төвд Әрәсән Орн-нутгин Хүүвин сойлын төрәр үүлддг комитетин элч Иринджан Куулгазына болн ВГИК-ин багш, продюсер-режиссер Андрей Маркинә орлцлһтаһар брифинг болв.

Сүл җилмүдт бидн мана орн-нутгин регионмудар йовҗ шинҗләд, һазр болһна өвәрцлә таньлдҗанавидн. Хальмг Таңһчд ирҗ, фильм цокч авхар зуралҗанавидн. Энүнә төлә тана улс дунд ахр фильмин сценарий бичлһнә марһа зарлвидн. Марһана дииләчин көдлмшәр дамҗад, деерәснь дамшлтта мергҗлтнр кергтә тоотынь немәд өөрхн иргчд өдгә цага бәәдл-җирһлин туск фильм цокч авгдхмн, гиҗ Андрей Маркин келв.
Тер мет нег фильмд кесг келн-улсиг, нег үлү урднь бәәсн Советин Союзин Республикүдин элчнриг орлцулхмн. Эннь олн-әмтн дунд иньгллтин хәрлцәг медүлҗәх йовдл болна.
Әрәсән Орн-нутгин Хүүвин сойлын төрәр үүлддг комитет болн «Сокровище этники» келн-улсин нөкцлтин халхар үүлддг төв эн чинртә төсв күцәхәр седвәр татв. Фильмд хальмг күн хальмгиг, хасг хасгиг, уулын күн уулын күүг наадх зөвтә, гиҗ Иринджан Куулгазын темдглв.
Зарлсн марһанд болн фильмд орлцхар седҗәдг улс missetnica@yandex.ru «Сокровище этники» төвин электронн поштын хайгар бичҗ чадҗанат, гиҗ Иринджан Владимировна дуудвр кев.

КАРСАНА Евгения

Видео