Бурятин наадмд орлцв

15-07-2023, 10:05 | Общество

«Бамб цецг» дууна болн бииһин шаңһа академическ ансамбль Бурятьд болсн нарт-делкән наадмд хальмг билг-эрдм үзүлв. «Бурятин көгҗм» гиҗ нерәдгдҗәдг наадм оюни чинртә керг-үүлдвр болҗана. Дала Ламин Гегән төрсн өдрт нерәдгдҗ тер кегднә. Хальмгин, Моңһлын, Тыван болн Энткгин артистнр эн наадмд орлцв.

«Ноһан Дәрк» гидг нертә шаҗна төв 16 җилин туршарт эн наадмиг бүрдәҗәнә. «Оюни көтлврч Дала Ламин төрсн өдрлә иим буйнта үүлдврт орлцҗ, хальмг билг-эрдмиг үзүлнә гисн байрта йовдл, - гиҗ «Бамб цецг» ансамблин художественн һардач Савр Катаев келнә. –Чинртә наадм олн келн-улсин артистнриг негдүлҗәнә. Дууна болн бииһин хамгин сәәнинь мана коллектив үзүлв. Наадмин художественн һардач Баярма Жалцановад онц ханлтан өргҗәнәвидн. Нөкцҗ үүлдх сәәхн седклтәһәр эн маднд үрвр кесмн».
Така сарин дундурар ансамбль 85-ч өөнин кемән күцәмҗтә кевәр төгсәҗәнә. Эн цагин дотр ансамбль соньн кесг керг-үүлдврт орлцв, олн һазрт концертән үзүлв, шин кесг төсвиг күцәв. Шидр үүдәгч эн коллектив Дагестан орад, тенд «Горцы» гидг амн урн үгин болн заяни сойлын наадмд орлцад ирв.
Терүнә дару ансамблин артистнр Бурятьд одв. Дарунь Моңһлд концертсән үзүлхмн. Хәрҗ ирәд, «Бамб цецг» ансамблин концерт Москвад болхмн.

ҖИРҺЛИН Кермн

Видео